Aroma 7 - Mawu a Mulluku

Dda echisanzo ya okwati

¹ Asinnaka ni arokoraka, ddawoona munniiwesesa kinaakeemi killote kaambiiwa attheenenyu munnadduwella malamulo. Malamulo ennaalamulella athu mallapo mattheene enakhalliiwa mukumi

² Hankoni niphwanaphwanihe ni mutthiyana ootthelliwa, olliye annapataana ni mamune ekaamba ya malamulo mallapo mattheene mullopwanooyo anakhalleeye mukumi. Koma mullopwanooyo akhwa, mutthiyanooyo oottaphulliwa o malamulo yaapataanihallaalle.

³ Sika vano akona ni mullopwana mmodda mamune ari mukumi, aneeroromolliwa ooraruwa. Koma mamune akhwa, mutthiyanooyo asuzuliwa, sika khanararuwa atthelliwa ni mullopwana mmodda.

⁴ Emoddamoddave yeeyottho nyuwaano, asinnaka ni arokoraka, malamulo khennattho masiva va nyuwaano. Muri wonanko ookhwa o masivaayo, ekaamba ya okhwa wa Khrisitu. Vano moopataana ni mmodda oyo aavenyihiwe wa ookhwa wi nimurumeyelle Mulluku.

⁵ Vawi nalamulelliweehu ni omuthu, malamulo yaananeeriha wi nikhalle ni minkhella ddoochimwa. Minkhelanndda ddaanalamulella mwiillaahu muttheene oneeriha wi nikhwe.

⁶ Koma vano noottaphulliwa omalamuloni kaambiiwa niri wonanko ookhwa, omwallana ni malamulo ayo yaanimakille. Vano ninnamurumeyella Mulluku mu ettilla yanaanweene vawiiwellellani munepaaye ohiri orumeyella mu ettilla yakhalle ya malamulo oolembiwa.

Dda malamulo ni dda machimo

⁷ Vano ninaallote tini? Ethiyo ninaallote wi malamulo tti machimo? Khe ddiiddo! Koma malamulo yaariki ehikhallewo, ngaadduwelle machimo. Nave ngaadduwelle osilila malamulo yaariki ehillote wi, “Ohisilile.”

⁸ Koma ekaamba ya malamulo yaalla, machimo yaaphwanyellavo ekari yaakitthattusa oosilila wunchichi. Vawi voohikhalla malamulo, machimo khenna masiva.

⁹ Khalle kaanakhalla mukumi malamulo ehiiwo koma malamulo yawiilliiwa, machimo yaakhalla ni masiva,

¹⁰ nave yaakeeriha wi kikhwe. Sika malamulo ayo yaphwanenlle okeeriha wi kikhalle mukumi, yaakeeriha wi kikhwe.

¹¹ Vawi machimo yaaphwanyellavo ekari va malamulo sika yaakilleka nave ekiipha.

¹² Vano malamulo mattheene tti aweella, awoona navettho aphaama.

¹³ Ethiyo ello yaphaameella sika yeerihalle okhwa waka? Khe ddiiddo! Yoochimwa sika yeerihalle. Voopharihani mutteko yaphaama yeella, machimo yaakiipha miyaano wi yawoona ya yoochimweeyo yuupullulliwe. Sika vano, ekaamba ya malamulo machimo yohooneya wi tti oonanara wunchichi.

Makhallello meelli oollipana m'murimani mwa muthu

¹⁴ Ninnadduwella wi malamulo tti a Munepa Waweella koma miyaano tti muthu vawi kookullihiwa mu okaporo wa machimo.

¹⁵ Kineereemi nginiiwesesa vawi ngineera eyo kinapaalleemi weera koma kineera eyo kiniiteemi.

¹⁶ Vano keera eyo kihinapaalleemi, kinnaakhullella wi malamulo tti aphaama.

¹⁷ Sika khe miyaano kineera yoonanareella koma tti machimo enakhalla mwa miyaano.

¹⁸ Vawi kinnadduwella wi yaphaama khenakhalla mwa miyaano, muthu. Vawi naari kaapaallaka weera yaphaama, nginawora weera.

¹⁹ Vawi ngineera yaphaama eyo kinapaalleemi weera koma kineera yoonanara kihinapaalleemi weera.

²⁰ Keera eyo kihinapaalleemi weera, ngihiyo miyaano kineera yeella koma tti machimo enakhalla mwa miyaano.

²¹ Sika kinnoona wi lamulo noothwarellellanna ninnaphara mutteko wi kapaalla weera yaphaama kinawatiheriwa weera yoonanara.

²² Murimaaka muttheene onnahakallalla ni malamulo a Mulluku.

²³ Koma kinnoona malamulo amodda mwa miyaano epharaka mutteko, malamulo oollipana ni malamulo awaakhullelliwa ni murimaaka. Malamulo yaalla yaakeeriha okhalla kaporo a malamulo a machimo ayo enaphara mutteko mwa miyaano.

²⁴ Mi tti muthu ootulli! Ttaani anaakaakihe ovenyera o omuthu olla onakikusella okhwa?

²⁵ Mulluku athokoziwe, oyo aneera ddenndda oweella mwa Apwiihu Yesu Khrisitu! Sika vano miyaano kinniiwellella malamulo a Mulluku ni murima waakave koma omuthwaaka oniiwellella malamulo a machimo.