Deuteronomo 17 - Mawu a Mulluku

¹ “Muhivelleelleke eng'ombe apaalle enkhosa apaalle epuri yoorakalla mukutho wa Apwiya Mullukwaanyu kaambiiwa enniitanana ddenndda.

² “Apaalle mu ellapo eyo Apwiya Mullukwaanyu yuuvahilleewani ttuuphwanyeya mullopwana apaalle mutthiyana mmodda oyo eerille ddoonanara vamiitthoni va Apwiya Mullukwaanyu,

³ nave atathinlle echipangano voollapellani ni orumeyella milluku ddimodda monga nndduwa, mweeri apaalle etheneeri nnddo kahiihalleemi wi ehiddillapelleke.

⁴ Mwiiwa wi ello yawi ddiidda yoheereya, vatulli viwa mwaashaashe ni okohakoha mwawiithaalla dda epilleeyo nave mwaphwanya wi tti yawoona wi ello yoonanareella yoheereya variyari vanyu

⁵ mumuphare mullopwanooyo apaalle mutthiyanooyo nave mumuyeena otte wa mullako wa muzinda nave mumwiiphelle wenko voomuvokhani malluku.

⁶ Muthooyo iiphiweke vaavove vaphwanyeya amboni eelli apaalle araru koma ahiiphiweke ekaamba ya omboni wa muthu mmodda.

⁷ Amboni sika enaambeelleke omuvokha malluku nave vatulli viwa arive muthu amuvokhettho malluku. Sika muvenyihekevo yoonanara variyari vanyu.

⁸ “Vaphwanyeya millatu ddimodda ddookatamiha okamulla ni aweeruzaanyu monga ddawiiphanana, ddawaakanella ddeko apaalle ddoophoriihana m'mizindani ddanyu, muye o nipuro namallapello nootthoolliwa ni Apwiya Mullukwaanyu,

⁹ nave muvelleelle mullatooyo wa allupa mukutho, Alevi ni wa aweeruza oyo anaphara mutteko enthawi yeeyo nave alliwa eneerewuutthopoollellani makamullello a mullatooyo.

¹⁰ Alliwa yakamulla wenko, nyuwaano moonesese wi mweere wonanko mmo yuulangizelliiwani.

¹¹ Mwaakhullelle okamulla wiwanko nave mwaathware malangizo mattheene, oohirukunuwella o nnattanatta apaalle wuunyotthoni.

¹² Arive muthu oohimwiiwellella mullupa mukutho oyo anaarumeyella Apwiya Mullukwaanyu apaalle oohimwiiwellella aweeruza, iiphiwe. Sika muvenyihekevo yoonanara variyari vanyu.

¹³ Sika Aisraele attheene yiiwa ddeereyillennddo eneerewoova nave khaavo oyo anaawe eera yoonanara wonanko yeella variyari vanyu.”

Malangizo a mwene

¹⁴ Mwavollowa ni waakha ellapo eyo Apwiya Mullukwaanyu enuuvaheewani apaalle ttuupaalla wi mukhalle ni mwene wonanko ddikhallelle mitundu ddimodda nnddo ddiwaapheelleni.

¹⁵ Vano mwenooyo anaphwanella akhalle muthu ootthoolliwa ni Apwiya Mullukwaanyu nave akhalle muthu a mutundwaanyu. Nave muhimutthoolle mulleto wi akhalle mwenaanyu vawi olliye khe mbalaanyu.

¹⁶ Mwenooyo ahiddoonjerere akavalo nave ahaarumiheke athu a o Iguputo wi yaakulle akavalo vawi Apwiya yahuulleellani wi muhiwe muhokollweellawo.

¹⁷ Nave mwene ahikhalle ni atthiyana anchichi wi murimaaye ohihollowe navettho ahiddoonjerere siliva ni golide.

¹⁸ Nave muthooyo avollowa omwenooyo alembe mu nibukhu naayenaaye malamulo oollikana ni ayo eri mu nibukhu na malamulo ni ddoohuddiha dda Apwiya nno niri m'mattani mwa allupa mukutho Aalevi.

¹⁹ Nibukhu nenna anisunge nave eerengeke mu mallapo mattheene a okumaaye wi ahuddere owoova Apwiya Mullukwaaye voothwarani moororomelleya ddittheddene ddoolembiwa mu nibukhunimmo.

²⁰ Ddenndda ddineeromukavihera odduwella wi olliye khanaphwanella wiitukhulla variyari va Aisraele navettho iiwellelleke malamulo, oohirukunuwella onnattanatta apaalle wuunyotthoni. Sika wi olliye vamodda ni edduullu ddaye ddene aneerolamulella enthawi yoorekama.