Aroma 2 - Mawu a Mulluku

Echiweruzo ya Mulluku

¹ Vano nyuwaano munaweeruza amodda, ethiyo munaddeesa wi nyuwaano ttaani! Khamunna mawu oothawellavo vawi mwaaweeruzaka athu amodda koma nyuwaano muneerattho ddeko ddimoddave ddennddo eneeriiwa, munaddiipa mullatu nyookha.

² Attheene ninnadduwella wi echiweruzo ya Mulluku va athu eneera ddeko ddenndda tti yawoona.

³ Koma nyuwaano mwaaweeruzaka ayo eneera ddeko ddenndda, nyuwaano mweerakattho, munaganiza wi muneerothawa echiweruzo ya Mulluku?

⁴ Apaalle munnavevulla oreera murima waye wunchichi, olleva waye ni ovillella waye. Ethiyo khamunadduwella wi Mulluku tti ooreera murima kaambiiwa annuuhoollellani wi murukunuwe murima.

⁵ Koma ekaamba ya wumma murima wanyu ni ohipaalla orukunuwa murima, Mulluku aneerewuullakani wunchichi va nllapo nno aneereeye uupullulle osha murima waye ni echiweruzwaaye yeechilungamo.

⁶ Vawi Mulluku aneeromuthuva arive muthu moollikana ni mitteko ddaye.

⁷ Sika athu ayo enavirellellave weera ddaphaama nave enaashaasha ntitimiho ni okumi woohimalla ovenyera wa Mulluku, Mulluku aneerewaavaha okumi woohimalla.

⁸ Koma ayo eri awiikonda nave oohithwara yawoona koma enathwara yoonanara, Mulluku aneerewaashella murima wunchichi.

⁹ Attheene aweera ddoonanara eneerohoowa ni woona ovoreya, waambeella Ayuda owaakattho athu ayo ehiri Ayuda.

¹⁰ Koma Mulluku aneerewaavaha athu attheene eneera ddaphaama ntitimiho ni murendelle, waambeella Ayuda okomihera athu ayo ehiri Ayuda.

¹¹ Vawi Mulluku khanaweha ekhove.

¹² Athu ayo ehiri Ayuda khenna malamulo a Mose yaachimwaka nave eneerewoonongiwa naari ehinna malamulwaayo. Ayuda aakhalla ni malamulo yaalla yaachimwaka nave eneeruziwe ni malamulo yaayo.

¹³ Vawi khehiyo athu awiiwa malamulove enaalungamihiwe vamiitthoni va Mulluku koma ayo eniiwellella malamulwaayo.

¹⁴ Athu ayo ehiri Ayuda khenna malamulo a Mose koma yeeraka ddoollotiwa m'malamuloni mwa weekhiiwa, ennooniha wi aakhalla ni malamulwaayo m'murimani mwiwa.

¹⁵ Makhallellwiiwa enooniha wi ddoollotiwa m'malamuloni mmo ddoolembiwa m'mirimani mwiwa. Yawuupusella murimiiwa enneerella omboni wi nndda tti ddawoona vawi maganizwiiwa ennawiipa mullatu nave enthawi ddimodda ennawaakhullella.

¹⁶ Nave vano moollikana ni othenga waphaama kinallalleyeemi, mmu sika ddinaakhallelliiwa va nllapo nno Mulluku aneeruzeeye ddookhuweya m'mirimani mwa athu attheene oweella mwa Khrisitu Yesu.

Dda Ayuda ni malamulo

¹⁷ Koma vano nyuwaano muniiromolla wi Ayuda, munaroromella mu malamulo nave muniitukhulla ni waattana wanyu ni Mulluku,

¹⁸ munnadduwella eyo Mulluku anapaalleeye wi mweere nave ovenyera m'malamuloni moohuddera otthoolla yawoona,

¹⁹ nave munnasimikiza wi nyuwaano tti oohoollella a oohoona navettho tti owala wa ayo eri mwiipiphini,

²⁰ navettho ahuddihi a athu ookarangeya ni athu oohidduwella. Munnasimikiza wi m'malamulonaayo munnaphwanyamo ezeru ni ddawoona ddittheddene.

²¹ Munnaahuddiha athu amodda koma nyuwaano khamuniihuddiha nyookha. Munnallalleya wi, “Muhiiyeke” koma nyuwaano munniiyattho.

²² Munallota wi, “Muhiraruweke,” koma nyuwaano munnararuwattho. Munniitana ni mafano koma nyuwaano munniiya ovenyera mu enyumba ddiwa.

²³ Munniitukhulla wi mookhalla ni malamulo a Mulluku koma nyuwaano munnamuwulliha muru Mulluku voohiiwellellani malamulwaayo.

²⁴ Mawu a Mulluku eni, “Athu ayo ehiri Ayuda ennamullotella epewe Mulluku ekaamba ya nyuwaano Ayuda.”

²⁵ Mwiiwellellaka malamulwaayo, ophaddiwa wanyu tti woopinduliha koma mwaahiiwellellaka malamulwaayo muri wonanko oohiphaddiwa.

²⁶ Vano muthu oyo ahiri Muyuda, oyo ahiphaddiwe, iiwellellaka malamulwaayo, ethiyo Mulluku khamweera oophaddiwa?

²⁷ Athu ayo ehiphaddiwe koma enniiwellella malamulo eneerewuuvaanyihani nyuwaano muri ni malamulo nave moophaddiwa kaambiiwa khamuniiwellella malamulo.

²⁸ Muyuda awoona khahiyo oyo anooneya wonanko Muyuda. Nave ophaddiwa wawoona kohiyo nko onooneya vamwiillini vaye.

²⁹ Koma Muyuda awoona tti muthu oyo ari Muyuda muwari, oophaddiwa m'murimani mwaye. Nave ella eneereya ni Munepa a Mulluku, ohiri ni malamulo oolembiwa. Muthu yooyo annatetheelliwa ni Mulluku, ohiri ni athu.