Daniele 12 - Mawu a Mulluku

Enthawi yoomalliha

¹ Va enthawi yeeyo Mikaele, mungelo muullupalli oyo anaawehera athwaawo, aneerophiya. Enthawi yeeyo enaakhalle ya ddoohoosa ddawoopiha awi khenooneyeke ovenyera khalle, ephatuwello ya mutundu wawaamba wa athu ophiyera enthawi yeeyo. Va enthaweeyo athwaawo attheene ayo manddiniiwa elembiwe mu nibukhu eneerovulluwa.

² Anchichi mwa ookona mu nthupi navatthi eneerovenya. Amodda enaaye o okumi woohimalla, amodda o owulliha muru ni o ollaka woohimalla.

³ Athu eezeru eneerowala wonanko muddullu. Nave ayo yaahoollelle athu anchichi mu ettilla ya echilungamo eneeronyezimella wonanko etheneeri wa enthawi yoohimalla.

⁴ “Koma we Daniele, sunga mawaalla moovittheya nave onimarelle nibukhunna ophiyera enthawi yoomalliha. Anchichi eneerothamakella nngu ni nngu nave ezeru ddineerovirellella waata.”

⁵ Vano miyaano Daniele kitukhullalle miittho kaawoona eelli mmodda ekhopella yawuno ya muhinje, mmodda ekhopella emoddeeyo.

⁶ Mmodda aamukoha oowara ddabafuta oyo aari omwaako wa muhinje wi, “Ethiyo ddeko ddoottikhinihanndda ddinaamalle niini?”

⁷ Oowara bafuta oyo aari omwaako wa muhinje ahiimesa muddullu muwonwaaye wonnattanatta ni woonyottho nave kaamwiiwa allupellaka vooromollani nnddina na Ookhalla ni okumi woohimalla wi, “Ddineereya wa miyakha miraru ni hafu. Ddittheddenndda ddinaamalle ddoohoosa dda athu aweella ddamalla.”

⁸ Naari kiiwalle ddenndda komave ngiiweseselle. Sika kaakoha wi, “Nyu Apwiyaaka, ddenndda ddinaamalle mwawiidde?”

⁹ Olliye aakaakhulla wi, “We Daniele, khawe vawi mawu yaalla tti oosungiwa moovittheya nave eneeromarelliwa ophiyera enthawi yoomalliha.

¹⁰ Anchichi eneeroddeelliha nave eneereweella, oohikhalla ni yooripiha. Koma oonanara eneerovirellella onanara. Khaavo naari mmodda mwa alliwa aniiwesese ddenndda koma yaayove eri ni ezeru eneerewiisesesa.

¹¹ Ovenyera enthawi eyo mikutho dda nllapo ni nllapo ddinaahiihiwiiwa nave Yoonanara Yawoononga enaakeraattheyiiwa, vinaavire enthawi wonanko mallapo 1, 290.

¹² Oodala muthu oyo anatiyerella ophiyera woona omalla wa mallapo 1, 335.

¹³ Koma we Daniele ollipihelle ettillaawo ophiyera mamallihello. Sika oneerokhwa koma oneerovenya wi waakhelle yoothuviwaawo va nllapo noomalliha.”