Aroma 3 - Mawu a Mulluku

¹ Ethiyo vano okhalla Muyuda tti waphaama mwawiidde? Apaalle ophaddiwa onapindula tini?

² Okhalla Muyuda tti waphaama mu ettilla ddittheddene! Vawaamba, Mulluku ahaavaha Ayuda mawaaye wi yaasunge.

³ Koma amodda a yaayo yaariki oohiroromelleya, yeella khenattaphullella wi Mulluku tti oohiroromelleya?

⁴ Khe ddiiddo! Mulluku tti awoona naari athu attheene eri awoottha. Mawu a Mulluku enallotattho wi, “Nyu, Mulluku, mwaallotaka arive muthu annoona wi munnallota ddawoona, munnapambana mu orive mullatu.”

⁵ Vano ddaweera ddahu ddoonanara ddooniha echilungamo ya Mulluku, ninaallote tini? Ethiyo ttuuwora ollota wi Mulluku khanna echilungamo voonillakani? (Kinallota wonanko mmo muthu anallotelleeye.)

⁶ Khe ddiiddo! Mulluku aarimi ari oohikhalla ni echilungamo, anaaweeruze ellapo yavatthi mwawiidde?

⁷ Koma weera ddoonanara waka waavelleellaka ntitimiho wa Mulluku wooniha wi olliye tti awoona kaambiiwa tini wi miyaano keeriweemi oochimwa?

⁸ Vano nihinallotella tini wi, “Hankoni neere ddoonanara wi ddaphaama ddiwe?” Athu amodda yoonillotella epewe nave yooniipa mullatu wi hiyaanottho ninnallota ddeko ddenndda! Yaayo eneerollakiwa moophwanellella.

Khaavo ari oolungama

⁹ Nave vano, ethiyo hiyaano Ayuda niri aphaama waakhwaranya athu ayo ehiri Ayuda? Khe ddiiddo! Koollota khalle wi Ayuda ni athu ayo ehiri Ayuda enalamulelliwa ni machimo.

¹⁰ Mawu a Mulluku eni, “Khaavo muthu naari mmodda, ari oolungama

¹¹ khaavo muthu aniiwesesa khaavo muthu anamwaashaasha Mulluku.

¹² Attheene aamureya Mulluku etulli, attheene aatthattuwa oohikhalla ni mutteko, khaavo aneera ddaphaama naari mmodda.

¹³ Ommilloni wiwa tti wonanko mahame ookatakata, ennalleka ni mallumiiwa, ddoovenyera muwano mwiwa ddiri wonanko nttipwi na enowa.

¹⁴ Ennallota ddootembelela ni ddoovoriiha murima.

¹⁵ Ennathamakella owiipha athu.

¹⁶ Orive otthewene enayiiwa, ennaahoosa athu ni waavoreya.

¹⁷ Khenadduwella ettilla ya murendelle.

¹⁸ Navettho khenamoova Mulluku.”

¹⁹ Vano ninnadduwella wi erive ello m'malamuloni mmo enallota dda ayo enalamuliwa ni malamulwaayo wi athu ehikhalle ni mawu oothawellavo nave wi ellapo yavatthi ettheene yeeruziwe ni Mulluku.

²⁰ Vawi Mulluku khaamulungamihalle arive muthu vamiitthoni vaye ekaamba ya wiiwellella malamulo. Malamulo enakhulla moona waadduwelliha athu wi aachimwa.

Mmo Mulluku ananilungamihelleeye

²¹ Nave vano mmo Mulluku anaalungamihelleeye athu moohuupullulliwa. Naari malamulo a Mose ni ehuddiho ya anamallotella tti mboni dda olungamihiwanngu.

²² Koma Mulluku annaalungamiha athu ekaamba ya echikhulupililwiiwa mwa Yesu Khrisitu. Mulluku aneera yeella wa athu attheene enakhulupilila mwa Khrisitu kaambiiwa khuwaavo ohiyana variyari va Ayuda ni athu ayo ehiri Ayuda.

²³ Arive muthu oochimwa nave oorekamellana ni ntitimiho na Mulluku.

²⁴ Koma athu enalungamihiwa ni emphaso ya echisomo ya Mulluku oweella mwa Khrisitu Yesu oyo anawoopolla.

^25-26 Mulluku aanivaha yooyo wi ni nikhame naye akhalle ookhululukella machimo a athu oweella mu echikhulupililwiiwa mwa olliyooyo. Mulluku aheera yeella wi oonihe wi olliye tti oolungama. Khalle aanalleva nave ahaahiyerera athu oochimwa koma mallapo yaalla khanalleva machimwiiwa wi oonihe wi olliye tti oolungama. Mu ettilla yeella Mulluku annooniha wi olliye yeekhaaye tti oolungama voomulungamihani arive muthu oyo anamukhulupilila Yesu.

²⁷ Vano ninitukhullelle tini? Khayiivo! Nave kaambiiwa tini? Apaalle tti kaambiiwa ninniiwellella malamulo? Khe ddiiddo! Koma tti kaambiiwa ninnakhulupilila.

²⁸ Vawi ninamalliha ni wi muthu analungamihiwa oweella mu echikhulupililove nave ohiri vawiiwellellani malamulo.

²⁹ Ethiyo Mulluku tti a Ayudave? Ethiyo kahiyottho Mulluku a athu ayo ehiri Ayuda? Ddawoona, tti Mullukuttho a athu ayo ehiri Ayuda.

³⁰ Mulluku tti mmoddave nave awaalungamiha Ayuda ekaamba ya echikhulupililwiiwa navettho awaalungamiha athu ayo ehiri Ayuda ekaamba ya echikhulupililwiiwa.

³¹ Ethiyo malamulo khenna mutteko ekaamba ya echikhulupililo? Khe ddiiddo! Koma ninnasimikiza malamulwaayo.