Deuteronomo 14 - Mawu a Mulluku

Winlla maliro woohaakhullelliwa

¹ “Nyu muri athu a Apwiya Mullukwaanyu. Sika vawinllani maliro oohiiremarema apaalle wiichema vayuuchini.

² Nyuwaano moopatulelliwa wa Apwiya Mullukwaanyu vawi yahuutthoollani variyari va mitundu dda athu ddittheddene dda ellapo yavatthi wi mukhalle yoohallaniiwa.”

Enama ddaweellihiwa ni ddooripihiwa

³ Muhicheke erive ello yooripihiwa.

⁴ Enama ddawaakhullelliwa oddicha tti monga eng'ombe, enkhosa, epuri,

⁵ mitundu ddoohiyanahiyana dda naahe, epaalla, mphoyo, namungoma, enyumbu ni embalale.

⁶ Enama ddittheddene ddookhalla ni akokotokwa ookawaneya nave ddoojikulla sika munnaakhullelliweenyu oddicha.

⁷ Koma ddimodda mwa enama variyari va enama ddoojikulla apaalle dda enama dda manyallo ookawaneyannddo, muhiddicheke ekamira,* epilla ni wallullu. Ddenndda tti ddooripihiwa wa nyuwaano kaambiiwa naari ddijikullaka akokotokwiiwa tti oohikawaneya.

⁸ Nave ekumba tti yooripihiwa wa nyuwaano kaambiiwa naari akokotokwiiwa eri ookawaneya khenajikulla. Muhicheke enama ddenndda nave muhiddittannyeke ddakhwa.

⁹ “Ddookumi ddookhalla m'maaddini munaakhullelliweenyu oddicha tti ddittheddene ddookhalla ni miiwa ddoosambilella owaaka makarumbasa.

¹⁰ Koma ddittheddene ddoohikhalla ni miiwa ddoosambilella owaaka makarumbasa, muhiddicheke vawi tti ddooripihiwa.

¹¹ “Munnaakhullelliwa ocha epallame ddittheddene ddaweellihiwa.

^12-18 Koma khamunaakhullelliwa ocha epallame monga mpungu, ephangwi ni nakhuku, neekhwaambe ni orive mutundu wa kuukuru, orive mutundu wa anakhuku, enthiwatiwa, eddiiddi, akakowa ni orive mutundu wa neekhwaambe, maarwe, echiswankhono, namame, sekhwe, kuukuru amanyaka, ephangwi dda mutundu mung'onong'ono, nasekwa, makokoko ni amullema.

¹⁹ “Nave ddoovava ddittheddene nnddo ddihiri epallame tti ddooripihiwa, sika muhiddicheke ddennddo.

²⁰ Koma munnaakhullelliwa ocha ddoovava ddittheddene nnddo ddiri ddaweellihiwa.

²¹ “Muhicheke erive enama yookhwa weekhiiwa. Koma ttuuwaavaha alleto ookhalla variyari vanyu wi eche apaalle ttuukulliha wa alleto amodda. Valle nyuwaano moopatulelliwa wa Apwiya Mullukwaanyu. “Muhaapeyeke enama ya musaana a epuri apaalle a enkhosa voopharihellani mutteko mukaka wa amennya.”

Yaneekhumi

²² “Muyipatuleke yaneekhumi ya emodda mwa ezigawo khumi ya ddoohata ddanyu dda vamuyakhani.

²³ Vatulli viwa muye mwakhalle va nipuro nimodda nno Apwiya Mullukwaanyu yaatthoollilliiwa. Nave ezigawo ddittheddenenndda dda tirigu, vinyo ni makhura a olivi vamodda ni dda anamwani awaamba a eziweto muchelle vamiitthoni va Apwiya Mullukwaanyu. Mweereke ddenndda wi muhuddere owoova Apwiya Mullukwaanyu enthawi ddittheddene.

²⁴ Nipuro namallapello nno Apwiya Mullukwaanyu yatthoollilliiwa narekamella wi khamuwora owaana yaneekhumi ya ddoohata ddanyu nnddo tti madaliso a Apwiya Mullukwaanyu,

²⁵ vano mukullihe yaneekhumeeyo nave muyeena makobiraayo o nipuro namallapello.

²⁶ Wenko makobiraayo mukullelle erive ello munapaalleenyu monga enama ya eng'ombe, enama ya enkhosa, vinyo navettho ddoowirya ddoowalli. Sika nyuwaano ni mabanjaanyu muche ni ohakallalla vamiitthoni va Apwiya Mullukwaanyu.

²⁷ “Koma muhaatiwalle Alevi ayo munakhalleenyuna m'muzi mwanyu vawi alliwa khenna yoohallaniiwa.

²⁸ Orive muyakha waneeraru muweekena ddaneekhumi dda ddoohata ddanyu dda muyakha yooyo nave muddisungeke vamodda m'muzi mwanyu.

²⁹ Yoocha yeella tti ya Alevi vawi alliwa khenna ellapo wonanko yoohallaniiwa. Navettho tti ya alleto, ya akhwaadduni ni anaamukhwelle ayo enakhalla m'muzi mwanyu. Athu yaalla eweeke ni okusa ddoorama ddiwa. Mweereke ddenndda wi Apwiya Mullukwaanyu yuudalisekeni va mitteko ddanyu ddittheddene.”