Daniele 8 - Mawu a Mulluku

Masomphenya a nankhoro a enkhosa ni a epuri

¹ Mi Daniele, muyakha waneeraru wa mwene Belishazara kahoona masomphenya emanlle awaambaalle.

² M'masomphenyaaka kaaddoona meekha kiri mu muzinda muullupalli wa Susa oyo ori mu echigawo ya Elamu. Kahoonattho wi kaari o muhinje wa Ulai.

³ Vano kitukhunlle miittho, kaamoona nankhoro a enkhosa a manyaka meelli iimenlle vakhopella va muhinje. Manyaka meellaayo yaari oorekama koma nimodda naarekama okhwaranya nikhwiiwa nave namenlle nikhwiiwanno nimenlle khalle.

⁴ Kaamoona nankhoro a enkhosooyo akhuddullaka embali ya wookhuma nndduwa, yoompoto ni yoomwera. Khavaari enama emodda yoowora ollipanana nave khaarivo oowora waakiha ello wa olliye. Sika aaneera ddoopaalla ddaye ni wooniha masivaaye mwawiitukhulla.

⁵ Kiganizeraka ddenndda, kaamoona nankhoro a epuri avenyeraka woovollowa nndduwa, aviraka mu ellapo yavatthi ettheene, eetaka muddulluve. Aakhalla ni nnyaka nuullupalli variyari va miitthwaaye.

⁶ Aamwaatamella nankhoro a enkhosa a manyaka meelli olle kamoonilleemi iimenlle vakhopella va muhinje nave aamuthamakella moowalli.

⁷ Kaamoona allipanaka moowalli ni enkhoseeyo, aayikhuddulla ni winttaka manyakiiwa meellaalle. Nankhoro a enkhosoolle khaallipalle mwawi nankhoro apuroolle aamukuha amunyingallella. Khaarivo awi ttuumuvullusa nankhoro a enkhosa.

⁸ Vano nankhoro a epuri ahaamba wiitukhulla wunchichi ekaamba ya masivaaye. Koma masivaaye yaphiyalliiwa vawaatesesa, nnyaka naye nuullupallinne naakothowa. Munipuroni mwiwa vaamella manyaka mamodda masese muullupalli ootthoonya o ephevo ddisese.

⁹ Va nimodda mwa manyakaayo vaamella nnyaka ning'onong'ono nno nunnuwalle wunchichi nitthoonya omwera ni wookhuma nndduwa navettho o ellapo yooreeresesa.

¹⁰ Nnyakanno nahunnuwa wunchichi naphiya o milloko ddakhoto ddooddullu. Naamoriha etheneeri ddimodda ni oddinyingallella.

¹¹ Nahaamba wiitukhulla wunchichi ophiyera opaalla ollipana ni mwene a milloko ddooddullu. Naahiiha mikutho nnddo ddavelleelliwa wa olliye nllapo ni nllapo nave naakumulla enyumba yoomullapellamo mwene.

¹² Milloko ddooddullu ddaagonjella nnyakanno, naahiiha mikutho dda nllapo ni nllapo mwa olakwa waye. Nahoononga ollapella wawoona nave naanapambana va erive ello neeriiwa.

¹³ Vano kaamwiiwa aweella allotaka nave aweella mmoddattho aamukoha allotooyo wi, “Ethiyo ddinaamalle niini ddinooneya m'masomphenyanndda? Ethiyo mikutho dda nllapo ni nllapo ddinaahiihiwe ophiyera niini? Ethiyo yoonanara yoottholloseella enaakhallevo ophiyera niini? Ethiyo enyumba yamallapello vamodda ni milloko ddakhoto ddooddullunnddo ddinaanyingallelliwa ophiyera niini?”

¹⁴ Mmoddooyo ahaakhulla wi, “Ddineereweereya otthaana ni mahiiyu wa mallapo 2,300. Vatulli viwa enyumba ya mallapello eneereweellihiwa wonanko khalle.”

Mungelo Gabriele anattaphullella masomphenya

¹⁵ Miyaano Daniele koona ddeko m'masomphenya kaaneesesa wi kiiwesese. Moorurumusa kaamoona mmodda awooneya wonanko muthu, iimenlle vahoollo vaka.

¹⁶ Vano kahiiwa mawu a muthu oovenyera vakhopella va muhinje wa Ulai wi, “We Gabriele, muttaphullelle muthooyo nnddo addoonilleeye m'masomphenya.”

¹⁷ Sika Gabriele aawa nko kiimenlle miyaano. Aphiyalle, kahoova nave kahiivokhella vatthi moopopheya ekhove koma olliye aakilleella wi, “We mwaana a muthu wiiwesese wi ddittheddene woonilleewe m'masomphenyannddo ddinallota dda enthawi yoomallihella.”

¹⁸ Allotille ddiiddo, miyaano kahiivokhella vatthi moopopheya ekhove kikomowa. Koma olliye aakittannya akiimesattho.

¹⁹ Vano aakilleella wi, “Kineerewuulleella nnddo ddineereye wamalla osha murima vawi ddenndda tti dda enthawi yoomallihella.

²⁰ Nankhoro a enkhosa a manyaka meelli wamoonilleewe anattaphullella mwene a Amedi ni mwene a Aperisi.

²¹ Nankhoro a epuri wamoonilleewe tti omwene wa a Agriki* nave nnyaka nuullupalli na variyari va miitthonne sika mwene awaamba.

²² Ollota dda nnyaka nookothowa nne munipuroni niwa vamenlle manyaka masese, sika wi mu omwenaayooyo muneerokhuma moomwene masese koma masiviiwa khellikana ni a omwene wawaamboolle.”

²³ Nave vamamallihello va moomwenaalla, machimwiiwa yaatillesese vineerewooneya mwene awumma murima, oochenjera wunchichi.

²⁴ Masivaaye eneerewaatesesa nave aneerewoononga mwawoopiha. Aneeropambana va erive ello aneereeye. Aneerewoononga athu amasiva navettho athu aweella.

²⁵ Ekaamba ya ochenjeresesa waye aneereweera ddoolleka nave murimaaye oneerewiitukhulla. Aneerewoononga athu anchichi moohaachenjeza. Aneeromuwukila mwene a mamwene koma aneerewoonongeya woohikhalla ni nnatta na muthu

²⁶ Nndde woonilleewe dda otthaana ni mahiiyu tti ddawoona. Koma osunge moovittheya ddenndda vawi vineerovira mallapo ddihineereye.

²⁷ Mi Daniele masiva yaakimallella nave kaavoriiwa wa mallapo makavi. Vatulli viwa kaavenya kiya wa mwene woophara mutteko. Koma koonilleeminndde ddaanakaapheelliha muru nave ngaawonre oddiiwesesa.