Deuteronomo 13 - Mawu a Mulluku

¹ Namallotella apaalle oottaphullella olloha aphwanyeya variyari vanyu nave awoonihani echizindikiro apaalle yoottikhiniha,

² nave echizindikirweeyo apaalle yoottikhiniheeyo yeereya, olliye uulleellani wi mullapelle milluku ddimodda nnddo muhinallapellekeenyu ovenyera khalle,

³ nyuwaano muhiiwellelle ddennddo vawi Apwiya Mullukwaanyu enapaalla eweeseni wi yoone mwaarimi mwaakondaka ni okumaanyu muttheene.

⁴ Mwaathwareke Apwiya Mullukwaanyu, muwooveke, musungeke malamulwiiwa wiiwellella mawiiwa, mwaarumeyelleke ni waawanddeellella alliwa.

⁵ Koma mumwiipheke arive namallotella apaalle arive oottaphullella olloha oyo anuulleellani wi mwaawukile ni oweerihani wi muhiye ettilla dda Apwiya Mullukwaanyu ayo yuukhumihalleni o Iguputo ni owoopollani o ellapo ya okaporo. Sika muvenyihekevo yoonanara variyari vanyu.

⁶ Muthu ttuuwora wuullekani mwawiipittha wi mullapelle milluku ddimodda nnddo nyuwaano ni makhollwaanyu muhinaddillapellekeenyu. Naari muthooyo ari mbalaanyu awaamwana nipelle nimodda apaalle mwaninyu aamullopwana apaalle aamutthiyana apaalle mwaarinyu a vamurimani apaalle mukhwiinyu a vamurimani, muhillapelle millukunnddo naari vang'ono.

⁷ Milluku ddene apaalle ttuukhalla dda athu awaatamanana apaalle dda oorekamellana.

⁸ Nyuwaano muhikuseye murima apaalle omwiiwellella olliyooyo. Muhimweerelle echifundo apaalle ommoriwella ethakaraka navettho muhimwaakihere,

⁹ koma ddawoona mumwiiphe. Mwaambe nyuwaano ovokha malluku nave vatulli viwa arive muthu amuvokhettho malluku.

¹⁰ Mumwiiphe ni malluku ekaamba yawi olliye apaalla wuuhollosani wi muhiyane ni Apwiya Mullukwaanyu ayo yuukhumihalleni o Iguputo ni owoopollani o ellapo ya okaporo.

¹¹ Sika Aisraele attheene yiiwa ddeereyillennddo eneerewoova nave khaavo oyo anaakullelle weera yoonanara wonanko yeella variyari vanyu.

¹² Mwaakhalla m'mapuroni ayo Apwiya Mullukwaanyu enuuvahiiwani, enthawi emodda ttuuwiiwa

¹³ wi athu amodda oonanara amutundwaanyu yohaahollosa athu a mapuro mamodda vawaallapelliha milluku nnddo nyuwaano muhinaddillapellekeenyu waambeella khalle.

¹⁴ Vatulli viwa mwaashaashe ni okohakoha mwawiithaalla dda epilleeyo nave mwaphwanya wi tti yawoona wi ello yoonanareella yoheereya variyari vanyu,

¹⁵ vaavo muwiiphe ni nsupada athu attheene a munipuroninno ni eziweto ddene.

¹⁶ Mutthukumanihe ddawaakha ddittheddene dda athu a munipuronimmo nave muukelle variyari va nthato nuullupalli. Nave mushellellihe nipuronno vamodda ni ddittheddene ddookhalla mwemmo wi ddikhalle wonanko mukutho wooshellelliha wa Apwiya Mullukwaanyu. Nipuronno nikhalle ntepe wa enthawi yoohimalla nave vihiwe vimakiwattho.

¹⁷ Muhiphare erive ello yoophwanella woonongiwa wi Apwiya ehuushellenittho murima koma yuumorelleni ethakaraka nave eweerelleni echifundo ni owaatihani moollikana ni mmo yallupenlliiwa wa makhollwaanyu.

¹⁸ Eneeroweerellani ddenndda, mwaaweeraka ddoolungama vamiitthoni viwa nave mwaawiiwellellaka Apwiya Mullukwaanyu nave mwaasungaka malamulwiiwa kinawinnyeemini ollello.