Daniele 10 - Mawu a Mulluku

Daniele anoona masomphenya o muhinje wa Tigrisi

¹ Muyakha waneeraru wa mwene Kirusi a o Persiya, Daniele oyo aromolliwa Beliteshazara ahiiwa mawu a othenga wawoona oollota dda ekhoto yuullupalli. Daniele ahiiwesesa othengooyo oonilleeye ddeko m'masomphenya.

² Mallapo yaayo, miyaano Daniele kahinlla wa milungu miraru ddamututha.

³ Kaahiya ocha ddoocha ddaphaama. Ngaachille enama apaalle omuwirya vinyo nave ngiihenlle makhura va milungu miraru ddittheddenennddo.

⁴ Va nllapo na 24 na mweeri wawaamba, kaari vakhopella va muhinje muullupalli wa Tigrisi.

⁵ Kitukhullalle miittho, kaamoona muthu awanre ddabafuta ni laamba a golide a o Ufazi muyuununi mwaye.

⁶ Aakhalla ni mwiilli woonyezimella wonanko nlluku na berulo. Ekhovaaye yaari yoowala wonanko ettari. Miitthwaaye yaari wonanko mallumi amunllo. Miwono ddaye ni meto ddaye ddaari ddoowala wonanko mukuwa woopukutiwa phaama. Mawaaye yiiweya wonanko a mulloko wa athu.

⁷ Tti meekhave Daniele koonille ddekonnddo m'masomphenya koma ayo yaari ni miyaano kheyoonille nave yahoova wunchichi, ethawa yiipittha.

⁸ Miyaano kaahalla meekha kiwehaka ddeko ddenndda m'masomphenya muullupallaalla. Masivaaka yaamalla, ekhovaaka yaatthattuwa nave ekophollo ddaakimallella.

⁹ Nave kiiwalleemi mawu kahiivokhella vatthi moopopheya ekhove kikomowa.

¹⁰ Vatulli viwa nnatta naakittannya nikikokhoriha ni okiphariha vatthi kitthukumellaka m'makutthani ni m'miwononi.

¹¹ Olliye aakilleella wi, “We Daniele, ookondiwesesa, imella wiiwe mawu ayo kinuulleelleemi vawi koorumiwa wa weyaano.” Allotilleeye ddenndda wa miyaano, kahiimella kitthukumellaka.

¹² Koma olliye aallota wi, “We Daniele, ohoove vawi ovenyera nllapo nawaamba mvo wahiyalleewe murimaawo va odduwella ni wiiyeviha vamiitthoni va Mullukwaawo, nivekello nawo nahiiweya mwawi kiwiille wi kaakhulle.

¹³ Mungelo muullupalli a omwene wa o Persiya aakiimesa va mallapo 21 koma Mikaele, mmodda mwa angelo uullupalli, aakikavihera vawi kaakhalla wenko ni mungelo a o Persiya.

¹⁴ Sika koowa wi kuutthopoollelle nnddo ddinaaweereyelle athwaawo mallapo enawaalla. Ddeko waddoonilleewe m'masomphenyanndda ddineereweereya mallapo amuhoollo.”

¹⁵ Alloteeye ni miyaano mawaalla, kaarimi worii vatthi oohillota ello.

¹⁶ Vano mmodda awooneya wonanko muthu aattannya eyanwaaka. Olliye iimenlleve ddiiddo vamiitthoni vaka, kahaamba ollota wi, “Nyu Apwiyaaka, nnddo koonilleemi m'masomphenya ddookihoma murima nave nginna masiva.

¹⁷ Ethiyo kinaawore mwawiidde orumeyella shisha ollota ni Apwiyaaka? Masivaaka aakimallella nave nginawora ovuma.”

¹⁸ Vano awooneya wonanko muthoolle aakittannya, akihokollosellattho masiva.

¹⁹ Aallota wi, “We ookondiwesesa, ohoove. Murendelle okhalle ni weyaano. Khalla amasiva nave llipa murima.” Allotilleeye ddenndda, kaaphwanya masiva nave kaallota wi, “Apwiyaaka, llotani vawi mookillipiha.”

²⁰ Olliye aakikoha wi, “Ethiyo woodduwella eyo kiweelleemi wa weyaano? Kinaambe ohokollowa wi kawane ekhoto ni mungelo muullupalli a o Persiya. Vatulli viwa kamugonjiha mungelo muullupalli a o Griki aneeroowa.

²¹ Koma kineerewuulleella nnddo ddilembiwe mu nibukhu na yawoona. Khaavo mmodda anaawore okikavihera ohiri Mikaele, mungelwaanyu muullupalli.”