Deuteronomo 15 - Mawu a Mulluku

Muyakha wookhululukella ekongoli

¹ Wamalla orive muyakha waneetthanu ni piilli, mukhululukelleke ekongoli ddanyu ddittheddene.

² Nave okhululukellanko oneereyeke mwawi ddiidda. Arive muthu akhululukelleke erive ello eyo amukongolihalleeye Muisraele mukhwaaye. Sika ahikoheke ekongoli ovenyera wa Muisraele mukhwaaye kaambiiwa Apwiya aalamula wi ekongoleeyo ekhululukelliwe.

³ Ttuukoha ekongoli ovenyera wa mulleto koma ekongoli ya Muisraele mukhwiinyu muyikhululukelleke.

⁴ Khaavo naari mmodda mwa athu a mutundwaanyu oyo anaahoowe (vawi Apwiya Mullukwaanyu eneerewuudalisani mwiillaponi eyo enuuvaheewani wonanko yoohallana)

⁵ mwaawoonesesaka wi munniiwellella mawiiwa ni othwara malamulwiiwa ayo kinawinnyeemini ollello.

⁶ Apwiya eneerewuudalisani moollikana ni mmo yalonjezilliiwa. Muneerokongoliha mitundu ddinchichi koma nyuwaano khamuwa mukongola o orive mutundu. Nave muneerolamulella mitundu ddinchichi koma khamuwa mulamuliwa ni orive mutundu.

⁷ Variyari vanyu vakhalla mukhwiinyu oohoowa mwiillaponi eyo Apwiya Mullukwaanyu enuuvahiiwani, muhummeke murima apaalle omummella matta oohoowooyo.

⁸ Koma moolloweke matta ni omukongoliha moollikana ni mmo anapaallelleeye.

⁹ Muchenjere wi muhiwatteelleke okongoliha ni maganizo oonanara awi muyakha wookhululukella ekongoli ori vakhuviru. Mwaahimoollowella matta mukhwiinyu oohoowa, oohimuvaha ello olliye aneerewuusumellani wa Apwiya vawinllani nave muneerophwanyeya oochimwa.

¹⁰ Mumuvaheke mwawoollowa matta ni moohakallalla nave Apwiya eneerewuudalisani va mitteko ddanyu ddittheddene ni mu ddittheddene muneereenyu.

¹¹ Vawi enthawi ddittheddene vineerekokhalla athu oohoowa variyari vanyu, sika kinuulamulani wi athu yaalla muwoollowelleke matta.

Masungello a akaporo

¹² “Muheberi mukhwiinyu, mullopwana apaalle mutthiyana, iikulliha wa nyuwaano, mumuttaphulleke uurumeyellani miyakha mitthanu ni mmodda. Va muyakha waneetthanu ni piilli, mumuttaphulle wi aroweke mwamurendelle.

¹³ Nave moonesese wi mwamuttaphulla ahiroweke mattave.

¹⁴ Mumuvahewo mwawoollowa matta va ddittheddene nnddo Apwiya yuudalisallenyunani monga enkhosa, tirigu ni vinyo.

¹⁵ Muupuwelleke wi nyuwaano mwaari akaporo o Iguputo nave Apwiya Mullukwaanyu yaawoopollani. Ella sika ekaambiiwa kinawinnyeemini lamulo nenna ollellova.

¹⁶ “Koma kaporooyo aawuukondakani nyuwaano ni nibanja nanyu ekaamba yawi munnakhallana phaama, khapaalla orowa.

¹⁷ Vatulli viwa, amuweena va mullako va enyumba nave amuphovolle naaru ophiyera wi olliye akhalle kaporwaaye okumaaye muttheene. Nave kaporwaanyu aamutthiyana mumweerelleke emoddamoddave yeeyo.

¹⁸ Oohinanariwa voomuttaphullani kaporo vawi olliye ahuurumeyellani va miyakha mitthanu ni mmodda, hafu a mutengo wa mullupa mutteko. Sika Apwiya Mullukwaanyu eneerewuudalisani va mitteko ddanyu ddittheddene.”

Eziweto ddawaamba

¹⁹ “Asaana aallopwana attheene awaamba a eziweto mwaapatulelle wa Apwiya Mullukwaanyu. Eng'ombe ddenndda muhiddipharihe mutteko nave enkhosannddo muhiddicheme obweya.

²⁰ Orive muyakha nyuwaano ni nibanja nanyu mucheke ddenndda vamiitthoni va Apwiya Mullukwaanyu o nipuro namallapello Apwiya enaatthoolliiwa.

²¹ Koma vakhalla ello yoohikhalla phaama va enameeyo monga ottutthunya, ohoona apaalle orakalla, enama yawi ddiiddweeyo muhiyivelleelle mukutho wa Apwiya.

²² Enama ddenndda ttuuddicha m'muzi mwanyu. Attheenenyu, aweellihiwa ni ooripihiwa, ttuucha wonanko munachelleenyu enama ya mphoyo apaalle ya naahe.

²³ Nikhameve na enamannddo muhiche koma munitathillelleke vatthi wonanko maaddi.”