Deuteronomo 18 - Mawu a Mulluku

Ddoophwanella waakhella allupa mukutho ni Alevi

¹ Allupa mukutho Aalevi, nlloko nittheene na Levi, ehaakhelle yoohallana variyari va Aisraele. Alliwa echeke ddoovelleella ni mikutho dda Apwiya.

² Ehikhalleke ni yoohallana wonanko malloko ddimodda vawi Apwiya sika yoohallaniiwa moollikana ni mmo yaalonjezelliiwa.

³ Nave ddoophwanella waakhella allupa mukutho ovenyera wa athu ayo enavelleella eng'ombe apaalle enkhosa tti enama ya mweto wamuhoollo, ya m'maramani ni nihu.

⁴ Allupa mukutho yaakhellekettho echigawo yawaamba ya tirigu, ya vinyo, ya makhura a olivi navettho ya obweya.

⁵ Apwiya yahaatthoolla athu a nlloko na Levi variyari va mallokwaanyu mattheene wi ekhalleke vamiitthoni va Apwiya ni orumeyella wa enthawi yoohimalla.

⁶ Arive Mulevi apaalla, ttuuwa o nipuro namallapello nootthoolliwa ni Apwiya ovenyera o orive weko mu Israele nko anakhalleeye.

⁷ Nave wenko ttuuwaarumeyella Apwiya Mullukwaaye wonanko mmo eneerella Alevi amodda attheene.

⁸ Anaphwanella waakhella yoocha moollikana ni allupa mukutho amodda nave ooheerengella eyuuma eyo aakhenlleeye ovenyera o nibanja naye.

Ochenjeza va makhallello a athu a mitundu ddimodda

⁹ Mwavollowa mu ellapo eyo Apwiya Mullukwaanyu enuuvahiiwani, muhithwareke makhallello oonanara a mitundu dda athu a wenko.

^10-11 Variyari vanyu vihikhalle oomuvelleella mwanaye aamullopwana apaalle aamutthiyana vamunlloni wonanko mukutho, awoombesa apaalle oollohella ddamuhoollo apaalle oophariha mutteko manyaka apaalle ezitumwa. Vihiphwanyeyettho ooveka ezeru wa minepa dda athu ookhwa.

¹² Apwiya Mullukwaanyu enniitana ni athu aweera ddenndda sika ekaambiiwa enawiikarelliiwa athwaalla vamiitthoni vanyu.

¹³ Nyuwaano mukhalle oororomelleya wunchichi vamiitthoni va Apwiya Mullukwaanyu.

Lonjezo na orumihiwa wa namallotella

¹⁴ Vano Mose aallota wi, “Mitundu dda athu nnddo munaaddaakheenyu ellapo ddiniiwellella malangizo a amasenga ni awoombesa makhanga. Koma nyu Apwiya Mullukwaanyu khenawaakhullellani weera ddenndda

¹⁵ nave eneerewuurumihellani namallotella wonanko miyaano oovenyera mwa abalaanyu nave mumwiiwellelleke olliye.

¹⁶ “Va nllapo nne mwatthukumanilleenyu va mwaango wa Horebu, mwaaveka wi muhiwiiwettho Apwiya Mullukwaahu ellotaka naari woonattho munllo wawoopiha woova wi muneerokhwa.

¹⁷ Sika Apwiya yaakilleella wi, ‘Ddittheddene ellotilliiwa tti ddawoona.

¹⁸ Kineerewaarumihella namallotella wonanko weyaano oovenyera mwa abaliiwa. Kineeromulleella yawi allote nave olliye aneerewaalleella athu attheene nnddo kinamulamuleemi.

¹⁹ Olliye anaalloteke mu nnddina naka nave miyaano kineeromullaka arive muthu oohiiwellella mawaaka.

²⁰ Koma arive namallotella oollotella mu nnddina naka, miyaano kihimulamunle apaalle oollotella mu nnddina na milluku ddimodda, olliye iiphiweke.’

²¹ “Apaalle ttuukoha wi, ‘Ethiyo ttuudduwella mwawiidde wi mawu a namallotelloolla khenavenyera wa Apwiya?’

²² Muthu allotella mu nnddina na Apwiya nave ddaaheereya, vaavo dduwellani wi mawaayo khenavenyera wa Apwiya. Namallotella yooyo anallotella dda m'muruni mwaye nave muhimoove.”