Daniele 4 - Mawu a Mulluku

Olloha waneepiilli wa Nebukadinezara

¹ Mwene Nebukadinezara aarumiha mawu wa athu a ellapo ddittheddene, a mitundu ddittheddene, a ellotello ddoohiyanahiyana va ellapo yavatthi ettheene wi, “Murendelle okhalle ni nyuwaano.

² Ddookiddivella wi kuulleelleni dda ezizindikiro ni ddoottikhiniha nnddo Mulluku Ooddullu akoonihalleeye.”

³ Ezizindikiro ddaye tti dduullupalli, ddoottikhiniha ddaye tti ddamasiva. Omwenaaye tti wa enthawi yoohimalla, olamulellwaaye tti wa o mibado ddittheddene.

⁴ Miyaano Nebukadinezara kaanakhalla mwamurendelle mpa mwaka nave ddaanakeetella phaama mu enyumbaaka yoomwene.

⁵ Kikonaka kaalloha ddawoopiha. Ddeko koonilleemi m'muruni mwaka kikonaatthille vabedini vaka ddaakoopiha wunchichi.

⁶ Sika kaalamula wi eezeru attheene a o Babiloni ewe wa miyaano wi ekilleelle ottaphullella wa ollohanko.

⁷ Sika yaawa amasenga, awoombesa, oollotella ddamuhoollo ni oottaphullella olloha nave kahaatthopoollella koma kheyaawonre okittaphullella ollohanngu.

⁸ Vatulli viwa aawa Daniele, ooromolliwa Beliteshazara, voothwarani nnddina na mullukwaaka, muthu ooddalliwa ni munepa wa milluku ddaweella. Olliye kaamutthopoollellattho ollohanko.

⁹ Kaallota wi, “We Beliteshazara, muullupalli a amasenga, kinnadduwella wi ori ooddalliwa ni munepa wa milluku ddaweella nave onnadduwella ddawiipittheya ddittheddene. Iwa nnddo killohilleemi nave okittaphullelle.

¹⁰ Nndda sika ddeko koonilleemi m'masomphenya kikonaatthille vabedeni vaka. Kahoona muteekho woorekama wiimenlle variyari va ellapo yavatthi.

¹¹ Muteekhooyo waavirellella wunnuwa mwamasiva. Etthokiiwa yaaphiya ooddullu ophiyera waanooneyella o ellapo yavatthi ettheene.

¹² Makukhwiiwa yaari ooreera, ezipaso ddiwa ddaari ddinchichi nave ddaari ddookwakhwanella ellapo yavatthi ettheene. Enama ddamuhakani ddaanakhalla mu muuthuuchiiwa, epallame ddaanakhalla mu enthambi ddiwa nave ddoophatusiwa ddittheddene ddaanacha dda muteekhooyo.”

¹³ Kaganizelleemi dda nnddo koonilleemi m'muruni mwaka kiri vabedini vaka, ngoonani, amithenga aweella yaakittha oddullu.

¹⁴ Yaakhuwa wi, “Uhani muteekhooyo ni ophadda enthambi ddiwa! Vakaresani makukhwiiwa ni opwaramwasa ezipaso ddiwa. Enama ddamuhakani ddithawe vamuuthuuchini viwa nave epallame va enthambi ddiwa.

¹⁵ Koma muhiye nikoto ni misisi ddiwa muthayani nave munimake ni onyolo wamukoko ni mukuwa ni onihiya ohakani m'manasini. “ ‘Muhiyeni anaane ni nikame nooddullu nave akhalleke vamodda ni enama m'manasini a ellapo yavatthi.

¹⁶ Murimaaye khokhalla wa muthu koma wa enama nave onaakhalle ddiiddo wa miyakha mitthanu ni miilli.

¹⁷ Amithenga aweella sika enasimikiza ddenndda. Sika athu attheene edduwelle wi Mulluku Ooddullu ookhalla ni masiva oolamulella moomwene a athu nave wi annawora owuvelleella wa arive muthu moollikana ni mmo anapaallelleeye naari wa ookittha oovevuwa wunchichi.’

¹⁸ “Nngu sika olloha nko miyaano mwene Nebukadinezara kallohilleemi. Vano, we Beliteshazara okittaphullelle vawi eezeru attheene a mu omwenaaka khenawora okittaphullella koma weyaano onnawora vawi wookhalla ni munepa wa milluku ddaweella.”

Daniele anattaphullella olloha

¹⁹ Sika Daniele oyottho aromolliwa wi Beliteshazara, wa enthawi yooyeva ahaapheella muru, aakatamiheya m'maganizoni mwaye. Mwene aallota wi, “Beliteshazara, ollohanngu ni ottaphullella wiwa ddihiwaapheellihe muru.” Beliteshazara ahaakhulla wi, “Apwiyaaka, waphaama ollohanngu waariki wa adanaanyu nave ottaphullella wiwa wa oowiitani.

²⁰ Muteekho oyo moonilleenyu waari wawunnuwa mwamasiva, waarekama ophiyera muddullu nave waanooneyella va ellapo yavatthi ettheene.

²¹ Makukhwiiwa yaari ooreera, ezipaso ddiwa ddaari ddinchichi nave ddaari ddookwakhwanella ellapo yavatthi ettheene. Enama ddamuhakani ddaanakhalla mu muuthuuchiiwa nave epallame ddaanakhalla mu enthambi ddiwa.

²² Nyu amwene, muteekhooyo tti nyeene vawi mootthattuwa muullupalli ni amasiva. Ottekweenaanyu woophiya oddullu, omwenaanyu woophiya o malire mattheene a ellapo yavatthi.

²³ Vanottho nyu amwene mwaamoona amithenga aweella akitthaka oddullu nave aallota wi, ‘Uhani muteekhooyo nave muwoononge. Koma muhiye nikoto ni misisi ddiwa muthayani nave munimake ni onyolo wamukoko ni mukuwa ni onihiya ohakani m'manasini. Muhiyeni anaane ni nikame nooddullu nave akhalleke vamodda ni enama m'manasini a ellapo yavatthi ophiyera vimanlle miyakha mitthanu ni miilli.’

²⁴ “Nyu amwene, vano nngu sika ottaphullella wiwa. Nndda sika Mulluku Ooddullu asimikinzeeye wi ddineerewuumorellani.

²⁵ Muneerewiikarihiwa variyari va athu nave munaakhalleke vamodda ni enama ddamuhakani. Munaacheke manasi wonanko eng'ombe nave muneerekonaana ni nikame nooddullu wa miyakha mitthanu ni miilli ophiyera mudduwenlle wi Mulluku Ooddullu ookhalla ni masiva oolamulella moomwene a athu annaavelleella wa arive muthu moollikana ni mmo anapaallelleeye.

²⁶ Amithenga yaallota wi ehiye nikoto ni misisi ddiwa sika wi muneerokhallattho mwene mwawa mwaakhullella wi Mulluku sika analamulella ellapo yavatthi.

²⁷ Nyu amwene, ekaamba ya yeella, thwarani malangizwaaka. Hiyani machimwaanyu, mweereke ddoolungama vooweerellani echifundo oohoowa wi apaalle enthawi ya murendellaanyu erekame.”

²⁸ Vano ddittheddenenndda ddammorella mwene Nebukadinezara.

²⁹ Ddimanlle miyeri khumi ni miilli, eeta vaddullu va enyumba ya omwene ya o Babiloni.

³⁰ Nave olliye aallota wi, “Olla khe Babiloni muullupalli kimumakilleemi wi akhalle enyumba yoomwene ni masivaaka muullupalli wooniha eyuuma ya omwenaaka?”

³¹ Mwene allotaka ddiidda, vahiiweya mawu oovenyera oddullu awi, “We mwene Nebukadinezara, iwa nnddo kinalloteemi. Omwenaawo woovenyihiwa m'mattani mwawo.

³² Oneerewiikarihiwa variyari va athu nave onaakhalleke ni enama ddamuhakani. Onaacheke manasi wonanko eng'ombe wa miyakha mitthanu ni miilli ophiyera mudduwenlle wi Mulluku Ooddullu ookhalla ni masiva oolamulella moomwene a athu, annaavelleella wa arive muthu moollikana ni mmo anapaallelleeye.”

³³ Enthawi yeeyo mawaalla yaheereya wa Nebukadinezara. Sika yaamwiikariha variyari va athu, anacha manasi wonanko eng'ombe. Mwiillaaye waanaana ni nikame ophiyera meehaaye yaamella wonanko enthenga dda echiwombankhanga nave ekarukha ddaye ddaari wonanko dda epallame.

Nebukadinezara anamutitimiha Mulluku

³⁴ Koma miyakha mitthanu ni miilli ddamanlliiwa mi Nebukadinezara kaaweha oddullu nave ezeru ddaka ddaahokollowa. Sika kaamutthamalla Mulluku Ooddullu nave kaathokoza ni omutitimiha Mulluku a enthawi yoohimalla. Kaallota wi, “Aneerolamulella wa enthawi yoohimalla, omwenaaye tti wa mibado ddittheddene.

³⁵ Attheene ookhalla vatthimva eneesiwa etthiru, anneera ddoomuddivella oddullu ni vatthi. Khaavo naari mmodda oomuvaanyiha ddoopaalla ddaye apaalle omukoha wi, ‘Wenre tini?’ ”

³⁶ Vano ezeru ddaka ddaahokollweelliiwamo omwene ni masivaaka muullupalli yaahokollowa, wi wooneye wunnuwa wa omwenaaka. Enduna ddaka ni uullupalli a akhotwaaka yaakaakhella moohakallalla. Kaakeraatthihiwattho mu omwenaaka nave masivaaka yahoonjerereya okhwaranya khalle.

³⁷ “Sika mi Nebukadinezara kinnamutthamalla Mulluku, kinnamuthokoza ni omutitimiha mwene Ooddullu. Ddaweera ddaye ddittheddene tti ddaphaama nave ettilla ddaye ddittheddene tti ddoolungama. Olliye annamuyeviha arive muthu awiitukhulla.”