Deuteronomo 12 - Mawu a Mulluku

Nipuro naweella nikhalle nimodda

¹ “Alla sika malamulo ni malangizo awi muchenjerena owiiwellella mallapo mattheene a okumaanyu mu ellapo eyo Apwiya Mulluku a makhollwaanyu enuuvaheewani wi mwaakhe.

² Mutthollose mapuro mattheene, mitundu ddimodda dda athu nnddo munaaddaakheenyu ellapo, ddinallapelliiwamo milluku ddiwa va miyaango ni va asimiyaango navettho vatthi va miteekho ddoovattha.

³ Mwakumulle makuwiiwa ni woononga mallukwiiwa oopatuleya. Mwawoose mafanwiiwa a Asherimu nave mwapwaramwase mafanwiiwa oosema navettho mwathiimihe manddina a millukunnddo orive weko.

⁴ “Muhaallapelleke Apwiya Mullukwaanyu wonanko mmo eneerella athu yaalla voollapellani milluku ddiwa.

⁵ Apwiya eneerotthoolla nipuro nimodda mwiillaponi mwanyu wi ekeraatthihemo nnddina niwa nave athu attheene eneerekollapella va nipuro nenno. Wenko muneeroyaawo

⁶ wi mwavelleelleke mikutho ddanyu ddooshellelliha, mikutho ddanyu ddimodda, ddoovelleella ddanyu ddaneekhumi, ddoovelleella dda opaalla wanyu, ddoovelleella ddoollupella, emphaso ddanyu ni ddoovelleella dda anamwani awaamba a eziweto.

⁷ Wenkottho nyuwaano ni mabanjaanyu muneerocha ni ohakallalla vamiitthoni va Apwiya Mullukwaanyu ekaamba ya madaliso ayo yuuvahilleewani wi mitteko ddanyu ddittheddene ddeete phaama.

⁸ “Muheereke wonanko hiyaano nineerelleehu ollellova mvo arive muthu aneereeye ddoomuddivella yeekha

⁹ vawi khemunavolloweve mu ellapo eyo Apwiya Mullukwaanyu enuuvahiiwani wi ekhalle wonanko yoohallanaanyu ni okhallamo mwamurendelle.

¹⁰ Mwallapuwa muhinje wa Yordani, Apwiya Mullukwaanyu eneerowaakhullellani okhalla mu ellapo eyo enuuvahiiwani wonanko yoohallanaanyu. Eneerowakiherani wa adanaanyu attheene wi mukhalle mwamurendelle.

¹¹ Sika Apwiya eneerotthoolla nipuro noollapellavo wi ekeraatthihevo nnddina niwa nave muneerekowaana wenko ddittheddene kuulamulalleemini monga mikutho ddanyu ddooshellelliha, mikutho ddanyu ddimodda, ddoovelleella ddanyu ddaneekhumi, ddoovelleella ddoohiwatiheriwa navettho ddoovelleella ddanyu ddoollupella.

¹² Sika muneerohakallalla vamiitthoni viwa, nyuwaano, aniinyu aallopwana ni aatthiyana, allupa muttekwaanyu aallopwana ni aatthiyana ni Alevi ayo enakhalla variyari vanyu vawi khenna yoohallaniiwa.

¹³ Onesesani wi muhivelleelleke mikutho virive veko.

¹⁴ Koma mwavelleelleke mikuthonnddo va nipuro nimoddave nno Apwiya eneeriiwa etthoolle mwiillaponi mwanyu. Mwavelleelleke mikutho ddanyu va nipuro nennove nave wenkottho mweereke ddimodda ddittheddene kinuulamuleemini.

¹⁵ “Komave ttuuwiipha ni ocha enama owaninyu. Mucheke wonanko munapaallellaanyu moollikana ni madaliso ayo Apwiya Mullukwaanyu yuuvahilleewani. Attheenenyu, aweellihiwa ni ooripihiwa, ttuucha wonanko munachelleenyu enama ya mphoyo apaalle ya naahe.

¹⁶ Nikhameve na enammanndo muhinicheke koma munitathillelleke vatthi wonanko maaddi.

¹⁷ Muhicheke m'mizi ddanyu yaneekhumi ya tirigwaanyu, ya vinywaanyu apaalle ya makhuraanyu a olivi. Wenkottho muhicheke erive ello eyo muvelleelleenyu wa Apwiya monga anamwani awaamba a eziweto ddanyu, ddoovelleella ddanyu ddoollupella, ddoovelleella dda opaalla wanyu apaalle emphaso ddanyu nnddo mulonjezilleenyu ovelleella wa Apwiya.

¹⁸ Nyuwaano, aniinyu aallopwana ni aatthiyana, allupa muttekwaanyu aallopwana ni aatthiyana ni Alevi ookhalla m'mizi ddanyu, mwacheke ddoovelleella ddittheddenenndda vamiitthoni va Apwiya Mullukwaanyu va nipuro nimodda nno Apwiya Mullukwaanyu enaatthoolliiwa. Wenkottho mwahakallalleke vamiitthoni va Apwiya Mullukwaanyu ekaamba ya mitteko ddanyu ddittheddene.

¹⁹ Onesesani wi mallapo mattheene a okumaanyu munaakhallekeenyu mwiillaponimmo, muhaatiwalleke Alevi.

²⁰ “Apwiya Mullukwaanyu yunnuwiha echigawaanyu moollikana ni mmo yuulonjezelliiwani nave mwakhalla ni ekhwillu, muneerovona enama wonanko munaapaallelleenyu.

²¹ Nipuro nno Apwiya Mullukwaanyu enaatthoolliiwa narekamella, ttuuwiipha erive echiwetwaanyu eyo Apwiya yuuvahilliiwani nave ttuuyicha m'muzi mwanyu mmo munapaallelleenyu moollikana ni mmo kuulleelleemini.

²² Attheenenyu, aweellihiwa ni ooripihiwa, ttuucha wonanko munachelleenyu enama ya mphoyo apaalle ya naahe.

²³ Nikhameve muhicheke vamodda ni enameeyo kaambiiwa okumi okonne munikhameni, sika nyuwaano muhicheke nikhamenno vamodda ni enameeyo.

²⁴ Nikhame niwa muhicheke koma munitathillelleke vatthi wonanko maaddi.

²⁵ Sika muhicheke nikhamenno wi ddiweetelleni phaama nyuwaano vamodda ni edduullu ddanyu ekaamba yaweera ddoolungama vamiitthoni va Apwiya.

²⁶ Ddoovelleella ddanyu nnddo mwaapatulelleenyu Apwiya ni emphaso ddanyu nnddo mwallupenlleenyu, ddittheddenennddo muyeena wa Apwiya va nipuro nno enaatthoolliiwa.

²⁷ Wenko mwavelleelle mikutho ddooshellelliha, enama vamodda ni nikhame nene va nikuwa na Apwiya. Nikhamenno muniithelle waapheella nikuwa na Apwiya Mullukwaanyu koma enameeyo ttuuyicha.

²⁸ Muchenjere wi mwiiwellelle mawu mattheene kuulamulalleemini vaweerani ddaphaama ni ddoolungama vamiitthoni va Apwiya Mullukwaanyu wi ddiweetelleni phaama nyuwaano vamodda ni edduullu ddanyu.”

Ochenjeziwa o ollapella mafano

²⁹ “Apwiya Mullukwaanyu eneerewoononga mitundu ddimodda dda athu munaawaakheenyu ellapwiiwa nave nyuwaano muneerokeraattheya mwiillaponimmo.

³⁰ Apwiya yoononga mitundunnddo nyuwaano muhinaphiyewo, moonesese wi murimaanyu ohikuseye ni mallapellwiiwa. Muhaaheye okoha dda milluku ddiwa wi, ‘Ethiyo mitundu ddenndda ddallapella mwawiidde milluku ddiwa wi hiyaanottho neere emoddamoddave?’

³¹ Muhaallapelleke Apwiya Mullukwaanyu, moophwanaphwana ni mmo alliwa enallapellelliiwa milluku ddiwannddo. Alliwa enneera ddoonanara ddawoopiha ddinchichi ddawiitana ni Apwiya vawi ennaashellelliha aniiwa aallopwana ni aatthiyana vamunlloni vawaavelleellani wa milluku ddiwa.

³² Moonesese wi mweere ddittheddene kinuulamuleemininndda nave muhoonjererevo apaalle ovukullavo ello.”