Deuteronomo 11 - Mawu a Mulluku

Wunnuwa wa Apwiya

¹ “Mwaakondeke Apwiya Mullukwaanyu nave enthawi ddittheddene mwiiwellelleke malamulo ni malangizwiiwa mattheene.

² Upuwellani wi khe aniinyu koma nyuwaano sika mwadduwenlle ni woona ddakhalle ddittheddene dda Apwiya Mullukwaanyu, wunnuwa wiwa, masiviiwa muullupalli, ekophollo ddiwa,

³ ezizindikiro ni ddoottikhiniha nnddo yeerilliiwa mu Iguputo voollipanani ni Farao mwene vamodda ni ellapwaaye ettheene.

⁴ Mwahoona nnddo yeerilliiwa voollipanani ni akhoto a o Iguputo navettho ni akavalwiiwa ni magaretiiwa mvo alliwa yawiikariiwani nyuwaano. Mwahoonattho mmo Apwiya yalamulelliiwa maaddi a Enyanja Yoofiira wi yaamirye ni owiipha attheene.

⁵ Mwahoonattho ddittheddene nnddo Apwiya yaweerelliiwani muchipululuni mulle muhinaphiye wuno.

⁶ Mwahoonattho nnddo Apwiya yaweerelliiwa Datani ni Abiramu, anamwani a Eliyabu, a nlloko na Rubeni. Ethaya yahaatthama yaamirya athwaayo vamodda ni mabanjiiwa, misasa ddiwa ni eziweto ddiwa ddene Aisraele attheene yoonaka.

⁷ Ddawoona, mwahoona ni miitthwaanyu dduullupalli ddittheddene Apwiya yeerilliiwa.”

Madaliso mu ellapo yamalonjezo

⁸ “Sika mwiiwellelleke malamulo mattheene kawinnyalleemini ollellova wi mukhalle amasiva wi muvollowe ni waakha ellapweeyo mumullapuwalle Yordani.

⁹ Muneerokhalla ni okumi wawaata mu ellapo yamukaka ni enwi eyo Apwiya yallupenlliiwa wi eneerewaavaha makhollwaanyu ni edduullu ddiwa.

¹⁰ Ellapo munaakhallemweenyweeyo tti yookhwaranya ellapo ya Iguputo nko mwavenyereenyu. Vawi weewulle mwamidda mmiddwaanyu mwakhallella ohellellave.

¹¹ Koma ellapo munaavollowemweenyweeyo tti yamiyaango ni yamatapo nave yoohellelliwa ni murimu.

¹² Apwiya Mullukwaanyu sika enayipwatha ellapo yeeyo ni oyiwehera muyakha muttheene moohihiyerera.

¹³ “Sika vano mwiiwellelleke malamulo kiwinnyalleemini ollellova wi mwaakondeke Apwiya Mullukwaanyu ni waarumeyella ni okumaanyu muttheene.

¹⁴ Nave alliwa sika enaamurupiheke murimu mwiillaponi mwanyu enthawi yaphaama monga murimu awaamba ni murimu oomallihella wi mukhalleke ni tirigwaanyu, vinywaanyu navettho makhuraanyu.

¹⁵ Eneerekomelliha manasi awi eng'ombe ddanyu ddicheke navettho nyuwaano muneerekokhalla ni yoocha nave muneerekovona.

¹⁶ Muchenjere nave muhikuseye murima ni orukunuwella wa milluku ddimodda wi muddillapelleke ni oddirumeyella

¹⁷ kaambiiwa Apwiya eneerewuushellani murima, eneerowiimanani murimu nave ethaya eneerewumma sika khamuhataka ddeko. Nave muneerewoonongeya mwawaakuva mwiillaponi yamukaka ni enwi eyo Apwiya enuuvahiiwani.

¹⁸ “Malamulo yaalla mwaasungeke phaama m'murimani mwanyu ni m'maganizoni mwanyu. Nave mwaamakellelleke wonanko echizindikiro va miwono ddanyu nave mwaahiyeke variyari va eyuuchi.

¹⁹ Mwaahuddiheke aniinyu ni ollota wiilliwiilli dda malamulwaalla mwakhalla owaninyu, mwakhalla voolendoni, vookonaatthini apaalle voovenyani.

²⁰ Nave mwaalembe va eferemu dda enyumba ddanyu ni va eferemu dda mipanda ddanyu.

²¹ Mwawi ddiiddo nyuwaano ni aniinyu muneerokhalla ni okumi wawaata mwiillaponi eyo Apwiya Mullukwaanyu yallupenlliiwa wi eneerewaavaha makhollwaanyu. Muneerokhalla mwemmo ophiyera mmo onaakhallelle ollekella wa oddullu ni ellapo yavatthi.

²² “Muchenjere wi mweereke ddittheddene malamulo mattheene kiwinnyalleemini wi mwaakondeke Apwiya Mullukwaanyu, weeta mu ettilla ddiwa ddittheddene ni owummellella alliwa.

²³ Sika nyuwaano mwaayaakawo Apwiya eneerewiikara mitundu ddenndda vahoollo vanyu nave muneerewaakha ellapo ya mitundu dda athu uullupalli ni amasiva okhwaranya nyuwaano.

²⁴ Virive veko vinaanyingalle nnyallo nanyu vinaakhalle vaanyu. Ellapwaanyu enaambeelle o echipululu omwera, ophiya o mwaango wa Lebanoni ompoto navettho waambeella o muhinje wa Yufurate wookhuma nndduwa, ophiya o Enyanja Yuullupalli woovollowa nndduwa.

²⁵ Khaavo anaawore wuuhiihani nave muneerowoononga attheene. Virive veko vinaanyingalle nnyallo nanyu mwiillaponi yeeyo, athu eneerekowoovani moollikana ni mmo Apwiya Mullukwaanyu ulonjezelliiwani wi aneerowoopopiha athwaayo.

²⁶ “Ollello kinawinnyani ddeko piilli wi mutthoollevo, madaliso apaalle matembelelo.

²⁷ Madaliso, mwawiiwellellaka malamulo a Apwiya Mullukwaanyu ayo kinawinnyeemini ollellova.

²⁸ Koma matembelelo, mwaahiiwellellaka malamulwaalla nave mwahiya ettilla eyo kinuulamuleemini ollello ni orukunuwella wa milluku ddimodda ni oddillapella, milluku nnddo khalle mwahiddidduwenlleenyu.

²⁹ Apwiya yuuvollochihani mu ellapo eyo munaawaakheenyu, mwallalleye madaliswaalla muri va mwaango wa Gerizimu nave mwallalleye matembelelwaalla muri va mwaango wa Ebala.

³⁰ Miyaango miillinndda ddiri woovollowa nndduwa okhopella wa Yordani, mu ellapo ya Akanani ayo enakhalla mu ntapo na Yordani, vakhuviru ni miteekho dda muthundu dda o More, owehana ni Giligala.

³¹ Muhanlle vakhuviru omullapuwa Yordani ni waakha ellapo eyo Apwiya Mullukwaanyu enuuvahiiwani. Mwaakha ellapweeyo ni okhallamo,

³² muchenjere wi mwiiwellelleke malamulo ni malangizo mattheene ayo kinawinnyeemini ollello.”