Aroma 8 - Mawu a Mulluku

Okhalla ni okumi mwa Munepa Waweella

¹ Vano athu ayo enakhalla mu eyaattano ni Khrisitu Yesu khenna mullatu vamiitthoni va Mulluku.

² Vawi malamulo a Munepa Waweella, ayo enanivaha okumi mu eyaattano ni Khrisitu Yesu, yookittaphulla miyaano o malamulo a machimo ni okhwa.

³ Mulluku aheera eyo malamulo a Mose yahiwonriiwa weera kaambiiwa omuthu waalephela. Olliye aahumullulla machimo oomuthwaayo voomurumihani mwanaye, oyo aawiille mwa mwiilli wonanko muthu oochimwa wi amallihe machimo.

⁴ Mulluku aheera ddenndda wi echilungamo yoopaalleya ya malamulo ekwakhwanihiwesese mwa hiyaano ninakhalla moollikana ni Munepa ohiri moollikana ni omuthu.

⁵ Athu ayo enakhalla moollikana ni omuthwiiwa, maganizwiiwa eneetihiwa ni ddoopaalla dda omuthu. Athu ayo enakhalla moollikana ni Munepa, maganizwiiwa eneetihiwa ni ddoopaalla dda Munepa.

⁶ Weetihiwa ni omuthu omallihella wene tti okhwa koma weetihiwa ni Munepa omallihella wene tti okumi ni murendelle.

⁷ Sika vano athu yaaweetihiwaka ni omuthwiiwa enakhalla adani a Mulluku vawi kheniiwellella malamulo a Mulluku nave khenaworattho owiiwellella yaayo.

⁸ Athu ayo enakhalla moollikana ni omuthwiiwa khenawora omuhakallalliha Mulluku.

⁹ Koma nyuwaano khamunakhalla moollikana ni omuthwaanyu koma munakhalla moollikana ni Munepa, Munepa a Mulluku aari akhallaka mwa nyuwaano. Muthu oyo ahinna Munepa a Khrisitu khanakhalla a olliye.

¹⁰ Koma Khrisitu akhalla mwa nyuwaano, Munepooyo tti okumaanyu kaambiiwa moolungamihiwa ni Mulluku naari miilli ddanyu ddineerokhwa ekaamba ya machimo.

¹¹ Vawi Munepa a Mulluku, oyo waamuvenyihalle Yesu wa ookhwa, wakhalla mwa nyuwaano, vano yooyo aamuvenyihalle Khrisitu Yesu wa ookhwa avahattho miilli ddanyu ddookhwanndda okumi, munepaaye wakhalla mwa nyuwaano.

¹² Sika vano, asinnaka ni arokoraka, khaninaphwanella okhalla moollikana ni omuthwaahu onapaallelliiwa.

¹³ Vawi mwakhalla moollikana ni omuthwaanyu, muneerokhwa koma mwahiya ddaweera ddanyu ddoonanara mookaviheriwa ni Munepa Waweella, muneerokhalla akumi.

¹⁴ Athu ayo enahoollelliwa ni Munepa a Mulluku tti anamwani a Mulluku.

¹⁵ Vawi Munepa oyo Mulluku uuvahilleeyeni khonaweerani akaporo ayo enakhalla mwawoova koma Munepooyo onaweerani anamwani a Mulluku nave ekaamba ya masiva a Munepooyo ninnamweera Mulluku wi, “Abba” ottaphullella wi, “Attiitthaaka!”

¹⁶ Munepa a Mulluku anniiwanana ni mirima ddahu wi hiyaano tti anamwani a Mulluku.

¹⁷ Vawi hiyaano tti anaaye, nineerewaakhella madaliso anaasungelleeye athwaaye, ninaakhelle ddenndda nimodda ni Khrisitu vawi noona ddoohoosa ni Khrisitu, nineerewaakhellattho ntitimiho naye.

Ntitimiho nineereehu naakhelle

¹⁸ Kinnasimikiza wi ddoohoosa dda mallapo yaalla khaddinaphwanaphwana ni ntitimiho ninawanno nno ninawuupullulliwe wa hiyaano.

¹⁹ Erive ello eyo yaphatusiwe ennatiyera moopaalla wi Mulluku awuupullulle anaaye.

²⁰ Vawi erive ello eyo yaphatusiwe yaheerihiwa wi elamulelliweke ni ddeko ddoohikhalla ni mutteko, ohiri ni opaalla wiwa koma kaambiiwa Mulluku aapaalla wi ddikhalle ddiiddo. Koma waakhalla otiyerella

²¹ wi erive ello eyo yaphatusiwe, nllapo nimodda, eneerottaphulliwa mu okaporo wa eyuute nave eneerokhalla mu ottaphuwa owaaka mu ntitimiho na anamwani a Mulluku.

²² Vawi ninnadduwella wi ophiyera vano ddoophatusiwa ddittheddene ddinniipullella ekaamba ya ovoreya, ovoreya wene wonanko mutthiyana aayaraka.

²³ Koma khe ddoophatusiwave ddiniipullella, hiyaanottho niri ni Munepooyo, emphaso yawaamba ya Mulluku ninniipullella m'murimani mwahu ninatiyereehu wi Mulluku aneere anaaye nave attaphulle omuthwaahu.

²⁴ Naavullusiwehu naakhalla ni otiyerella. Vano noona eyo ninatiyerelleehu, kohiyottho ootiyerella. Vano ttaani mwa hiyaano anatiyera eyo anooneeye?

²⁵ Koma naatiyerellaka eyo nihinooneehu, ninnatiyerella yeeyo moovillella.

²⁶ Munepa annawattho onikavihera kaambiiwa hiyaano tti oofooka vawi khaninadduwella mmo ninaphwanellaahu ovekella. Munepa mwaneena annanivekella wa Mulluku ddookhupanya ddoohiworeya ollota.

²⁷ Nave Mulluku oyo anoona m'murimani mwahu, annadduwella maganizo a Munepa kaambiiwa Munepa annaavekella athu a Mulluku moollikana ni opaalla wa Mulluku.

²⁸ Ninnadduwella wi mu ddeko ddittheddene Mulluku annaphara mutteko va athu ayo enamukonda wi ddaakhallelle phaama. Athu yaayo tti ayo aawiithanneeye moollikana ni yoolingaaye.

²⁹ Athu ayo Mulluku aatthoonlleeye khalle, aaweera wi ekhalle wonanko Mwanaye wi Mwaanooyo akhalle awaamba mu nibanja nuullupalli.

³⁰ Nave ayo yatthoolliwe ni Mulluku, aawiithana nave awiithaniwaayo, ahaalungamiha nave ahaavaha ntitimiho naye.

Echikondi ya Mulluku mwa Khrisitu Yesu

³¹ Ethiyo vano mu ddittheddenenndda, ninaallote tini? Mulluku akhalla ni hiyaano, anaanivaanyihe ttaani?

³² Mulluku khaaniimaanne Mwanaye ayeekha koma aamuvelleella ekaamba ya hiyaano attheene! Vawi aanivaha Mwanaye, khanivahattho ddeko ddittheddene?

³³ Ttaani anaawiipe mullatu athu ootthoolliwa a Mulluku? Mulluku mwaneena sika anawoona wi khenna mullatu!

³⁴ Ttaani vano anaaweeruze wi tti oochimwa? Khaavo. Vawi Khrisitu Yesu, aakhwa nave aavenyihiwa wa ookhwa nave annakhalla o nnattanatta na Mulluku, olliyettho annanivekella hiyaano attheene!

³⁵ Ttaani vano anaanimwallanihe ni echikondi ya Khrisitu? Ethiyo ddookatamiha apaalle ddoovoreya, ohoosiwa, ettalla, ohoowa, ddawoopopiha apaalle okhwa ttuuweera ddenndda?

³⁶ Mawu a Mulluku eni, “Mallapo mattheene ninnoopopihiwa wi niiphiwe ekaamba ya nyuwaano, nineesiwa wonanko enkhosa ddinaya wawiiphiwa.”

³⁷ Koma mu ddeko ddittheddenenndda ninnapambana wunchichi oweella mwa olliyooyo ananikonda hiyaano!

³⁸ Vawi kinnasimikiza wi kheyiivo enaanimwallanihe ni echikondaaye naari okhwa apaalle okumi naari angelo oolamulella apaalle masiva amodda ooddullu naari dda muttano apaalle ddamuhoollo,

³⁹ naari ddooddullu apaalle dda vatthi. Kheyiivo mu ddoophatusiwa ddittheddene enaawore onimwallaniha hiyaano ni echikondi ya Mulluku yawiille wa hiyaano oweella mwa Khrisitu Yesu Apwiihu.