Daniele 2 - Mawu a Mulluku

Olloha wa Nebukadinezara

¹ Muyakha waneepiilli wa omwenaaye, Nebukadinezara aalloha. Nave ollohanko waamwaapheelliha muru mwawi ekhove ddaampallalleya.

² Sika mwene aawiithaniha awoombesa, amasenga, amakhanga ni oollotella ddamuhoollo wi emuttaphullelle nnddo allohilleeye. Alliwa yaavollowa yiimella vamiitthoni va mwene.

³ Nave mwene ahaalleella wi, “Mi koolloha nave murwaaka wohaapheella wunchichi mwawi kinapaalla kidduwelle ottaphullella wiwa.”

⁴ Vano oollotella ddamuhoollo yamwaakhulla mwene mu Earamu wi, “Nyu amwene, mukhalle ni okumi woorekama. Nilleelleni nnddo mullohilleenyu, nineerewuutthopoollellani ottaphullella wiwa.”

⁵ Mwene aawaakhulla oollotella ddamuhoollo wi, “Kiganizalleemi moollipa murima tti yawi mwaahikilleella nnddo kallohilleemi ni ottaphullella wiwa, kinimuuphaddaphaddani nave enyumba ddanyu kinimadditthattusa matepe.

⁶ Koma mwakilleella nnddo kallohilleemi ni ottaphullella wiwa, kineerewuuvahani emphaso ddinchichi nave kineerewuuriihani wunchichi. Vano killeelleni ollohanko ni ottaphullella wiwa.”

⁷ Alliwa yahaakhullattho wi, “Amwene enilleelle hiyaano akaporwiiwa ollohanko wi nitthopoolle ottaphullella wiwa.”

⁸ Mwene ahaakhulla wi, “Koodduwella khalle wi munaselliha phudda kaambiiwa moodduwella wi ngisintha maganizo.

⁹ Mwaahikilleella ollohanko, ollakiwa wanyu tti omodda. Mohiiwanana wi mukilleelle ddawoottha kaambiiwa mwaganiza wi vavira enthawi ddeko ttuusintha. Sika killeelleni ollohanko nave kineerodduwella wi muneerowora ottaphullella.”

¹⁰ Oollotella ddamuhoollo yaamwaakhulla mwene wi, “Khaavo muthu va ellapo yavatthi anaawore omulleella mwene nnddo anapaalleeye. Khaavo mwene muullupalli ni amasiva aambilleke waakoha amasenga, amavuwo ni oollotella ddamuhoollo.

¹¹ Ello eyo enapaalla mwene tti yookatamihesesa. Khaavo anaawore owupullullellani koma millukuve nnddo ddinakhalla moorekamellana ni athu.”

¹² Mwene iiwalle ddenndda aasha murima ni onanariwa wunchichi mwawi aalamula wi eezeru attheene a o Babiloni yiiphiwe.

¹³ Sika lamulo naallalleyiwa wi eezeru attheene a o Babiloni yiiphiwe. Nave yahaamba owaashaasha Daniele vamodda ni akhwaaye wi yiiphiwe.

Mulluku anamoonihella Daniele ottaphullella wa olloha

¹⁴ Vano Daniele aallota mweezeru ni moolemu wa Ariyoki, akhoto muullupalli a mwene, oyo arumiwe wi awiiphe eezeru a o Babiloni.

¹⁵ Daniele aamukoha Ariyoki wi, “Ethiyo mwene avelleellelle tini lamulo neekuku?” Ariyoki aamutthopoollella ddittheddene Daniele.

¹⁶ Sika Daniele aaya wa mwene aveka enthawi yawi amuupullullelle mwene ottaphullella wa ollohanko.

¹⁷ Vatulli viwa Daniele aaya owaniwa nave ahaatthopoollella mwahooyo akhwaayaalle, Hananiya, Mishaele ni Azariya.

¹⁸ Ahaalleella wi evekelle echifundo wa Mulluku ooddullu moollikana ni yawiipittheyeeyo wi alliwa ehiiphiwe vamodda ni eezeru amodda a o Babiloni.

¹⁹ Vano yawiipittheyeeyo yahuupullullelliwa wa Daniele mu masomphenya a mahiiyu. Sika Daniele aamutitimiha Mulluku ooddullu.

²⁰ Olliye aallota wi, “Nnddina na Mulluku nititimihiwe wa enthawi yoohimalla, ezeru ni masiva ddittheddene tti ddaaye.

²¹ Annalamulella enthawi ddittheddene, annaawelliha ni waakitthiha mamwene. Annavelleella ezeru wa eezeru, annavaha odduwella wa awiiwesesa.

²² Annuupullulla ddeko ddoowallamella ni ddawiipittheya, annadduwella ddamwiipiphini, owala onakhalla ni olliye.

²³ Nyu Mulluku a makhollwaaka, kinnuuthokozani ni wuutitimihani vawi mookivaha ezeru ni masiva.”

Daniele anattaphullella olloha

²⁴ Sika Daniele aaya wa Ariyoki oyo mwene amulamulalleeye wi awiiphe eezeru attheene a o Babiloni. Aamulleella wi, “Ohiwiiphe eezeru koma okivelleelle wa mwene nave kineeromuttaphullella olloha waye.”

²⁵ Sika Ariyoki aamuvelleella mwawaakuva Daniele wa mwene nave aallota wi, “Nyu amwene, variyari va akaporo a o Yuda koomuphwanya mmodda oyo anaawore ottaphullella olloha wanyu.”

²⁶ Mwene aallota ni Daniele oyo aromolliwa Beliteshazara wi, “Ethiyo we ttuukilleella olloha waka ni ottaphullella wiwa?”

²⁷ Daniele aamwaakhulla mwene wi, “Nyu amwene, khaavo eezeru, amasenga, awoombesa apaalle oollotella ddamuhoollo oyo anaawore wuuttaphullellani yoovittheya eyo munapaalleenyu odduwella.

²⁸ Koma wookhalla Mulluku oddullu awuupullulla ddoovittheya. Olliye oomudduwelliha mwene Nebukadinezara nnddo ddineereye muhoollo. Vano nndda sika ddeko moonilleenyu m'masomphenya muri vabedini vanyu.

²⁹ Nyu amwene, maganizo ayo yuuweelleni mukonaka yaari a ddeko nnddo ddineereye muhoollo. Mulluku awuupullulla ddoovittheya, ohuulleellani nnddo ddineereye muhoollo.

³⁰ “Yoovittheyeella yuupullullelliwe wa miyaano, ohiri ekaamba yawi kiri eezeru waakhwaranya athu amodda attheene koma wi nyu amwene mudduwelle ottaphullella wiwa nave mudduwelle maganizo ayo evollowille m'murimani mwanyu.

³¹ Nyu amwene mwaaweha ni woona nifano nuullupalli. Nifanonna naari nuullupalli, noonyezimellesesa ni nawoopiha nave nahiimella vamiitthoni vanyu.

³² Muru wa nifanonna waari wa golide oosalala, ekhakadda ni miwono ddaari ddasiliva, erukullu ni eyuuno ddaari ddamukuwa,

³³ meto ddaari ddamukoko, manyallo yaari a mukoko woottakanyihera ni olloko.

³⁴ Nyu muwehaka, nlluku naakurumuwa ovenyera omwaangoni nihittannyiwe ni muthu. Nahuukutha ni onyenya manyallo a mukoko ni a ollokwaalle.

³⁵ Sika mukoko, olloko, mukuwa, siliva ni golide ddittheddene ddaanyenyeya vamodda. Nave ddaavavihiwa ni ephevo wonanko mallulla va nipuro nawuuputhella enthawi yoohata, oohihallavo erive ello. Koma nlluku nanyenyille nifanonno naatthattuwa mwaango muullupalli, oddalla ellapo yavatthi ettheene.

³⁶ “Nyu amwene, olloha wulle tti wenngu. Vano nineerewuuttaphullellani ollohangu.

³⁷ Nyu amwene, muri mwene a mamwene. Mulluku ooddullu ahuuvahani omwene, masiva mattheene, olamulello ni oriiheya.

³⁸ Aahiya m'mattani mwanyu athu, enama ni epallame wi mulamulelleke ddittheddenennddo orive weko ddinakhalliiwa. Muru wa golidoolle tti nyuwaano.

³⁹ Vatulli va omwenaanyu vineerowa omwene omodda woohikhalla ni masiva wonanko waanyu. Vineerowattho omwene omodda waneeraru, omweneene wamukuwa oyo onaalamulelle ellapo yavatthi ettheene.

⁴⁰ Nave vineerowattho omwene omodda waneesese, woollipa wonanko mukoko. Wonanko mmo mukoko onaphwinyelliiwa ni onyenya erive ello, omwenooyo oneerophwinya ni waanyenya moomwene mamodda mattheene.

⁴¹ Monga moonelleenyu wi manyallo ni eyaalla ddiwa ddaari ddoolloko woottakanyihera ni mukoko, sika wi omwenooyo onaakhalle wookawaneya. Komave oneerohalla ni masiva vang'ono ekaamba ya mukokoolle.

⁴² Monga eyaalla dda omanyalloni ddakhallelliiwa ddoolloko woottakanyihera ni mukoko, sika wi omwenooyo onaakhalle mva voollipa, mva voohillipa.

⁴³ Monga moonelleenyu wi mukoko waattakanyihereya ni olloko, mwemmottho athu eneerottakanyihereyana koma kheyiiwananaka wonanko mmo mukoko ohinattakanyihereyiiwa phaama ni olloko.

⁴⁴ Va enthawi ya moomwenaayo, Mulluku ooddullu aneerokeraatthiha omwene woohoonongiwa. Oneerewaaphwinya ni waatthollosa moomwene mamodda mattheene nave omwenooyo weekhiiwa oneerokhalla wa enthawi yoohimalla.

⁴⁵ Nngu sika ottaphullella wa nlluku nne moonilleenyu nakurumuwalle ovenyera omwaangoni, nihittannyiwe ni muthu nave ninyenya mukoko, mukuwa, olloko, siliva ni golide. Nyu amwene, Mulluku amasiva ohuudduwellihani ddamuhoollo. Ollohanngu tti woosimikizeya nave ottaphullellanngu tti wawoona.”

Mwene enamuwelliha Daniele

⁴⁶ Sika mwene Nebukadinezara aapopheya ekhove vatthi nave aamullapella Daniele. Aalamula wi athu evelleelle mukutho ni woosa lubani* wa Daniele.

⁴⁷ Mwene aallota wi, “Ddawoona Mullukwaawo tti Mulluku a milluku ddittheddene navettho sika Apwiya a mamwene mattheene. Sika awuupullulla ddawiipittheya ddittheddene vawi weyaano woowora okuupullullella yawiipittheyeella.”

⁴⁸ Vatulli viwa mwene aamuwelliha Daniele amuvaha olemu ni omwinnya emphaso ddaphaama ddinchichi. Aamutthoolla wi akhalle oolamulella echigawo ettheene ya Babiloni navettho wi akhalle muullupalli a eezeru attheene.

⁴⁹ Ekaamba ya oveka wa Daniele, mwene ahaatthoolla Shadrake, Meshaki ni Abedenego wi ekhalle oowehera mitteko dda echigawo ya Babiloni. Koma Daniele yeekha akhalla o enyumba yoomwene.