Daniele 11 - Mawu a Mulluku

¹ “Vano miyaano mu muyakha wawaamba wa Dariusi Mumedi, kahiimella wi kimullipihe murima ni omuteteza.”

Moomwene a o Iguputo ni a o Siriya

² “Vano kineerewuulleella yawoona. O Persiya oneerokhalla mamwene mararu. Vatulli viwa oneerokhalla mwene aneesese, eeyuuma yinchichi waakhwaranya amodda attheene. Aneerokhallattho ni masiva ekaamba ya eyuumaayeeyo. Aneerewaavenyiha attheene wi ewane ni omwene wa Griki.

³ Koma o Griki oneerokhuma mwene mmodda oyo anaalamulelle mwamasiva nave aneereweera ddoopaalla ddaye.

⁴ Koma omwenaaye ori variyari, oneerewonongeya nave oneerokawaneya vasese. Khollapuwella o edduullu ddaye nave oovollowa munipuroni mwaye khekhalla ni masiva oollikana ni a olliye. Omwenaaye oneerotulliwa ni misisi ddene ni ovelleelliwa wa amodda ohiri wa alliwaalle.

⁵ “Vano mwene oomwera aneerokhalla ni masiva. Koma mmodda a enduna ddaye aneeromukhwaranya masiva nave olamulellwaaye oneerewunnuwa wunchichi.

⁶ Viviralle miyakha, mamwene meelli oompoto ni oomwera eneerokeraatthiha mwiiwanano. Mwaana aamutthiyana a mwene oomwera aneerotthelliwa ni mwene oompoto wi ekeraatthihe murendelle. Koma omwenooyo khollekella vawi mwene ni mwaariye khellekella. Mutthiyanooyo, attiitthinnya, mamune, mwanaye ni oorumeyellaaye, attheene aneerovelleelliwa wa adani.

⁷ Vatulli viwa mmodda a abale a mutthiyanooyo aneerovollowa omwene nave aneeromuhella ekhoto mwene oompoto. Aneeromugonjiha nave aneerovollowa mu muzindaaye.

⁸ Aneerohokollweella o Iguputo aakhille ddeko monga mafano a milluku ddiwa ni eziwiya ddoowallamella mutengo ddagolide ni ddasiliva. Vano miyakha ddimodda aneerohiya owana ni mwene oompotooyo.

⁹ Vatulli viwa mwene oompotoolle aneerohellattho ekhoto ellapo ya mwene oomwera koma eneerolephela nave aneerohokollweella mwiillaponi mwaye.

¹⁰ “Anamwani a mwene oompoto eneerewaambiha ekhoto ni waatthukumaniha akhoto anchichi. Attheenaayo eneeroowa wonanko echigumula nave eneerohella ekhoto omwene woomwera ophiyera o mpanda wa mwene.

¹¹ Sika mwene oomwera aneerokhuma moonanariwa wi awane ekhoto ni mwene oompoto vamodda ni mullokwaaye wakhoto wawaata wunchichi nave aneerowugonjiha.

¹² Mulloko wakhotoolla ophariwe, mwene oomwerooyo aneerewaamba wiitukhulla ekaamba ya opambana waye nave aneeroowiipha athu ooheerengeya komave opambananko khovirellella.

¹³ “Mwene oompoto aneerotthukumanihattho mulloko wakhoto muullupalli okhwaranya wawaamboolle. Vivinre miyakha, aneeroowa ni mulloko wakhoto muullupalli ni ezida ddakhoto ddinchichi.

¹⁴ Mallapo yaayo athu anchichi eneeromuwukila mwene oomwera. Athu amodda amaraapwa mwa athwaawo alliwattho eneerowukila omwenooyo wi yeere nnddo woonilleewe m'masomphenyaayo koma eneerolephela.

¹⁵ Vano mwene oompoto aneerophiya ni waapheella muzinda ni mikhuttu ddakhoto nave aneerowuphara muzinda wampandooyo. Akhoto oomwera khellipa naari akhotwiiwa amasiva eneerolephela.

¹⁶ Sika mudani oompotooyo aneereweera ddoopaalla ddaye vawi khaavo anaallipanena. Aneerokeraattheya mu ellapo yooreeresesa nave ddittheddene ddinaakhalle m'mattani mwaye.

¹⁷ “Vano mwene oompoto aneeroowa ni masivaaye mattheene, weeseesa okeraatthiha murendelle ni mwene oomwera. Aneereweeseesa omuvelleella mwanaye wa mwene mukhwaayooyo wi amutthelle koma yoolingaaye khephura ello.

¹⁸ Vatulli viwa mwene oompoto aneerohella ekhoto ellapo dda mukhwipi mwa enyanja ni waagonjiha anchichi. Koma wiitukhulla wayenko oneeromallihiwa ni mmodda mwa akhoto muullupalli mwawi epewaaye eneeromuhokollweella.

¹⁹ Mwenooyo aneereweeseesa ohokollweella o mipanda ddoollipa dda ellapwaaye koma aneerokwakwatuwa ni wiikuha, oohivenyattho.

²⁰ “Vatulli va mwene yoolla vineerewooneya mwene mmodda oyo anaarume ookhomiha musonkho wi eyuuma ya omwenaaye yaate. Koma viviralle mallapo vang'ono mwenooyo aneerewiiphiwa ohiri moowalli apaalle vakhotoni.”

Mwene oompoto oonanara

²¹ “Munipuroni mwaye muneerovollowa muthu oonyambuseya, oohiphwanella okhalla mwene. Olliye anaawe moorurumusa nave aneerewaakha omwenooyo moolleka.

²² Aneerewiikariha ni otthollosa milloko ddakhoto naarittho enduna ya echipangano.

²³ Nave naari akeraatthihe mwiiwanano, aneereke ddawoottha. Naari akhalleve ni athu ooyeva, aneerokhallave ni masiva.

²⁴ Moorurumusa aneerohella ekhoto ezigawo ddeeyuuma ddinchichi dda ellapweeyo. Sika aneereweera nnddo attiitthinnya ni makhollwaaye kheneereke. Aneerokawa ddawaakha, ddoophariwa ni eyuuma variyari va oomuthwara. Aneerokhozekella ophara mizinda dda mipanda ddoollipa koma nndda ddineereye wa enthawi yooyeva.

²⁵ “Mwene oompoto aneerollipa murima ni otthukumaniha mulloko wakhoto wamasiva wunchichi wi awane ni mwene oomwera. Koma mwene oomwera aneerowanana ekhoto arittho ni mulloko wakhoto muullupalli wookhwaranya koma khapambana ekaamba yawi aneereweerelliwa ddoonamasikita.

²⁶ Naari oochana embale emodda eneerowukila. Mullokwaaye wakhoto oneerewoonongeya nave anchichi eneerewiiphiwa vakhotoni.

²⁷ Vatulli viwa mamwene meellaayo eneerochella vamodda koma mirima ddiwa ddinaakhalle ddoolleka nave eneerewoottotthana. Koma khephuravo ello ekaamba yawi enthawi khenaphiye.

²⁸ Sika mwene oompoto aneerohokollweella owaniwa ari ni katundu munchichi koma murimaaye oneeropaallesesa woononga echipangano yaweella. Aneereweera ddoopaalla ddaye nave aneerohokollweella owaniwa.

²⁹ “Viviralle enthawi, mwene oompoto aneerohokollweellattho omwera koma khapambana wonanko eerelleeye khalle.

³⁰ Ezombo dda o ellapo dda woovollowa nndduwa ddineerollipanana nave olliye aneerotathilla murima. Sika aneerohokollowa ashille murima wunchichi nave aneereweerella ddoonanara echipangano yaweella. Aneerewiiwanana ni athu ootathilla echipangano yaweella.

³¹ Akhotwaaye eneeronanariha enyumba ya Mulluku ni mpanda woollipa nave eneerohiiha mikutho ddooshellelliha dda nllapo ni nllapo. Wenko eneerewiimesawo Yoonanara Yawoononga.

³² Mwenooyo aneerewaalleka ni waakopa athu oovevulla echipangano yaweella. Koma athu oomudduwella Mullukwiiwa eneerollipihella nave eneeromukhoota olliye.

³³ Eezeru variyari va athwaayo eneerewaahuddiha ddinchichi akhwiiwa. Koma enthawi yeella eneerewiiphiwa ni nsupada ni munllo nave eneerophariwa ni waakhiwa.

³⁴ Athwaayo yaahoosiwaka ddiiddo amodda eneerewaakavihera koma anchichi ookaviheraayo enaakhalle oolleka.

³⁵ Amodda eezeru eneerewiiphiwa wi eweese, eweellihe ni waahuwa ophiyera enthawi yoomalliha vawi eneerophiya enthawi eyo Mulluku akeraatthihalleeye.”

³⁶ Mwene oompoto aneereweera ddoopaalla ddaye nave aneeroddunnuwiha ni oddeesa muullupalli okhwaranya milluku ddittheddene naari Mulluku a milluku. Ddittheddene ddineeromweetella phaama ophiyera enthawi eyo Mulluku anaamullakeeye moowalli ekaamba yawi nnddo ddisimikiziwe ddineereweereya.

³⁷ Mwenooyo aneerovevulla milluku dda makhollwaaye navettho mulluku ookondiwa ni atthiyana. Khapwatha dda arive mulluku kaambiiwa aneerewiitukhulla waakhwaranya attheene.

³⁸ Munipuroni mwiwa anaamullapelleke mulluku amipanda ddoollipa oyo makhollwaaye kheyaamudduwenlle. Aneerovelleella wa mullukooyo golide, siliva, malluku oowallamella mutengo ni emphaso ddooreeresesa.

³⁹ Aneerollipiha mipanda ddaye ni nikavihero na mulluku eelleto. Aneerekewaavaha olemu wunchichi ayo enamurumeyella olliye. Aneerowinnya olamulello va athu anchichi nave aneerewaakawella ellapo wonanko yoothuviwiiwa.

⁴⁰ Va enthawi yoomalliha mwene oomwera aneeromuhella ekhoto mwene oompoto. Koma mwene oompoto aneeromuthamakella moowalli wonanko ephevo yawoopiha ari ni magareta, athu oowella va akavalo ni esitima ddinchichi. Vano aneerovollowa mu ellapo ddinchichi ni waakwekweresa wonanko echigumula.

⁴¹ Aneerohella ekhoto ellapo yooreeresesa nave aneeroowiipha athu ooheerengeya. Koma Aedomu ni Amowabu navettho oohoollella a Aamoni eneerovulluwa.

⁴² Aneerohella ekhoto ellapo ddinchichi mwawi naari Iguputo khavulluwa.

⁴³ Mwenooyo aneerewaakha eyuuma ya golide ni siliva navettho ddeko ddoowallamella mutengo dda o Iguputo. Aneerewaagonjihattho a o Libya ni a o Kushi.

⁴⁴ Koma epilli yoovenyera wookhuma nndduwa ni ompoto eneeromoopiha nave aneerotimulla ashille murima wunchichi wi oononge ni waatthollosa athu anchichi.

⁴⁵ Aneerotthipella misasa ddaye ddoomwene variyari va enyanja ni mwaango waweella wooreera. Komave voomallihella mwenooyo aneerewiiphiwa oohikhallavo oomwaakihera.