Daniele 6 - Mawu a Mulluku

Daniele mu nlliti na mikango

¹ Ddaamuddivella Dariusi otthoolla enduna 120 wi ddilamulelleke mu omwenooyo.

² Nave aamutthoolla Daniele ni amodda eelli wi ekhalle uullupalli oowehera enduna wi ddeko dda mwene ddisungeye phaama oohoonongeya.

³ Daniele ahooniwa mwawaakuva wi ttuuphara mutteko phaama okhwaranya oowehera akhwaaye ni enduna kaambiiwa olliye aari eezeru ddoowallamella. Sika mwene aaganizera ddawi Daniele akhalle oowehera omwene muttheene.

⁴ Nave oowehera akhwaaye ni enduna yaheeseesa omuphwanyella mullatu Daniele va mmo eetihelleeye omwene. Koma kheyaamuphwanyille ni erive yoolakwa kaambiiwa Daniele aari oororomelleya nave kheera ddawaanganyera apaalle ddoolleka.

⁵ Sika athwaalla yaallota wi, “Khanimuphwanyella mullatu Daniele naahimwaashera ekaamba va lamulo na Mullukwaaye.”

⁶ Sika yaaya wawoonana ni mwene Dariusi, emulleella wi, “Nyu amwene, mukhalle ni okumi woorekama.

⁷ Attheenehi aweetiha omwene, oowehera, enduna, alangizi ni oolamulella attheene a mu ezigawo nohiiwanana wi nyu amwene mukeraatthihe lamulo namasiva wi athu attheene ethwareke. Mulamule wi va mallapo 30 vihiphwanyeye muthu ooveka ello wa arive mulluku apaalle wa arive muthu koma wa nyuwaanove.

⁸ Vano nyu amwene mukeraatthihe lamulo noohiiha nave musayinelle wi nihisinthiwe voothwarani malamulo a Amedi ni Aperisi ayo ehinasintheya.”

⁹ Sika Dariusi aasayinella lamulo noohiiha.

¹⁰ Daniele iiwalleeye wi lamulonna nookeraatthihiwa aavollowa mpa mwaye. Mu echipindaaye yavaddullu mwaakhalla mawindo ooweha o Yerusalemu. Nave mwemmo aanakokhora vatthi oraru vanllaponi anavekella ni omutitimiha Mullukwaaye moollikana ni mmo eerelleeye khalle.

¹¹ Vano athwaalle yaakusana mulloko emuphwanya Daniele avekellaka ni ollapella wa Mullukwaaye.

¹² Sika yaaya wa mwene emuupusa dda lamulo naye. Yaamukoha wi, “Nyu amwene, ethiyo khemwaasayinelle lamulo noohiiha wi va mallapo 30 enawaalla arive muthu aveka ello wa arive mulluku apaalle wa arive muthu ohiri wa nyuwaanove avokhelliwe mu nlliti na mikango?” Mwene ahaakhulla wi, “Ddawoona, lamulo na Amedi ni Aperisi tti noohisintheya.”

¹³ Vano yaallota ni mwene wi, “Daniele mmodda mwa akaporo a o Yuda oopwesa lamulo noohiiha nne nyu amwene mwasayinelleenyu. Annavirellella ovekella wa Mullukwaaye oraru vanllaponi.”

¹⁴ Mwene iiwalleeye ddenndda, murima waamuvoreya wunchichi. Ahaamba oganiza ddoomuvullusa Daniele wawi aheeseesa ophiyera ovollowa wa nndduwa.

¹⁵ Vano athwaalle yaakusana mulloko eyattho wa mwene. Nave yaallota ni olliye wi, “Nyu amwene, upuwellani valle wi moollikana ni lamulo na Amedi ni Aperisi, khayiivo yoohiihiwa apaalle yoosayiniwa ni mwene eyo enawora osintheya.”

¹⁶ Sika mwene aalamula wi yamuphare Daniele emuvokhelle mu nlliti na mikango nave mwene aallota ni Daniele wi, “Mullukwaawo onamurumeyelleewe moororomelleya enthawi ettheene uuvulluse!”

¹⁷ Vano yaakusa nlluku epopheya owanoni wa nlliti nave mwene aadindavo echizindikirwaaye ni ya enduna ddaye wi vihisinthiwe ello va Daniele.

¹⁸ Mwene aahokollweella o enyumbaaye yoomwene. Koma aahalla ocha* mahiiyu mattheene naari ddoohakallalliha kheyaawiillena vamiitthoni vaye nave khaakonne.

Mulluku anamuvullusa Daniele o mikango

¹⁹ Mwene aapeha ohinase aya mwawaakuva o nlliti na mikango.

²⁰ Aatamenlle nlliti mwene ahiithana mweethakaraka wi, “We Daniele, oorumeyella a Mulluku Ookumi! Ethiyo Mullukwaawo onamurumeyelleewe moororomelleya enthawi ettheene oowora wuuvullusa o mikango?”

²¹ Daniele aamwaakhulla mwene wi, “Nyu amwene, mukhalle ni okumi woorekama!

²² Mulluku aamurumiha mungelwaaye nave aawalla eyano dda mikango wawi khaddikivoreyille naari vang'ono kaambiiwa Mulluku ahoona wi kiri oohichimwa navettho oohilakwa vamiitthoni vanyu amwene.”

²³ Mwene aahakallalla wunchichi nave aalamula wi Daniele akhumihiwe munllitini. Sika Daniele aakhumihiwa ahivoreyeye naari vang'ono kaambiiwa aamuroromella Mullukwaaye.

²⁴ Vano mwene aalamula wi athu alle yamusumenlle Daniele yaaphare ni waavokhella mu nlliti namikangonne, alliwa vamodda ni awariwa ni aniiwa. Nave ehinaphiye vatthi va nlliti mikango ddahaakaphulla ddaanyenya makhuviiwa mattheene.

²⁵ Vano Dariusi ahaalembella athu a ellapo ddittheddene, mitundu ddittheddene ni ellotello ddoohiyanahiyana va ellapo yavatthi ettheene allota wi, “Murendelle waate variyari vanyu!

²⁶ Kinakeraatthiha lamulo nawi athu attheene a mu omwenaaka emooveke ni omuvaha olemu Mulluku a Daniele. Olliye tti ookumi ni oohimalla, omwenaaye khowa woonongeya, olamulellwaaye khowa omalla.

²⁷ Olliye annavullusa ni waakiha anneera ezizindikiro ni ddoottikhiniha muddullu ni vatthimva, olliye sika amuvullusalle Daniele o masiva a mikango.”

²⁸ Sika Daniele aaphwanya eyuuma va enthawi ya omwene wa Dariusi ni wa Kirusi a o Persiya.