Deuteronomo 19 - Mawu a Mulluku

Mizinda ddoothawellamo

¹ “Apwiya Mullukwaanyu yawoononga aneena a ellapo eyo enuuvahiiwani nave nyuwaano mwamalliha waakha mizinda ddiwa ni enyumba ddiwa nave mwakeraattheya wenko

^2-3 muyikawe ellapweeyo mu ezigawo ddiraru nave mutthoolle mizinda miraru variyari va erive echigawo. Mupotokosettho misewu ddooya o mizinda ddenndda wi arive muthu oomwiipha mukhwaaye ttuuthawellawo.

⁴ Nndda sika munaphwanelleenyu weera muthu mmodda amwiipha mukhwaaye nave apaalla wi avulluse okumaaye voothawellani wenko. Muthu amwiipha mukhwaaye moohikhalla mwaphudda athawelle o orive muzinda mwa mizinda ddenndda.

⁵ Apaalle ddeereya wi athu eelli yaya ohakani wawuuha miteekho nave moohitiyera ello, mmodda vookakathani muteekho kottokwa ttukhulleya ni omwiipha mukhwaaye. Sika olliyoolla ttuuthawella o mmodda mwa mizinda ddenndda wi avulluwe.

⁶ Vakhalla muzinda mmodda, mutunda oneerorekama wunchichi wi oyo aphwanenlle ohokollosella ddoonanara ttuumuphara muthu oohilakwa ni omwiipha mooshani murima. Vawi muthu oothawooyo amwiiphalle mukhwaaye moohidduwella ohiri ekaamba yawiitanana.

⁷ Sika kinalamula wi mutthoolle mizinda miraru.

^8-9 “Apwiya Mullukwaanyu yaalonjeza wuuvahani ellapo eyo yallupenlliiwa wa makhollwaanyu nyuwaano mwaawiiwellellaka malamulwiiwa mattheene kinawinnyeemini sika wi waakonda alliwa ni weeta mu ettilla ddiwa mallapo mattheene. Ddeereya ddennddo moonjerere mizinda ddimodda miraru.

¹⁰ Mweereke ddenndda wi muhichimwe voowiiphani athu oohilakwa mu ellapo eyo Apwiya Mullukwaanyu enuuvahiiwani wi ekhalle wonanko yoohallanaanyu.

¹¹ “Koma muthu amwiipha mudanaaye mwaphudda nave vatulli viwa athawella o mmodda mwa mizindanndda wi avulluwe,

¹² attekweene a nthato emwiithanihe ovenyera omuzindaninko nave emuvelleelle wa oophwanella omuhokollosella ddoonanara wi iiphiwe.

¹³ Muhimumorelle ethakaraka koma mumuvenyihevo variyari va Aisraele muthu oomwiipha mukhwaaye oohilakwa wi ddeko ddiweetelleni phaama.”

Dda malire akhalle

¹⁴ “Mu yoohallana eyo munaawaakhellenyu mwiillaponi eyo Apwiya Mullukwaanyu enuuvahiiwani, muhisuseke malire a mukhwiinyu ayo yakeraatthihiwe ni makhollo khalle.”

Dda amboni

¹⁵ “Mboni mmodda khanakwakhwanella osimikiza wi muthu oolakwa apaalle wi oottatthamulla mullatu. Koma amboni eelli apaalle araru sika enakwakhwanella osimikiza wi muthooyo oolakwa.

¹⁶ Muthu mmodda amootthera mukhwaaye wi oolakwa,

¹⁷ eellaalla ewe nave yiimelle vamiitthoni va Apwiya, vamiitthoni va allupa mukutho ni aweeruza ayo enaphara mutteko enthawi yeeyo.

¹⁸ Aweeruzaayo emoolleelle phaama mullatooyo nave yaphwanya wi muthooyo tti awoottha nave wi animamootthera mukhwaaye,

¹⁹ emullake voomweerellani yoonanara eyo olliye apaalleeye omweerella mukhwaaye. Vaweerani ddenndda, muneerovenyihavo yoonanara variyari vanyu.

²⁰ Sika athu oohallaayo eneerewiiwa nave eneerewoova wi ehiwe yeera yoonanara wonanko yeella variyari vanyu.

²¹ Muhimumorelle ethakaraka. Ollakiwa waye okhalle wawi okumi olliva okumi, niittho olliva niittho, niino olliva niino, nnatta olliva nnatta nave nnyallo olliva nnyallo.”