Daniele 3 - Mawu a Mulluku

Nebukadinezara anapanga nifano nagolide

¹ Mwene Nebukadinezara aapanga nifano nagolide, noorekama mamita 27, nooramballalla mamita mararu. Aaniimesa mu ntapo na Dura o echigawo ya Babiloni.

² Vano aarumiha mawu wi aatthukumanihe enduna, akhoto uullupalli, aweeruza, oosunga eyuuma, attekweene, alangizi ni oolamulella attheene a mu ezigawo wi ewe yeerena mutetho woopatula nifano nagolide nno mwene Nebukadinezara aniimesilleeye.

³ Sika attekweene attheene a mu echigaweeyo yaawa wi yeerena mutetho woopatula nifano nagolide nno mwene Nebukadinezara aniimesilleeye.

⁴ Vano oollalleya aakhuwa wi, “Nyu athu a ellapo ddittheddene, a mitundu ddittheddene, a ellotello ddoohiyanahiyana va ellapo yavatthi ettheene,

⁵ mwiiwa winlla wa nipallapata, echitoliro, zeze, ethangara, gitala wizilo ni wiipa wa mitundumitundu, mupopheye ekhove ddanyu vatthi ni ollapella nifano nagolide nno mwene Nebukadinezara aniimesilleeye.

⁶ Arive muthu oohipopheya ekhove vatthi ni ollapella nifano nagolide aneerovokhelliwa mu eng'anjo yamunllo.”

⁷ Sika athu attheene yiiwalliiwa winlla wa nipallapata, echitoliro, zeze, ethangara, gitala wizilo ni wiipa wa mitundumitundu, athu a ellapo ddittheddene, a mitundu ddittheddene, a ellotello ddoohiyanahiyana va ellapo yavatthi ettheene yaapopheya ekhove ddiwa vatthi ni onillapella nifano nagolide nno mwene Nebukadinezara aniimenseeye.

Akhwaaye araru a Daniele eniipiwa mullatu

⁸ Enthawi yeeyo Ababiloni amodda yaaphwanya mpata woonanariha epilli ya Ayuda.

⁹ Alliwa yaallota wa mwene Nebukadinezara wi, “Nyu amwene, mukhalle ni okumi woorekama.

¹⁰ Nyu amwene, moolamula wi arive muthu iiwa winlla wa nipallapata, echitoliro, zeze, ethangara, gitala wizilo ni wiipa wa mitundumitundu wi akokhore ni ollapella nifano nagolidenna

¹¹ nave oyo ahinaakokhore ni ollapella avokhelliwe mu eng'anjo yamunllo.

¹² Vookhalla Ayuda amodda ayo mwaahiyalleenyu wi ewehereke mutteko wa mu echigawo ya Babiloni, Shadrake, Meshaki ni Abedenego. Athu yaalla khenapwatha lamulo na nyu amwene, khenarumeyella milluku ddanyu apaalle ollapella nifano nagolide mwaniimesilleenyu.”

¹³ Sika Nebukadinezara aasha murima wunchichi, awiithaniha Shadrake, Meshaki ni Abedenego. Nave yaawaana athwaalla vamiitthoni va mwene.

¹⁴ Nebukadinezara ahaakoha wi, “Nyu, Shadrake, Meshaki ni Abedenego, ethiyo tti ddawoona wi khemunarumeyella milluku ddaka apaalle ollapella nifano nagolide kaniimenseemi?

¹⁵ “Mwaakhullella wi mwiiwa winlla wa nipallapata, echitoliro, zeze, ethangara, gitala wizilo ni wiipa wa mitundumitundu, muneeropopheya erukullu vatthi ni ollapella nifano nagolide nno kiniimenseemi, ddaphaama. Koma mwaahinillapella muneerovokhiwa mu eng'anjo yamunllo. Vano ethiyo tti mulluku oovi anuuvulluseni m'mattani mwaka?”

¹⁶ Shadrake, Meshaki ni Abedenego yaamwaakhulla mwene Nebukadinezara wi, “Khe woopaalleya wi niwaakhulleni va mwaha yoolla.

¹⁷ Mullukwaahu ninamurumeyelleehu aneerowora onaakiha mu eng'anjo yamunllo nave aneeronivullusa mu nnatta nanyu, amwene.

¹⁸ Koma aaheera ddiiddo, dduwellani amwene wi khanirumeyellave milluku ddanyu ni ollapella nifano nanyu nagolide mwaniimesilleenyu.”

Akhwaaye araru a Daniele enavokhelliwa mu eng'anjo yamunllo

¹⁹ Vano Nebukadinezara ahaashella murima wunchichi nave ekhovaaye yahaatthattuwella Shadrake, Meshaki ni Abedenego. Olliye aalamula wi eng'anjo yamunllo ettettheeriwe otthanu ni opiilli okhwaranya mmo enattettheerelliiwa.

²⁰ Ahaalamula akhoto amasiva wi yaamake Shadrake, Meshaki ni Abedenego ni waavokhella mu eng'anjo yamunllo.

²¹ Sika yaamakiwa, ewarille mikanjo ddiwa, malayiiwa, enduwira ddiwa ni ddoowara ddiwa ddimodda evokhelliwa mu eng'anjo yamunllo.

²² Ekaamba yawi olamula wa mwene waari wawaakuva nave eng'anjo yamunllo yaaviha wunchichi, akhoto ayo yaakusalle Shadrake, Meshaki ni Abedenego yahiiphiwa ni mallumi amunllo ookhuma mu eng'anjweeyo.

²³ Allopwana ararwaalla Shadrake, Meshaki ni Abedenego, yaamorella vatthi eri oomakiwa mu eng'anjo yooviha yamunllo.

²⁴ Vano Nebukadinezara aattikhina, avenya mwawaakuva. Aallota ni enduna ddaye wi, “Ethiyo khenaawaamakille athu araru ni waavokhella mu eng'anjo yamunllo?” Alliwa yaamwaakhulla wi, “Ee, ddawoona amwene.”

²⁵ Mwenooyo aallota wi, “Wehani, kinawoona athu asese oottaphulliwa, yeetaka mwamurendelle, oohisha muwari mwa munllo. Nave aneesese anooneya wonanko mwaana a milluku.”

Akhwaaye araru a Daniele ennakhumihiwa ni owellihiwa

²⁶ Sika Nebukadinezara ahaatamella o mullako wa eng'anjo yamunllo iithana wi, “Shadrake, Meshaki ni Abedenego, oorumeyella a Mulluku Amasiva Mattheene, khumani! Waani wuno!” Nave Shadrake, Meshaki ni Abedenego yaakhuma muwari mwa munllommo.

²⁷ Enduna, akhoto uullupalli ni alangizi a mwene yaatthukumana moowaapheella yoona wi munllo khawaawonre waashellelliha athwaayo. Naari meehiiwa kheyaavuwalle, ddoowara ddiwa kheddaashille nave kheyaawunkhalle munllo naari vang'ono.

²⁸ Nebukadinezara aallota wi, “Atitimihiwe Mulluku a Shadrake, Meshaki ni Abedenego oyo amurumme amithengaaye aavullusa oorumeyellaaye oomuroromella olliye. Nave yaakhota mawu a miyaano mwene, evelleella miilli ddiwa wi ddihirumeyelle apaalle ollapella arive mulluku koma Mullukwiiwave.

²⁹ “Vano kinakeraatthiha lamulo nawi arive muthu a orive mutundu ni a erive ellotello amuvevulla Mulluku a Shadrake, Meshaki ni Abedenego aphaddiwephaddiwe nave enyumbaaye ekhalle ntepe. Khaavo mulluku mmodda oowora ovullusa mwawi ddiidda.”

³⁰ Vano mwene ahaawelliha Shadrake, Meshaki ni Abedenego mu echigawo ya Babiloni.