Aroma 5 - Mawu a Mulluku

Okhalla oolungama vamiitthoni va Mulluku

¹ Vawi vano Mulluku aanilungamiha kaambiiwa ninnamukhulupilila, nookhalla vamurendelleni ni Mulluku oweella mwa Apwiihu Yesu Khrisitu.

² Kaambiiwa naamukhulupilila Yesu Khrisitu aaneeriha wi noonena echisomo ya Mulluku, eyo eri matthipellellwaahu. Nave vano ninnahakallalla wi ninnatiyera okhalla ni ntitimiho na Mulluku!

³ Ninnahakallallattho ni ddoohoosa ddahu kaambiiwa ninnadduwella wi ddoohoosa ddinnaneeriha wi nikhalle oovillella.

⁴ Ovillella onnaneeriha waakhullelliwa ni Mulluku nave waakhullelliwaangu onnaneeriha otiyera.

⁵ Nave otiyera wonngu khonaniwulliha muru kaambiiwa Mulluku, oweella mwa Munepa Waweella oyo anivahilleeye, aaddalliha mirima ddahu ni echikondaaye.

⁶ Khrisitu aanikhwella naariihu oochimwa ni oofooka va enthawi Mulluku apanlleeye.

⁷ Tti ello yoorama muthu mmodda okhwa ekaamba ya muthu oolungama. Koma apaalle muthu mmodda opaalla okhwa ekaamba ya muthu aphaama.

⁸ Koma Mulluku ahooniha echikondaaye va hiyaano kaambiiwa Khrisitu aanikhwella naariihu oochimwa.

⁹ Vawi noolungamihiwa ni Mulluku ekaamba ya nikhame na Yesu, vano yookatamiha ttiivi ovullusiwa o osha murima wa Mulluku.

¹⁰ Naari adani a Mulluku koma nahaattanihiwa ni Mullukooyo oweella mu okhwa wa mwanaye. Sika vawi hiyaano nahaattanihiwa ni Mulluku, ndithu, okumi wa Khristu oneeronivullusa.

¹¹ Khe yeeyove komattho ninnahakallalla mwa Mulluku oweella mwa Apwiihu Yesu Khrisitu oyo anaattanihalle ni Mullukooyo.

Ohiyana wa Adamu ni Khrisitu

¹² Machimo yaavollowille mu ellapo yavatthi ekaamba ya muthu mmodda, Adamu nave machimo yaalla yaawaana okhwa. Ekaamba ya yeella okhwa woohaphiyera athu attheene kaambiiwa arive muthu aachimwa.

¹³ Machimo yaari erimo mu ellapo yavatthi malamulo ehinavelleelliwe. Vano malamulo yaahikhallawo, machimo kheneerengelliwa.

¹⁴ Koma ovenyera va enthawi ya Adamu ophiyera va enthawi ya Mose, okhwa waalamulella va athu attheene naari va ayo yachimwalle moohiyana ni Adamu ahiiwellelleeye olamula wa Mulluku. Adamu anaphwanaphwanihiwa ni oyo Mulluku allotilleeye wi aneeroowa, Khrisitu.

¹⁵ Koma eellaalla khe oophwanaphwana kaambiiwa emphaso ya Mulluku khenaphwanaphwana ni machimo a Adamu. Tti ddawoona wi athu anchichi yaakhwa ekaamba ya machimo a muthu mmoddooyo. Koma echisomo ya Mulluku tti yuullupalli koma emphaso ya echisomo ya Mulluku tti yuullupalli navettho ennaaphiyera athu anchichi oweella mwa muthu mmodda, Yesu Khrisitu.

¹⁶ Nave vookhalla ohiyana wa emphaso ya Mulluku ni machimo a muthu mmodda. Vawi nichimo nimodda naawiiha weeruziwa ni ollakiwa koma emphaso ya echisomo yahaalungamiha athu anchichi naari machimwiiwa yaari manchichi.

¹⁷ Tti ddawoona wi ekaamba ya nichimo na muthu mmodda, okhwa onnalamulella ekaamba ya muthu mmodda yooyo. Koma ddoothwarellella enre muthu mmodda, Yesu Khrisitu, tti dduullupalli. Athu attheene ennaakhella echisomo yuullupalli ya Mulluku nave ennalungamihiwa nave ennaakhella okumi woohimalla oweella mwa olliyooyo.

¹⁸ Sika nichimo nimodda naawaana ollakiwa wa athu attheene, emoddamoddave yeeyo yaweera ya echilungamo emodda ennaattaphulla athu attheene nave ennaavaha okumi woohimalla.

¹⁹ Vawi ohiiwellella wa muthu mmodda waheeriha wi athu anchichi ekhalle oochimwa, emoddamoddave yeeyo, athu anchichi eneerewaakhullelliwa ni Mulluku wi tti oolungama ekaamba ya wiiwellella wa muthu mmoddoolle.

²⁰ Malamulo yaavelleelliwa wi athu edduwelle waata wa machimwiiwa koma machimo yaatilliiwa, echisomo ya Mulluku yahaanjerereya.

²¹ Sika vano vawi machimo yaanalamulella ohoollella o okhwa, emoddamoddave yeeyo, vano echisomo ya Mulluku ennalamulella oweella mu echilungamo, ennanihoollella o okumi woohimalla oweella mwa Yesu Khrisitu Apwiihu.