Daniele 5 - Mawu a Mulluku

Machellello a Belishazara

¹ Mwene Belishazara ahaakeraatthiha machellello muullupalli wa enduna ddaye 1,000 nave aamuwiryana vinyo nimodda.

² Amuwiryaka vinyo, Belishazara aalamula wi eweena eziwiya ddagolide ni ddasiliva nnddo Nebukadinezara attiitthinnya yaddivenyehalliiwa o enyumba ya Mulluku ya o Yerusalemu. Apaalla wi emuwiryellemo vinyo olliye, enduna ddaye vamodda ni awariye uullupalli ni ang'onong'ono.

³ Sika yaawaana eziwiya ddagolide nnddo yaddivenyehalliiwa o enyumba ya Mulluku ya o Yerusalemu mwene, enduna ddaye vamodda ni awariye uullupalli ni ang'onong'ono ewiryellemo.

⁴ Yaamuwirya vinyo nngu etitimihaka milluku ddagolide, ddasiliva, ddamukuwa, ddamukoko, ddamuteekho ni ddamalluku.

⁵ Moorurumusa vahooneya nnatta na muthu nilembaka vasirini va enyumba yoomwene moowehana ni enyali. Mwene ahoona nnattanno nilembaka.

⁶ Vano ekhove ya mwene yaatthattuwa nave ahaapheella muru. M'makumanello mwa makhuva a eyuunwaaye mwaakurukunyuwa nave makutthaaye yaheengereya.

⁷ Mwene aakhuwa owiithana awoombesa, amasenga ni oollotella ddamuhoollo wi ewe. Ahaalleella eezeru a o Babiloni wi, “Arive muthu oowora weerenga ddilembiwe mvanndda ni okilleella ottaphullella wiwa, kinimamuwariha ddoowara ddooreera ddoofiira ni ogufu wagolide munikohini nave anaakhalle oolamulella aneeraru mu ellapweella.”

⁸ Sika eezeru attheene a mwene yaawa koma kheyaawonre weerenga apaalle omuttaphullella ddoolembiwannddo.

⁹ Sika mwene Belishazara ahoova wunchichi mwawi mwiilli muttheene waaryiirya. Naari enduna ddaye ddaallakallakeya.

¹⁰ Mwaaramwene iiwalleeye mawu a mwene ni a enduna ddaye aavollowa mu echipinda ya machellello allota wi, “Mukhalle ni okumi woorekama amwene. Pepaani, muhaapheelle muru, muhiriiryiwe!

¹¹ Mu ellapwaanywiilla mookhalla muthu oyo ari ni munepa wa milluku ddaweella. Attiitthaanyu eri mwene muthu yoolla ahooniha wi mwa olliye mookhalla omolleella wiiwesesa ni ezeru wonanko dda milluku. Sika mwene Nebukadinezara attiitthaanyu yaamutthattusa muullupalli a awoombesa, amasenga, amakhanga ni oollotella ddamuhoollo.

¹² Muthooyo nnddina naye tti Daniele koma mwene aamuromolla wi Beliteshazara. Olliye ookhalla ni ezeru ddoowallamella, oodduwella ddeko navettho eeruso yoottaphullella olloha, annatthopoolla miyambi ni mawu ookhuweya. Vano mwiithaneni wi anilleelle ottaphullella wiwa.”

Daniele anattaphullella ddoolembiwa vasirini

¹³ Vano yaawaana Daniele vamiitthoni va mwene amukoha wi, “Ethiyo we tti Daniele mmodda mwa akaporo ayo attiitthaaka yaaphanriiwa o Yuda?

¹⁴ Kohiiwa wi wookhalla ni munepa wa milluku ddaweella nave wi mwa weyaano mookhalla omolleella wiiwesesa ni ezeru ddoowallamella.

¹⁵ Yaawaana wa miyaano athu eezeru ni awoombesa wi yeerenge ddilembiwenndda ni okilleella ottaphullella wiwa koma kheyaawonre.

¹⁶ Sika kohiiwa wi weyaano onnawora ottaphullella olloha navettho mawu ookhuweya. Weerenga malemba yaalla ni okilleella ottaphullella wiwa kineerewuuwariha ddoowara ddooreera ddoofiira ni ogufu wagolide munikohini mwawo nave onaakhalle oolamulella aneeraru mu ellapweella.”

¹⁷ Koma Daniele aamwaakhulla mwene wi, “Emphaso ddanyu muhallena nyookha apaalle mumuvahe muthu mmodda. Komave miyaano kineeroweerengellani ni wuulleellani ottaphullella wiwa.

¹⁸ Nyu amwene, Mulluku ooddullu ahaavaha attiitthaanyu Nebukadinezara masiva, eyuuma ni omwene.

¹⁹ Ekaamba ya masiva yavahiwiiwa, athu a ellapo ddittheddene, mitundu ddittheddene ni ellotello ddoohiyanahiyana yaanatthukumella vamiitthoni viwa ni owoova. Yapaalla omwiipha muthu yaanamwiipha yapaalla omuhiya ni okumi yaanamuhiya. Yapaalla omuwelliha muthu yaanamuwelliha nave yapaalla omukitthiha yaanamukitthiha.

²⁰ Koma yaambilliiwa wiitukhulla, wunnuwa murima ni wiiddivella, yaakitthihiwa va mpandwiiwa woomwene ni waakhiwa olemwiiwa.

²¹ Yahiikarihiwa variyari va athu nave murimiiwa waatthattuwa wonanko wa enama ddamuhakani. Yaakhalla vamodda ni enama ddamuhakani enacha manasi wonanko eng'ombe. Mwiilliiwa waanaana ni nikame nooddullu ophiyera yaadduwella wi Mulluku Ooddullu ookhalla ni masiva oolamulella moomwene a athu nave annawuvelleella wa arive muthu moollikana ni mmo anapaallelleeye.

²² “Koma nyu Belishazara mwanaye khamwiiyevihalle naari mwadduwenlle ddittheddenndda.

²³ Mohiitukhulla moovaanyihana ni Apwiya Ooddullu. Eziwiya dda o enyumba ya Mulluku aawaana o machellellwaanyu. Nave moomuwiryellamo vinyo nyuwaano, enduna ddanyu vamodda ni awarinyu uullupalli ni ang'onong'ono. Mootitimiha milluku ddasiliva, ddagolide, ddamukuwa, ddamukoko, ddamuteekho ni ddamalluku nnddo ddihinoona apaalle wiiwa. Khamwaamuvahille olemu Mulluku oyo anasunga m'mattani mwaye mpweyaanyu ni owehera meetellwaanyu mattheene.

²⁴ Ella sika ekaambiiwa Mulluku arumihalleeye nnatta wi nilembe mawu yaalla.

²⁵ “Mawu yalembiwaayo tti awi, MENE, MENE, TEKELE, PARASINI.

²⁶ Vano ottaphullella wiwa tti wawi, MENE sika wi Mulluku oheerengella mallapo a omwenaanyu nave woomalla.

²⁷ TEKELE sika wi nyuwaano moolingiwa va esikelo nave mooyelleella.

²⁸ PARASINI sika wi omwenaanyu wookawiwa nave woovelleelliwa wa Amedi ni Aperezi.”

²⁹ Vano Belishazara aalamula wi Daniele emuwarihe ddoowara ddooreera ddoofiira ni ogufu wagolide munikohini. Vatulli wiwa yaallalleya wi akhalle oolamulella aneeraru mu ellapweeyo.

³⁰ Nave mahiiyu yaayo Belishazara mwene a o Babiloni ahiiphiwa.

³¹ Sika Dariusi Mumedi ahaakha omwenooyo ari ni miyakha 62.