Deuteronomo 1 - Mawu a Mulluku

Mose anaatthopoollella dda olendo muchipululuni

¹ Alla sika mawu ayo Mose aalleelleeye Aisraele mvo yaariiwa muchipululuni wookhuma nndduwa wa muhinje wa Yordani, mu ntapo na Araba owehana ni Sufu, variyari va Parani ekhopella emodda ni Tofele, Labani, Hazeroti ni Dizahabu ekhopella emoddattho.

² (Ovenyera o Horebu oya o Kadeshi Baranea, oweella ettilla ya mwaango wa Seiri tti olendo wa mallapo khumi ni nimodda.)

³ Va nllapo nawaamba na mweeri wa khumi ni mmodda muyakha wa 40 waambeella mvo Aisraele yakhumalliiwa mu ellapo ya Iguputo, Mose ahaalleella ddittheddene nnddo Apwiya yamulamulalliiwa.

⁴ Ddenndda ddeereyille Mose amugonjihalle khalle Sihoni mwene a Aamori oyo alamulella o Heshiboni ni Ogi mwene a o Bashani oyo alamulella o Ashitaroti ni o Ederei.

⁵ Mose ahaamba waatthopoollella athu malamulwaalla wookhuma nndduwa wa Yordani mu ellapo ya Mowabu. Sika aallota wi,

⁶ “Naariihu o mwaango wa Horebu Apwiya Mullukwaahu yaallota ni hiyaano wi, ‘Nyuwaano moollekellesesa omwaangoni wuno.

⁷ Timullani muye o ellapo yamiyaango ya Aamori ni otthewene nko onakhalla akhwiiwa a Aamoraayo monga o ntapo na Araba, o miyaango ni o ntapo, ohito ni omwera, mukhwipi mwa Enyanja Yuullupalli, o ellapo ya Akanani ni Alebanoni ophiya o muhinje muullupalli wa Yufurate.

⁸ Ettheeneella sika ellapo eyo kinayivelleelleemi wa nyuwaano. Muvollowe ni waakha ellapo eyo mi Apwiya Mullukwaanyu kallupenlleemi wi kineerewaavaha makhollwaanyu, Abrahamu, Isaki ni Yakobo ni edduullu ddiwa ddittheddene.’ ”

Mose anaatthoolla aweeruza

⁹ Mose aallotattho ni athu wi, “Ngiwora okhallana meekha odindo wawuuhoollellani.

¹⁰ Apwiya Mullukwaanyu yaawaatihani ophiyera vano muri wonanko etheneeri ddooddullu.

¹¹ Apwiya Mulluku a makhollwaanyu eruuwihe wunchichi echiwerengerwaanyu nave yuudaliseni moollikana ni mmo yalonjezelliiwa.

¹² Ethiyo kinaawore meekha mwawiidde wiireya ollemella wanyu, ddookatamiha ddanyu ni okangana wanyu?

¹³ Atthoolleni athu amodda eezeru, awiiwesesa ni oodduwanyeya phaama ovenyera o nirive nlloko nave miyaano kineerewaakeraatthiha wi ekhalle oohoollella variyari vanyu.

¹⁴ Nave nyuwaano mwaakaakhulla wi, ‘Nndda mullotilleenyu tti ddaphaama nave hiyaano nineereweera.’

¹⁵ Sika kahaatthoolla oohoollellaanyu, athu eezeru ni oodduwanyeya phaama. Nave kahaakeraatthiha wi ewehereke amodda a milloko dda athu 1,000, amodda a milloko dda athu 100, amodda a milloko dda athu 50 nave amoddattho a milloko dda athu khumi. Amoddattho kahaatthoolla wi ekhalle enduna variyari vanyu.

¹⁶ “Va enthawi yeelle kahaalangiza aweeruzaanywaayo wi, ‘Mwiiweke millatu nnddo ddiri variyari va athwaanyu. Muweeruzeke phaama orive mullatu, khaya wa athu a mutundwaanyu apaalle wa alleto ayo enakhalla variyari vanyu.

¹⁷ Muhiweheke ekhove vaweeruzani arive muthu, khaya muthu shisha apaalle oodduwanyeya, mumweeruze moollikana. Muhimooveke arive muthu kaambiiwa erive echiweeruzo tti wa Mulluku. Mullatu mmodda wuukatamihani, muweekena wa miyaano wi kiwukamulle.’

¹⁸ Enthawi yeeyo kahuulleellani ddittheddene ddoophwanella wi mweereke.”

Dda oozonda oorumiwa ovenyera o Kadeshi Baranea

¹⁹ “Valle naheera nnddo Apwiya Mullukwaahu yanilamulalliiwa. Naavenyawo o mwaango wa Horebu nave naavirella mu echipululu yuullupalli ni yawoopiheelle vooyaani o ellapo yamiyaango ya Aamori. Naphiyalleehu o Kadeshi Baranea,

²⁰ kahuulleellani wi, ‘Ngoonani, vano noophiya o ellapo yamiyaango ya Aamori eyo Apwiya Mullukwaahu a makhollwaahu ananivaheeye.

²¹ Ellapweene tti yeella eyo Apwiya Mulluku enuuvaheewani. Khaweni mwaakhe moollikana ni mmo yuulamulelleewani. Muhoove apaalle otathilla murima.’

²² “Koma mwaawa wa miyaano nave mwaallota wi, ‘Hankoni naarume athu wi yazonde ellapweeyo nave vatulli viwa enilleelle ettilla yaphaama yawi nivirelle nave enitthopoollelle mmo ddikhallelle mizinda dda wenko.’

²³ “Kahoona wi mawaayo yaari aphaama weera, sika kahaatthoolla allopwana khumi ni eelli, mmodda ovenyera mu nirive nlloko.

²⁴ Alliwaayo yaatimulla olendo wa o ellapo yamiyaangweeyo, ophiya o ntapo na Eshikolo nave yaazonda ellapweeyo.

²⁵ Yaahokollowa ekusalle ezipaso nave yaaphiyana vamiitthoni vahu enilleella wi, ‘Ellapo eyo Apwiya Mullukwaahu enanivahiiwa tti ya ethaya yaphaama.’

²⁶ “Koma mwaawukila olamulello wa Apwiya Mullukwaanyu kaambiiwa khamwaapanlle oyaawo.

²⁷ Nyuwaano mwakhallella okhupanya m'misasani ddanyu voollotani wi, ‘Apwiya ennaniita hiyaano. Sika ekaambiiwa yanikhumihalliiwa o ellapo ya Iguputo, enivelleella m'mattani mwa Aamori wi eniiphe.

²⁸ Ethiyo ninaaphwanye ellapo yawiidde wenko? Abalaahu naarumalleehwaalle yaaniriiryiha mwiilli wi athwaayo tti amasiva ni oorekama onikhwaranya hiyaano. Eniwattho mizinda ddiwa tti dduullupalli, dda mipanda ddoorekama. Navettho eniwa wenko yaawoonawo athu uullupalli ni oorekama, edduullu dda Anaki.’

²⁹ “Koma miyaano kahuulleellani wi, ‘Muhiwoove athu yaayo.

³⁰ Apwiya Mullukwaanyu ayo enuuhoollellani nyuwaano eneerowana ekhoto munipuroni mwanyu wonanko moonelleenyu o Iguputo wulle

³¹ ni muchipululuni mulle. Nyuwaano mwahoona mmo yuuphiyihalleewani wuno mu ettilla ettheene nave wi yahuuweherani wonanko mmo muthu anamutukhullelleeye mwaana.’

³² Koma naari ddeereyille ddittheddenennddo, nyuwaano khemwaakhulupililalle Apwiya Mullukwaanyu

³³ ayo enthawi ddittheddene yahoolla va olendwaanyu wi yuuphwanyelleni khalleve nipuro nootthipellavo misasa ddanyu. Alliwa yaanuuhoollellani mwawooneya wonanko munllo mahiiyu nave wonanko murapo otthaana.”

Apwiya enaallaka Aisraele

³⁴ “Nave Apwiya yiiwalliiwa okhupanya wanyunko yaasha murima nave sika yaallupella wi,

³⁵ ‘Khaavo naari mmodda a mbado woonanaroolla oyo anaavollowe mu ellapo yaphaama eyo kallupenlleemi wi kineerewaavaha makhollwaanyu.

³⁶ Koma Kalebeve, mwaana a Yefune, sika anaavollowemo kaambiiwa olliye aakhalla oororomelleya vamiitthoni vaka sika kineeroyivelleella wa olliye ni wa edduullu ddaye ellapo eyo ayizondilleeye.’

³⁷ Apwiya yaakishella murima miyaanottho ekaamba ya nyuwaano nave yaallota wi, ‘Naarittho weyaano Mose khovollowa mwiillaponimmo

³⁸ koma awuukaviheraawo Yoswa, mwaana a Nuni, sika anaavollowemo. Vano omullipihe murima vawi olliye sika anaahoollelle Aisraele voovollowani mwiillaponimmo.’

³⁹ “Sika Apwiya yaanilleella attheenehi wi, ‘Akantchewaanyu ayo mweereenyu wi eneerophariwa ni adani navettho aniinyu ang'onong'ono ayo ophiyera ollellova ehinadduwella yaphaama apaalle yoonanara sika enaavollowe mu ellapweeyo. Kineeroyivelleella wa alliwa nave eneeroyaakha.

⁴⁰ Koma muhokollweelle ochipululuni oyeella mu ettilla ya mukhwipi mwa Enyanja Yoofiira.’

⁴¹ “Vano nyuwaano mwahaakhulla wi, ‘Hiyaano nohaachimwella Apwiya. Koma vano nineerowana ekhoto moollikana ni mmo Apwiyaahu yanilamulelliiwa.’ Nave arive muthu a nyuwaano aakusa ezida ddaye ddakhoto, enaganiza wi tti woohikatamiha ogonjiha ellapo yamiyaango.

⁴² “Koma Apwiya yaallota ni miyaano wi, ‘Waachenjeze wi ehaallike Aamoraayo kaambiiwa miyaano ngikhalla ni alliwa nave adaniiwaayo eneerewaagonjiha.’

⁴³ Sika kahuulleellani nnddo yallotille Apwiya koma nyuwaano khemwaapwathille. Mwahaawukila Apwiya nave mwaavollowa mwawiitukhulla mu ellapo yamiyaango.

⁴⁴ Vaavo Aamori ookhalla m'miyaangoni yahuukhumellellani ni owiikarihani wonanko enwi nave yaawuukuthani ovenyera o Seiri ophiya o Horoma.

⁴⁵ Sika nyuwaano mwaahokollowa mwinllaka wi Apwiya yuukavihereni koma kheyaawiiwalleeni apaalle owaapellani maaru.

⁴⁶ “Sika naakhalla mu Kadeshi mallapo manchichi.”