Aroma 16 - Mawu a Mulluku

Paulo anaavaha mooni athu oohiyanahiyana

¹ Murokorihu Febe, oorumeyella a mpingo wa o Kenkrea, tti muthu aphaama.

² Sika mwaakhelleni wonanko mmo athu a Mulluku enaphwanellelliiwa waakhellelliwa kaambiiwa tti muthu a Apwiya. Nave mumukavihere mmo anapaallelleeye wi akaviheriwe ni nyuwaano. Vawi aanaakavihera athu anchichi ni meeneenettho.

³ Mukivelleellelle mooni wa Prisika ni Akwila allupa mutteko akhwaaka voomurumeyella Khrisitu Yesu,

⁴ ayo yahooville wiiphiwa wi evulluse okumaaka. Miyaano ni mipingo ddittheddene dda athu ayo ehiri Ayuda ninnaathokoza yaayo.

⁵ Mukivelleellellettho mooni athu a mpingo oyo onatthukumana mpa mwiwa. Mukivelleellelle mooni wa Epeneto, mukhwaaka kinamukondeemi, oyo aari awaamba omukhulupilila Khrisitu o Asiya.*

⁶ Mooni wa Mariya, oyo aallipihenlle ophara mutteko variyari vanyu.

⁷ Mooni wa Androniko ni Yunia, Ayuda akhwaaka ayo kaarimina mundende. Yaalla tti o odduwanyeya variyari va amurummwa nave yaakhalla ookhulupilila miyaano kihinakhalle.

⁸ Mooni wa Ampiliato, mukhwaaka kinamukondeemi mu eyaattano ni Apwiya.

⁹ Mumuvahe mooni Urbano, oorumeyella oororomelleya mukhwiihu mu eyaattano ni Khrisitu. Navettho mooni wa Stakisi, mukhwaaka kinamukondeemi.

¹⁰ Mooni wa Apelesi, oorumeyella ororomelleya a Khrisitu. Moonittho wa a mu nibanja na Aristobulo.

¹¹ Mooni wa Herodiono, Muyuda mukhwaaka. Mooni wa ookhulupilila a mu nibanja na Narkiso.

¹² Mooni wa Trifena ni Trifosa ayo enaarumeyella Apwiya. Moonittho wa Perisi, mukhwaaka kinamukondeemi oyo allipihenlle ophara mutteko mwawaarumeyella Apwiya.

¹³ Mooni wa Rufu, oyo aniivelleella waarumeyella Apwiya. Moonittho wa amennya ayo enakeerella ddeko wonanko amoowaaka.

¹⁴ Mooni wa Asinkrito, Filegoni, Heremesi, Patrobasi, Herimasi ni ookhulupilila Akhwiihu ayo enakhalliiwana nimodda.

¹⁵ Moonittho Filologo, Juliya, Nereo ni murokoriye, Olimpasi ni athu attheene a Mulluku ayo enakhalliiwana nimodda.

¹⁶ Muvahaneke mooni mwa echikondi ya ookhulupilila. Mipingo ddittheddene dda Khrisitu ddinnuuvahani mooni.

Malangizo oomalliha

¹⁷ Asinnaka ni arokoraka, kinimuuvekani nyuwaano wi muchenjerekena athu ayo enaakawaniha athu ni owaapheelliha muru voohuddihani ddoohiyana ni nnddo mwahudderennyu. Muhiwaatamelleke yaayo.

¹⁸ Vawi athu yaayo khenamurumeyella Khrisitu, Apwiihu koma minkhella ddiwa. Ennaalleka athu ooreera murima voollotani mawu ooreeriha.

¹⁹ Arive muthu ahiiwa dda wiiwellella wanyu wa othenga waphaama. Sika ekaamba ya yeella munnakihakallalliha. Kinapaalla wi mukhalle oodduwella dda ddeko ddaphaama nave ooheera ddoonanara.

²⁰ Sika Mulluku oyo anavaha murendelle aneerewoononga veneva masiva a Satana nave aneeroweerihani wi mumulamulelle. Echisomo ya Apwiya Yesu Khrisitu ekhalle ni nyuwaano.

²¹ Timoteo, mullupa mutteko mukhwaaka annuuvahani mooni. Navettho Lusiyo, Yasoni ni Sosipatere, Ayuda akhwaaka ennuuvahanittho mooni.

²² Miyaano Tersio, Kamulembille kalata a Pauloolla, kinuuvahani mooni nyuwaano akhwaaka mu eyaattano ni Apwiya.

²³ Gayo, oyo anakirumeyella miyaano vamodda ni mpingo muttheene mpa mwaye, annuuvahani mooni. Erasito, oosunga makobiri a m'muzindani ni Kwarto mwanamunnihu, ennuuvahani mooni.

²⁵ Mulluku atitimihiwe! Olliye annawora ollipiha echikhulupilwaanyu moollikana ni othenga waphaama wa Yesu Khrisitu kinallalleyeemi navettho moollikana ni wuupullulla yawoona yookhuweya eyo yavitthiwe miyakha ddinchichi khalle.

²⁶ Koma vano Mulluku a enthawi yoohimalla aalamula wi yawooneeyo yuupullulliwe mu ddoolemba dda anamallotella nave wi edduwelliwe ni athu attheene wi ekhulupilile ni wiiwellella.

²⁷ Oweella mwa Yesu Khrisitu, ntitimiho nikhalle wa Mulluku oyo tti yooyove eezeru enthawi yoohimalla. Amen.