Daniele 1 - Mawu a Mulluku

Daniele ni akhwaaye o nthato na Nebukadinezara

¹ Muyakha waneeraru wa mwene Yehoyakimu a o Yuda, Nebukadinezara mwene a o Babiloni aahella ekhoto muzinda wa Yerusalemu.

² Apwiya yaamuvelleella m'mattani mwaye Yehoyakimu mwene a o Yuda vamodda ni ezipangizo ddimodda dda mu enyumba ya Mulluku. Nave aayaana o enyumba ya milluku ddaye o Babiloni addihiya mu ezipinda moosungellamo eyuuma.

³ Vano mwene aamulamula Ashipenazi, endunaaye yuullupalli wi aakuse amodda mwa akaporo a asombwe a Aisraele a mu nibanja na mwene navettho a mu mabanja oovuwa.

⁴ Asombwaalla yaphwanenlle okhalla ooreera, oohirakalla, eeruso va ezeru ddittheddene, oochenjera voodduwellani, oodduwella wiiwesesa ni oowora orumeyella o enyumba yoomwene, Yaahuddihe olemba ni ollota Ebabiloni.

⁵ Mwene aalamula wi nllapo ni nllapo evahiweke yoocha anacha mwene navettho vinyo anamuwirya mwene. Aalamulattho wi ehuddihiwe wa miyakha miraru nave vatulli viwa erumeyelleke o enyumba yoomwene.

⁶ Mwa asombwaalla vaakhalla amodda a o Yuda ayo manddiniiwa yaari Daniele, Hananiya, Mishaele ni Azariya.

⁷ Koma enduneeyo yahaavaha manddina mamodda monga Daniele nawi Beliteshazara, Hananiya nawi Shadrake, Mishaele nawi Meshaki nave Azariya nawi Abedenego.

⁸ Koma Daniele aallipa murima wi khiiripiha ni yoocha ya mwene apaalle ni vinyo oyo amuwiryeeye. Sika aaveka enduna wi emwaakhullelle wiihiiha.

⁹ Nave Mulluku ahoollowiha murima wa enduneeyo wi emweerelle echifundo Daniele.

¹⁰ Enduneeyo yaamulleella Daniele wi, “Kinamoova pwiyaaka mwene vawi tti olliye alamulalle dda yoocha ni yoowiryella. Nave awoonani wi munimoonda okhwaranya asombwe akhwiinyu animakiphadda muru.”

¹¹ Enduneelle yaamutthoolla kapitawo wi amuwehereke Daniele, Hananiya, Mishaele ni Azariya. Sika Daniele aamulleella kapitawooyo wi,

¹² “Muneese mallapo khumi asombwaanyuhi. Muninnye matthaapa a makukhu wi nicheke navettho maaddi wi niwiryeke.

¹³ Vano muphwanaphwanihe mmo ninooneyelleke asombwaanyuhi ni mmo enooneyelleke asombwaanyu amoddaalle, oocha yoocha ya mwene. Nave asombwaanyuhi muneerelle erive ello monga munoonelleenyu.”

¹⁴ Kapitawoolle aawaakhullella aweesa wa mallapo khumi.

¹⁵ Vano mallapo khumi emanlle, Daniele ni akhwaaye yahooneya amasiva ni ooneneva okhwaranya asombwe amodda attheene ayo yacha yoocha ya mwene.

¹⁶ Sika ovenyera vaavo kapitawooyo aavenyihavo yoocha ya mwene vamodda ni vinyo oyo yaphwanelliiwa omuwirya nave aawaakhullella wi evirellelle ocha matthaapa a makukhuve.

¹⁷ Asombwe asesaalla Mulluku ahaavaha ezeru ddawiiwesesa mawu mattheene a m'mabukhuni navettho mahuddero oowallamella. Daniele aakhallattho ni eruso yoottaphullella erive masomphenya ni ddoolloha.

¹⁸ Vano enthawi akeraatthihalle mwene yakwakhwanniiwa, enduna yuullupalli yahaavelleella asombwe attheene wa Nebukadinezara.

¹⁹ Mwene ahaallotiha nave aaphwanya wi khaavo aari wonanko Daniele, Hananiya, Mishaele ni Azariya. Sika alliwa yahaamba orumeyella o enyumba yoomwene.

²⁰ Enthawi ddittheddene mwene akoha ddeko ddoopaalleya ezeru ni wiiwesesa, aanaphwanya wi alliwa yaanaakhwaranya wunchichi amasenga ni awoombesa a mu omwenaaye ottheene.

²¹ Daniele aakhalla wenko ophiyera muyakha wawaamba wa mwene Kirusi.