Deuteronomo 20 - Mawu a Mulluku

Dda ekhoto

¹ “Mwaya woowana ekhoto ni adanaanyu nave moona wi magaretiiwa, akavalwiiwa ni akhotwiiwa tti anchichi wuukhwaranyani nyuwaano, muhiwoove. Apwiya Mullukwaanyu ayo yuuvullusalleni o Iguputo eneerokhalla ni nyuwaano.

² Muhinaambe owana ekhoto, mullupa mukutho awe nave aalleelle akhotwaayo wi,

³ ‘Ngiiwani nyu Aisraele! Ollello munaya mwawane ni adanaanyu. Muhitathille murima nave muhiwoove apaalle waatthukumellella.

⁴ Apwiya Mullukwaanyu eneerothaanana ni nyuwaano wi yuukavihereni va ekhotweeyo nave wi yuupambaniheni.’

⁵ “Sika akhoto uullupalli eneerewaalleella athu wi, ‘Ethiyo ookhallavo vaava muthu oyo amakille enyumba yanaanweene koma khanavollowemo? Aarimi arivo, ahokollweelle owaniwa woova wi iiphiwa okhotoni muthu mmodda ttuuvollowamo.

⁶ Ethiyo ookhallavo vaava muthu oyo aallille wene mpesa m'matani koma khanakhalle ni ekari yoohata mpesa ddayennddo? Aarimi arivo, ahokollweelle owaniwa, woova wi iiphiwa okhotoni muthu mmodda ttuumuwirya vinyooyo.

⁷ Ethiyo ookhallavo vaava muthu oyo atomelille wene koma khanamutthelle mutthiyanooyo? Aarimi arivo, ahokollweelle owaniwa woova wi iiphiwa okhotoni, muthu mmodda ttuumutthella ootomeliwooyo.’

⁸ “Akhoto uullupallaayo eneerewaakohattho athu wi, ‘Ethiyo ookhallavo vaava arive muthu oyo murimaaye otthomowillemo ni woova? Aarimi arivo, ahokollweelle owaniwa wi ahaakukhumulle mwiilli akhwaaye.’

⁹ Uullupalli akhotwaayo yamalliha ollota ni akhotooyo, yaatthoolle akapitawo va orive mulloko.

¹⁰ “Mwaayaaka woohella ekhoto muzinda, vawaamba mwaavekeke mwamurendelle wi egonje weekhiiwa.

¹¹ Yawaakhullani mwamurendelle ni wuuhullellani millako, attheenaayo ekhalle akaporo nave yuurumeyellekeni.

¹² Koma yaahiwaakhullani mwamurendelle, yatthoolla ekhoto, vano muwaapheelle muzindooyo.

¹³ Apwiya Mullukwaanyu yawaakhullellani ogonjiha muzindooyo, mumwiiphe arive mullopwana mwemmo.

¹⁴ Koma atthiyana, anamwani ni eziweto ddittheddene muddaakhe wi ddikhalle ddaanyu. Ddeko ddittheddene dda adanaanyu muddipharihe mutteko vawi Apwiya ahuuvahani ddennddo.

¹⁵ Mmu sika muneerellekeenyu ni mizinda dda woorekamella ni nyuwaano nnddo ddihiri dda athu a wuno.

¹⁶ “Koma mwaakha mizinda nnddo ddiri mu ellapo eyo Apwiya Mullukwaanyu enuuvaheewani wi ekhalle wonanko yoohallanaanyu, mumwiiphe arive muthu.

¹⁷ Mwaatthollose Ahiti, Aamori, Akanani, Aperezi, Ahivi ni Ayebusi moollikana ni mmo Apwiya Mullukwaanyu yuulamulelliiwani.

¹⁸ Muwiiphe attheene wi ehuuchimwiheni vamiitthoni va Apwiya Mullukwaanyu vawuuhuddihani ddoonanara nnddo eneeriiwa voollapellani milluku ddiwa.

¹⁹ “Mwaapheella ni owuhella ekhoto muzinda enthawi yoorekama wi mwaakhe, muhikakathe miteekho ddiwa dda ezipaso. Ttuukhoza ocha ezipaso ddiwa koma miteekho ddiwa muhiddikakathe ekaamba yawi miteekhonnddo khe adanaanyu.

²⁰ Koma miteekho ddimodda ddoohimma ezipaso ttuuddikakatha wi mupharihe mutteko wonanko ezida ddakhoto ddawiipitthella muzinda oyo munawaneenyuna ophiyera muwugonjihalle.”