Daniele 9 - Mawu a Mulluku

Nivekello na Daniele

¹ Dariusi, ooyarelliwa o Medi, mwaana a Ahasuwero, aavollowa omwene wa ellapo ya Babiloni.

² Vano muyakha wawaamba wa omwenaaye, miyaano Daniele, vaweerengani mabukhu aweella, kaaphwanya wi Yerusalemu aneerotthattusiwa ntepe wa miyakha 70. Mawu yaalla tti ayo Apwiya yamulleelliiwa namallotella Yeremiya.

³ Vano kaatukhullella miitthwaaka wa Apwiya Mulluku, waakoha moovekella, nngu kihallaka ocha, kiwanre echiguduli navettho kiihenlle ntuura.

⁴ Kaavekella wa Apwiya Mullukwaaka, waakhullella machimo wi, “Nyu Apwiya Mulluku muullupalli ni awoopiha, munnasunga echipanganwaanyu ni echikondaanyu yoohisintheya wa athu ayo enuukondani ni othwara malamulwaanyu.

⁵ Hiyaano noochimwa, noheera ddoonanara ni ddoolakwa. Nohuuwukilani voohiyani malamulwaanyu ni malangizwaanyu.

⁶ Khaniwiiwellelle anamallotella, oorumeyellaanyu, ayo yallotella mu nnddina nanyu wa mamwenaahu, wa enduna ddahu, wa makhollwaahu ni wa athu attheene a mwiillaponi.”

⁷ Nyu Apwiya, muri oolungama koma ophiyera ollello ninnavirellella owulliwa muru hiyaano athu a o Yuda, aneetthi a o Yerusalemu ni athu attheene a o Israele, avakhuviru ni awoorekama, o ellapo ddittheddene nko mwaniikarihelleenyuwo ekaamba yawi khanaaroromelleye wa nyuwaano.

⁸ Nyu Apwiya, muru oniwulle hiyaano vamodda ni mamwenaahu, enduna ddahu ni makhollwaahu ekaamba yawi nohuuchimwellani.

⁹ Apwiya Mullukwaahu, muri eechifundo navettho ookhululukella naari nuuwukinleni.

¹⁰ Nyu Apwiya Mullukwaahu, hiyaano khaniiwellenlle mawaanyu, khanaathwanre malamulwaanyu ayo mwaninnyalleenyu oweella mwa oorumeyellaanyu anamallotella.

¹¹ “Aisraele attheene aapwesa malamulwaanyu nave aahollowa, aakhoota wiiwellella mawaanyu. Sika mawu ootembelela ni oollupella ayo yalembiwe mu malamulo a Mose, oorumeyella a Mulluku, aanimorella ekaamba yawi nohuuchimwellani.

¹² Ddawoona, moheera nnddo mwanilleelleenyu vamodda oonihoollellaahu. Moonimorihella otulli wawoopiha hiyaano ni Yerusalemu, otulli wawi khonooneyeke waambeella khalle va ellapo yavatthi ettheene.

¹³ Moollikana ni mmo ddalembelliwiiwa mu malamulo a Mose, otulli woonimorella. Komave khanaaweesille wuuvekani, nyu Apwiya Mullukwaahu wi munimorelle ethakaraka. Khanaawaakhullelle machimwaahu, khanaapwathille yawoona ya mawaanyu.

¹⁴ Nyu Apwiya Mullukwaahu, ekaamba ya yeella mwaakhozekella onimorihella otulli yoolla nave woonimorella. Nyu Apwiya Mullukwaahu, muri oolungama va ddittheddene mweerilleenyu komave hiyaano khaniiwellenlle mawaanyu.

¹⁵ “Nyu Apwiya Mullukwaahu, mwahaakhumiha athwaanyu o Iguputo ni nnatta nanyu namasiva nave nnddina nanyu tti noovuwa ophiyera ollello. Koma hiyaano noochimwa, noheera ddoonanara.

¹⁶ Nyu Apwiya, ekaamba ya olungama wanyu, ninaveka wi osha murima wanyu ni owallaanyu ddivenyevo va muzinda wa Yerusalemu, mwaangwaanyu waweella. Athu a ellapo ddawaapheella ennamuvevulla Yerusalemu ni athwaanyu ekaamba ya machimwaahu ni ddoonanara dda makhollwaahu.

¹⁷ Nyu Mullukwaahu, vano iwani nivekello ni oveka wa oorumeyellaanyu navettho ekaamba ya nnddina nanyu ekhovaanyu ewalelle va nipuro nanyu naweella nno nitthattuwalle ntepe.

¹⁸ Nyu Mullukwaaka, apellani maaru wi mwiiwe mawaaka. Muhulle miitthwaanyu wi moone matepaahu ni muzinda oyo onadduwelliwa ni nnddina nanyu. Kinavekella wa nyuwaano ekaamba yawi muri eechifundo, ohiri ekaamba yawi hiyaano niri oolungama.

¹⁹ Nyu Apwiya, apellani maaru. Nyu Apwiya nikhululukelleni. Nyu Apwiya, niiwellelleni nave mweerevo ello nave muhiselliwe ekaamba ya nnddina nanyu nave ekaamba ya muzindaanyu navettho athwaanyu enaromolliwa ni nnddina nanyu, nyu Mulluku.”

Gabriele anattaphullella masomphenya

²⁰ Kaanallota ni ovekella ni waakhullella machimwaaka ni machimo a athwaaka a Israele. Kaanaveka vamiitthoni va Apwiya Mullukwaaka vawuupuwellani mwaango waweella wa Mullukwaaka.

²¹ Kivekellaka ddiiddo, mungelo Gabriele olle akooneyelle khalle m'masomphenya aawa wa miyaano avavaka mwawaakuva. Ella yaari enthawi yoovelleella mukutho wamisikuwa.

²² Olliye aakilleella wi, “We Daniele, vano koowa wi kuuvahe ezeru wiiweseseke ddeko.

²³ Waambeewe ovekella wawo Mulluku ahaakhulla sika koowa wi kuulleelle waakhullanko vawi olliye annuukondesesa. Ekaamba ya yeella, owiiwesese phaama mawaayo kaatthopoollaka dda ddeko woonilleewe m'masomphenya.

²⁴ “Miyakha 70 waatiha otthanu ni opiilli ddaakeraatthihiwa wi athwaawo ni muzindaawo waweella ehiye ddeekuku ni machimo. Epepeselle machimo wi echilungamo yoohimalla ephiye. Vano nndde woonilleewe m'masomphenya navettho nnddo ddallotelliwe ddineereweereya nave nipuro naweellesesa nineerokeraatthihiwattho.

²⁵ Vano dduwella nave iiwesesa wi ovenyera enthawi eyo mawu yiiweyilliiwa awi Yerusalemu aneeropotokosiwattho ni omakiwattho ophiyera enduna yoozoziwa ephiyalle,* vinaavire miyakha mitthanu ni miilli oruuwiha otthanu ni opiilli. Sika muzindooyo oneeromakiwattho ori ni misewu ni engalande ddawiitetezella nave onakhallewo miyakha 62 oruuwiha otthanu ni opiilli koma enaakhalle enthawi ya ddoohoosa.

²⁶ Voomallani va miyakha ddenndda oozoziwa aneerewiiphiwa nave khakhalla ni ello. Mulloko wakhoto wa enduna eyo onaawe oneerewoononga muzindooyo vamodda ni enyumba ya Mulluku. Sika omalla wiwa onaaphiye wonanko echigumula nave oneerowiiha woonongeya ni ekhoto nnddo Mulluku akeraatthihalleeye.

²⁷ Enduneeyo eneerokeraatthiha echipangano yoollipa ni athu anchichi wa miyakha khumi ni miilli. Viviralle hafu a enthawi yeella, eneerohiiha ovelleella mikutho ni ddoovelleella ddimodda. Eneerohiya Yoonanara Yawoononga vaddullu va enyumba ya Mulluku nave eneerokhallavo ophiyera aweera ddenndda allakiwe ni woononga nko Mulluku amukeraatthihelleeye.”