Aroma 6 - Mawu a Mulluku

Okhalla ni okumi mwa Khrisitu

¹ Vano ninaallote tini? Nivirellellekeve ochimwa wi echisomo ya Mulluku yaanjerereye?

² Khe ddiiddo! Ethiyo ninaavirellelle ochimwa mwawiidde vawi niri wonanko athu ookhwa o masiva a machimo?

³ Ddawoona munnadduwella wi naabatiziweehu valle mu eyaattano ni Khrisitu Yesu, naabatiziwe mu eyaattano ni okhwa waye.

⁴ Obatizwaahu tti wonanko okhwa ni ovitthiwa vamodda ni olliyooyo wi nikhallena okumi wanaanweene, wonanko mmo Khrisitu aavenyihiweeye wa ookhwa ni masiva antitimiho na Attiitthiihu.

⁵ Vawi naari amodda ni Khrisitu mu okhwa wonanko olliye, emoddamoddave yeeyo nineerokhalla amodda ni olliyooyo voovenyihiwani wa ookhwa.

⁶ Nave ninnadduwella wi makhallellwaahu akhalle aakhwa vamodda ni Khrisitu vamutandani wi masiva a makhallellwaahu oochimwa yoonongiwe wi nihikhalle akaporo a machimo.

⁷ Vawi athu yakhwa, ennattaphulliwa o masiva a machimo.

⁸ Vawi naakhwa ni Khrisitu, ninnakhulupilila wi nineerokhallattho ni okumi ni olliyooyo.

⁹ Vawi ninnadduwella wi Khrisitu oovenyihiwa wa ookhwa nave wi khakhwattho, sika okhwa khonnattho masiva va olliyooyo.

¹⁰ Nave kaambiiwa aakhwa, machimo khenna masiva va olliyooyo naari vang'ono. Nave vano anakhalla moomurumeyella Mulluku.

¹¹ Sika nyuwaanottho muddooneke wonanko tti ookhwa o masiva a machimo navettho oomurumeyella Mulluku oweella mwa Khrisitu Yesu.

¹² Sika muhaakhullelle wi machimo evirellelle olamulella makhallellwaanyu akhalle wi eweeriheni wiiwellella minkhella ddiwannddo.

¹³ Naarittho muhiivelleelle nyookha o machimo wi muphare mutteko woonanara. Koma nyuwaano muvenyihiwe wa ookhwa wi mukhalle akumi, mwiivelleelle nyookha wa Mulluku navettho mwiivelleelle wa olliyooyo wi muphare mitteko ddoolungama.

¹⁴ Muhaakhullelle wi machimo yuulamulelleni vawi khamunalamulelliwa ni malamulo koma munalamulelliwa ni echisomo ya Mulluku.

Akaporo aweera echilungamo

¹⁵ Vano ninaallote tini? Ethiyo nichimweke kaambiiwa khaninalamulelliwa ni malamulo koma ninalamulelliwa ni echisomo ya Mulluku? Khe ddiiddo!

¹⁶ Ethiyo munnadduwella wi mwiivelleella wa muthu mmodda muneerokhalla akaporo oomwiiwellella, munakhalla akaporo a yooyo? Mwakhalla akaporo a machimo muneerokhwa koma mwakhalla akaporo a Mulluku muneerokhalla oolungama vamiitthoni vaye.

¹⁷ Koma Mulluku athokoziwe! Vawi naari khalle mwaari akaporo a machimo, mohiiwellella ni murimaanyu muttheene yawoona ya ehuddiho eyo munathwareenyu moohiyavo murima.

¹⁸ Mwaattaphulliwa o masiva a machimo nave vano mookhalla akaporo aweera echilungamo.

¹⁹ Kinallota wonanko mmo muthu anallotelleeye wi mwiiwesese. Khalle mwahiivelleella wi mukhalle akaporo a machimo ni a ddoonanara wi mukhalle mu mitteko ddoonanara. Emoddamoddave yeeyo vano mwiivelleelle wi mukhalle akaporo oolungama wi mukhalle mu mitteko ddaweella.

²⁰ Mwaariinyu akaporo a machimo, khamwaawatiheriwa weera echilungamo.

²¹ Ethiyo mwaphunrevo tini? Ddeko ddoowulliha muru nnddo dduuhoollellani wuukhwaani. Omallihella wene wa ddeko ddennddo tti okhwa.

²² Koma vano moottaphulliwa o machimo nave nyuwaano tti akaporo a Mulluku. Yoophuravwaanyu tti okumi waweella oyo onawuhoollelleni o okumi woohimalla.

²³ Vawi mallivello a machimo tti okhwa. Koma emphaso ya Mulluku tti okumi woohimalla mu eyaattano ni Khrisitu Yesu Apwiihu.