Deuteronomo 10 - Mawu a Mulluku

Mose anaakhella malamulo waneepiilli

¹ “Enthawi yeeyo Apwiya yaakilleellattho wi, ‘Oseme malluku meelli wonanko awaambaalle nave opange nibokosi namuteekho wi ohiyekemo mallukwaayo, weeddiiddo owelle omwaangoni wa miyaano.

² Sika va malluku yaalla kineerolembavo nnddo kalembilleemi va malluku awaamba waapwesilleewaalle nave ohiye malluku yaalla munibokosinimmo.’

³ “Sika kaapanga nibokosi na matabwa akesha nave kaasema malluku meelli wonanko awaambaalle navettho kaawellana vamwaangoni.

⁴ Nave Apwiya yaalemba vamallukunimvo mawu wonanko yaalembilliiwa vawaambaalle nave yaakinnya mallukwaayo. Alla yaari malamulo khumi yawinnyalleewani mvo yallotilliiwa ni nyuwaano eri m'munlloni va nllapo nne mwatthukumanilleenyu attheene vamwaangoni.

⁵ Nave miyaano kaahokollowa omwaangoninko. Sika moollikana ni mmo Apwiya yalamulelliiwa kaahiya mallukwaayo mu nibokosi nno kapangilleemi nave eri mwemmo ophiyera ollello.

⁶ “(Aisraele yaavenyawo o Beeroti Bene Yaakani, eya o Mosera. Aroni akhwelle ni ovitthiwa wenko nave mwanaye Eleazara sika avollowille munipuroni mwaye akhalle mullupa mukutho.

⁷ Ovenyera wenko Aisraele yaaya o Gudigoda ekhwaranyella o Yotibata, ellapo ya mihinje dda maaddi manchichi.

⁸ Enthawi yeeyo Apwiya yahaatthoolla athu a nlloko na Levi wi etukhulleke nibokosi na echipangano, ekhalleke vamiitthoni va Apwiya ni orumeyella navettho wi yaadaliseke athu mu nnddina na Apwiya. Alliwa sika eneera ddenndda ophiyera ollello.

⁹ Ella sika ekaambiiwa nlloko na Levi khenaakhellille yoohallana wonanko yeerelle malloko mamoddaalle. Apwiya sika yoohallaniiwa moollikana ni mmo Apwiya Mullukwaanyu yaalonjezelliiwa.)

¹⁰ “Miyaano kaakhalla vamwaangonimvo mallapo 40, otthaana ni mahiiyu, wonanko mmo keerilleemi enthawi yawaambeelle. Apwiya yaakiiwellellattho enthawi yeella nave yahaakhullella wi ehiwoonongeni.

¹¹ Sika yaakilleella wi kithaanane ni wuuhoollellani nyuwaano wi vawi ddiiddo muvollowe ni waakha ellapo eyo yallupenlliiwa wi eneerewaavaha makhollwaanyu.”

Ddoopaalla dda Mulluku

¹² “Vano nyu Aisraele, ngiiwani nnddo Apwiya Mullukwaanyu enuulleelliiwani wi muwooveke ni weeta ettilla ddiwa ddittheddene, mwaakondeke nave mwaarumeyelleke ni murimaanyu muttheene ni okumaanyu muttheene.

¹³ Mwiiwellelleke malamulo ni malangizo mattheene a Apwiya ayo kinuulamuleemini ollellova wi ddeko ddiweetellekeni phaama.

¹⁴ Ngoonani, oddullu ni ddittheddene ddiri wenko, ellapo yavatthi ni ddittheddene ddiri mwemmo tti dda Apwiya Mullukwaanyu.

¹⁵ Komave Apwiya yahaakondesesa makhollwaanyu vawi munipuroni mwawaatthoolla athu amodda, yaatthoolla edduullu dda makhollwaanyu, sika wi nyuwaano, ophiyera ollello.

¹⁶ Sika vano muphadde m'murimani mwanyu nave muhiye wumma murima.

¹⁷ Vawi Apwiya Mullukwaanyu tti ookhwaranya milluku ddittheddene navettho tti owaakhwaranya apwiya attheene. Alliwa tti uullupalli, amasiva ni awoopiha, khenaweha ekhove nave khenaakhella ddamukaphwani.

¹⁸ Ennaweeruzella phaama akhwaadduni ni anaamukhwelle nave ennaakonda alleto vawaavahani yoocha ni yoowara.

¹⁹ Sika mwaakondeke alleto vawi nyuwaano mwakhalla alleto o Iguputo.

²⁰ Muwooveke Apwiya Mullukwaanyu ni waallapella yaayove ni owummellella nave mullupelleke mu nnddina niwave. Mukhalleke oororomelleya vamiitthoni viwa nave mullupelleke mu nnddina niwave.

²¹ Vawi alliwa sika ntitimiho nanyu, Mullukwaanyu oyo aweerelleni dduullupalli ni ddawoopiha ddittheddenenndda moonilleenyu ni miitthwaanyu.

²² Makhollwaanyu ayo yayiille o Iguputo yaarivo 70. Koma vano Apwiya Mullukwaanyu aawaatihani ophiyera muri wonanko etheneeri ddooddullu.”