Deuteronomo 2 - Mawu a Mulluku

Mose anaatthopoollella dda olendwiiwa muchipululuni

¹ “Vano naahokollowa oya o echipululu oyeella mukhwipi mwa Enyanja Yoofiira moollikana ni mmo Apwiya yalamulelliiwa. Nave mallapo manchichi naakhalla naapheellaka miyaango dda Seiri.

² “Vano Apwiya yaakilleella wi,

³ ‘Mookhalla mwaapheellaka mwiillaponi yamiyaango enthawi yinchichi vano rukunuwellani ompoto.’

⁴ Yaakilleella wi kuulangizeni wi, ‘Muhanlle vang'ono oweella mu ellapo ya abalaanyu, edduullu dda Esau oyo anakhalla o Seiri. Alliwaayo eneerowoovani nyuwaano koma muchenjere.

⁵ Muhaallike vawi nguuvahani ellapwiiweeyo naari voonyingallihavo nnyallo nanyu. Miyaango dda Seiri kaaddivaha wa edduullu dda Esau.

⁶ Muneerekokulla ni makobiri yoocha ni maaddi oowirya ovenyera wa alliwaayo.’

⁷ “Valle Apwiya Mullukwaanyu yahuudalisani va mitteko ddittheddene mweerillaanyu. Yahuupwathani va olendwaanyu muchipululuni yuullupalleella. Apwiya Mullukwaanyu yaakhalla ni nyuwaano va miyakha 40 ddittheddenenndda nave khemwaaramille erive ello.

⁸ “Sika naakhwaranya ni olendwaahu moowaapheella ellapo ya Seiri nko waari edduullu dda Esau nave naahiya ettilla ya Araba yoovenyera o mizinda dda Elate ni Eziyoni Gebere nirukunuwella o echipululu ya Mowabu.

⁹ Apwiya yaallota ni miyaano wi, ‘Muhaahoose Amowabu, edduullu dda Loti apaalle owanana ekhoto vawi alliwaalla kohaavaha muzinda wa Ari nave nguuvahani ellapwiiweeyo naari vang'ono.’

¹⁰ “(Khallekhalle waakhalla athu amodda amasiva ooromolliwa Aemimu. Athwaayo yaari anchichi nave yaarittho oorekama wonanko Aanaki.

¹¹ Amowabu yaanaaromolla Aanaki ni Aemimu wi tti Arefaimu.

¹² Ahori yakhallattho o Seiri koma edduullu dda Esau ddaawiikariha ni owoononga attheene. Vatulli viwa alliwa yaakhalla o Seiri. Yaheera ddenndda wonanko mmo Aisraele yawiikarihelliiwa adaniiwa mwiillaponi eyo Apwiya yaavahilliiwa.)

¹³ “Sika naallapuwa muhinje wa Zeredi moollikana ni mmo Apwiya yanilamulelliiwa.

¹⁴ Nave enthawi eyo nallapuwalleehu muhinjooyo vaari viviralle khalle miyakha 38 ovenyera mvo navenyilleehu o Kadeshi Baranea. Akhoto attheene yaari ekhwille moollikana ni mmo Apwiya yallupellelliiwa.

¹⁵ Ddawoona, Apwiya yaavirellella waallaka athu attheene a m'misasanimmo ophiyera etthollowille.

¹⁶ “Vano akhoto attheene yatthollowilliiwa,

¹⁷ Apwiya yaakilleella wi,

¹⁸ ‘Ollello muneerovira mu ellapo ya Amowabu vooyeellani ettilla ya o Ari.

¹⁹ Nave mwaphiya vakhuviru ni ellapo ya Aamoni, edduullu dda Loti, muhaahoose apaalle owanana ekhoto vawi alliwaalla kohaavaha ellapwiiweeyo nave nguuvahani naari vang'ono.’

²⁰ “(Echigawo yeella enaromolliwattho wi tti ya Arefaimu kaambiiwa khalle alliwaayo yakhalla mwemmo koma Aamoni yaaromolla wi Azamzumimu.

²¹ Athwaayo yaari amasiva ni anchichi nave yaarittho oorekama wonanko Aanaki. Komave Apwiya yaawoononga nave ellapwiiwa yahaakhiwa ni Aamoni ayo yakeraattheye wenko.

²² Apwiya yaaweerella emoddamoddave yeeyo Aedomu, edduullu dda Esau, ayo yakhalla o Seiri voowoonongani Ahori nave ellapwiiwa yaakusiwa ni Aedomu ayo ekeraattheyille wenko ophiyera ollello.

²³ Avimu yakhalla m'mizi ddittheddene ophiya o Gaza koma ellapwiiwa yahaakhiwa ni athu oovenyera o echilumba ya Kafitori ayo yakeraattheye wenko ewoonongille Avimwaayo.)

²⁴ “Vatulli viwa Apwiya yaallota wi, ‘Vano timullani nave llapuwani muhinje wa Arinoni. Kinuuvahani Sihoni Muamori, mwene a Heshiboni vamodda ni ellapwaayeene.

²⁵ Waambeella ollello kineerekowoopopiha athu a va ellapo yavatthi wi ewoovekeni. Arive muthu iiwa dda nyuwaano aneerotthukumella ni woova ni otathilla murima ekaamba yoowoovani nyuwaano.’ ”

Aisraele enamugonjiha mwene a o Sihoni

²⁶ “Vano kahaarumiha amithenga ovenyera o echipululu ya Kedemoti wi eye wa mwene Sihoni a o Heshiboni wi yallote mawu amurendelle awi,

²⁷ ‘Munaakhullelle wi niweelle mwiillaponi mwanyu vawi ninaathware musewuve oohihapuwella orive weko.

²⁸ Muneerekonikullihella ni makobiri yoocha ni maaddi. Munaakhullelle wi nivire mu echigawaanyu

²⁹ wi nillapuwe muhinje wa Yordani ni ophiya o ellapo eyo Apwiya Mullukwaahu enanivahiiwa. Edduullu dda Esau dda o Edomu ni Amowabu a o Ari yaanaakhullella ovirella mwiillaponi mwiwa.’

³⁰ Koma mwene Sihoni olliyeve khaanaakhullenlle wi nivirelle mwiillaponi mwaye. Apwiya Mullukwaanyu yaamummiha nikohi nave amuvaha murima wawumma wi amuvelleelle m'mattani mwahu wonanko munoonellaanyu ollellova.

³¹ “Vano Apwiya yaakilleella wi, ‘Ngoona kaambeelle khalle wuuvaha mwene Sihoni ni ellapwaayeene. Sika omwaakhe ellapweeyo wi mukhalle mwemmo.’

³² Vaavo Sihoni ni athwaaye yaawa enallipana ni hiyaano vakhuviru ni Yahazi.

³³ Koma Apwiya Mullukwaahu yaamuvelleella m'mattani mwahu nave naamugonjiha olliye ni anaaye vamodda ni athwaaye.

³⁴ Navettho nahaakha ni woononga mizinda ddaye ddittheddene ni owiipha allopwana, atthiyana ni anamwaniine oohimuhiya naari mmodda ookumi.

³⁵ Nahaakha eziweto ni eyuuma dda m'mizindaninnddo wi ddikhalle ddaahu.

³⁶ Ovenyera o muzinda wa Aroere oyo ori mukhwipi mwa ntapo na Arinoni navettho ovenyera o muzinda oyo ori muntaponimmo ophiya o Giliyadi khewaarivo muzinda wa mipanda ddoorekama naari mmodda oyo nahiwukumullalleehu. Apwiya yaavelleella m'mattani mwahu mizinda ddittheddene.

³⁷ Koma o ellapo ya Aamoni khenaavirenllewo monga mukhwipi mwa muhinje wa Yaboki, mizinda dda o ellapo yamiyaango ni orive weko Apwiya Mullukwaahu yanihiihalliiwa oyaawo.”