Daniele 7 - Mawu a Mulluku

Masomphenya a Daniele a ddookumi ddisese ddikhumaka munyanja

¹ Muyakha wawaamba wa Belishazara a o Babiloni, Daniele akonaatthille vabedini vaye aalloha, ahoona masomphenya. Sika aalemba ddoollohannddo, additthopoollella mwawiiweya phaama allota wi,

² “Kahoona mu masomphenyaaka mahiiyu. Ngoonani, enyanja yuullupalli yaanyahulliwa ni ephevo ddisese ddamuddullu.

³ Munyanjanimmo mwaakhuma ddookumi ddisese dduullupalli ddoohiyanahiyana.

⁴ Yawaamba yaari wonanko mukango koma yaakhalla ni muuphello wonanko echiwombankhanga. Miyaano kiwehaka, muuphellwaaye yahuudduwa nave yookumeeyo yahiimesiwa ni manyallo meelli wonanko muthu nave yaavahiwa ezeru wonanko muthu.”

⁵ Vano yookumi yaneepiilli yaakhumellella yawooneya wonanko echimbalangondo. Yaari yootukhuwa embali emodda, muwano mwiwa mwaakhalla epararu variyari va miino. Nave yaayilamula wi, “Venya, ttakhuna enama yinchichi!”

⁶ Vatulli viwa kiwehaka ddiiddo, kahoona yookumi emodda wonanko nanthavi eri ni muuphello masese eepallame vamutthanani viwa. Yookumi yeella yaari ni miru misese nave yaavahiwa masiva oolamulella.

⁷ Vatulli viwa kahoonattho m'masomphenya a mahiiyu yookumi yaneesese. Yaari yawoopiha ni yootthukumelliha, yamasiva manchichi. Yaakhalla ni miino muullupalli amukoko nave yaanakhaddulla, ettakhuna vatulli viwa enyingallella ddoohalla ni manyallwiiwa. Yaahiyana ni ddookumi ddawaambanndde nave yaari ni manyaka khumi.

⁸ Kiwehaka manyakaayo, kahoona nnyaka nimodda ning'onong'ono nimellaka variyari va manyakaayo. Manyaka mararu mwa awaambaalle yaatulliwa wi nimoddanno niphwanye nipuro. Nnyaka nenna naakhalla ni miittho wonanko a muthu navettho eyano eyo yallota ddawiitukhulla.

Masomphenya a oyo arivo wa enthawi yoohimalla

⁹ Kiwehaka ddiiddo, kahoona mipando ddoomwene dditthattiwaka. Oyo arivo ovenyera khalle aakeraatthi va mpando mmodda. Ddoowara ddaye ddaari ddaweella mbee wonanko nthoche nave meehaaye yaari aweella wonanko obweya weenkhosa. Mpandwaaye waari wonanko wa mallumi amunllo nave magudumwiiwa yaari wonanko mallumi amunllo.

¹⁰ Muhinje wamunllo waakhuma oneeta vamiitthoni vaye. Mulloko wa athu anchichi waanamurumeyella nave mulloko mmodda wa athu ooheerengeya wahiimella vamiitthoni vaye. Sika nthato nahaamba weeruza mullatu nave mabukhu yaakhunuulliwa.

¹¹ Sika kaawehesesa ekaamba ya mawu awiitukhulla oollotiwa ni nnyakanne. Kiwehaka ddiiddo, yookumeelle yahiiphiwa nave mutembwiiwa wahoonongiwa ovokhelliwa viikho.

¹² Ddookumi ddimodda ddoohalla naari yaddaakhille masiviiwa oolamulella yaaddaakhullella okhalla ni okumi wa enthawi yooyeva.

¹³ Kiwehakave ddeko m'masomphenya mahiiyu, ngoonani, kaamoona mmodda wonanko mwaana a muthu akitthaka ni mirapo ddooddullu. Amwaatamenlle oyo aarivo khalle, amodda yaamuvelleella wa olliye.

¹⁴ Vano aavahiwa olamulello, olemu ni omwene wi athu a ellapo ddittheddene, mitundu ddittheddene ni ellotello ddoohiyanahiyana yaanamurumeyella. Olamulellwaaye tti wa enthawi yoohimalla, khowa omalla nave omwenaaye khowa woonongeya.

Ottaphullella wa masomphenya a Daniele

¹⁵ Mi Daniele, kaakatamiheya m'maganizoni mwaka nave nnddo koonilleemi m'masomphenya ddaakoopiha.

¹⁶ Kaaya wa mmodda a ayo yiimenlle vaavo nave kaamuveka wi akilleelle ottaphullella wa ddenndda. Sika aakilleella ottaphullella wiwa.

¹⁷ Aallota wi, “Ddookumi ddisese dduullupallinndde tti moomwene masese ayo enooneye va ellapo yavatthi.

¹⁸ Koma aweella a Mulluku Amasiva Mattheene eneerewaakhella masiva oomwene nave eneerokhallanave wa enthawi ddittheddene ni wa enthawi yoohimalla.”

¹⁹ Vano kaapaalla odduwella dda yookumi yaneesese eyo yahiyanne ni ddikhwiiwa ddittheddene, yawoopiha wunchichi, ya miino amukoko ni ekarukha ddamukuwa eyo yakhaddulla, ettakhuna, enanyingallella ddoohalla ni manyallwiiwa.

²⁰ Kaapaallattho odduwella dda manyaka khumi a va muru vaye navettho dda nnyaka nimoddanne natullalle mamodda mararwaalle voomellani. Nna tti nnyaka nne naari ni miittho ni eyano yoollota ddawiitukhulla nave nooneya nuullupalli okhwaranya mattheene.

²¹ Miyaano kiwehaka ddiiddo, nnyakanno naawana ekhoto ni athu aweella nave nahaagonjiha

²² ophiyera mvo oyo aarivo khalle aphiyalleeye. Sika echiweruzo yaaweetella phaama aweella a Mulluku Amasiva Mattheene. Ella sika enthawi eyo aweella yaakhenlliiwa omwene.

²³ Vano aakitthopoollella wi, “Yookumi yaneesese enattaphullella omwene waneesese oyo onooneye va ellapo yavatthi. Oneerohiyana ni moomwene mamodda nave oneerogonjiha ellapo yavatthi ettheene ni oyinyingallella nave aayinyenyanyenya.

²⁴ Manyaka khumi mamodda enooniha mamwene khumi ayo enaakhume mu omwene yoolla. Vatulli viwa vineeroowa mwene mmodda oohiyana ni mamwene mamodda akhalle. Olliye aneerewaagonjiha mamwene mararu.

²⁵ Aneerollota mawu oomuhumullulla Mulluku Amasiva Mattheene nave aneerewaahoosa aweella. Aneereweeseesa osintha mallapo a ehakallallo ni malamulo a mallapello. Nave aweella enaakhalle m'mattani mwa omwene yoolla wa miyakha miraru ni hafu.

²⁶ Koma a va nthato eneeroweeruza nave eneerowaakha olamulellwiiwa wa enthawi yoohimalla wi woonongiwe ni otthollosiwa.

²⁷ Omwene, olamulello ni ottekweene wa mamwene mattheene a va ellapo yavatthi ddineerovelleelliwa wa aweella a Mulluku Amasiva Mattheene. Omweniiwa onaakhalle woohimalla, oolamulella attheene a ellapo yavatthi eneerekewaarumeyella ni owiiwellella.”

²⁸ Mwaha omallelle vaava. Mi Daniele kaakatamiheya m'maganizoni wunchichi nave ekhovaaka yaatthattuwa komave kaavittha ellweella m'murimani mwaka.