Aroma 15 - Mawu a Mulluku

Muhiihakallallihe weekhiinyu koma asinninyu ni arokorinyu

¹ Hiyaano niri ni echikhulupililo yoollipa ninaphwanella wi naakhurumuwelle oofooka mu echikhulupililo nave woohikhalla wiihakallalliha weekhiihu.

² Koma hiyaano attheene naahakallalliheke asinnihu ni arokorihu ni oweerella ddaphaama wi nillipihe echikhulupililwiiwa.

³ Vawi Khrisitu khenre ddeko ddawi iihakallallihe yeekhaaye koma tti wonanko mmo mawu a Mulluku enallotelliiwa wi, “Epewe mwaallotelliweenyu yaakiphiyerattho miyaano.”

⁴ Nave mawu a Mulluku mattheene yaalembiwe khalle enanihuddiha hiyaano. Mawaayo ennanillipiha murima ni onikhalliha oovillella wi nikhalle ootiyera.

⁵ Mulluku oyo ananeeriha wi nikhalle oollipa murima ni oovillella aweeriheni wi mukhalle awiiwanana voomuttakiherani Khrisitu Yesu.

⁶ Sika nyuwaano attheene vamodda m'mutitimihe Mulluku Attiitthiiwa a Apwiyaahu Yesu Khrisitu.

Othenga waphaama wa athu ayo ehiri Ayuda

⁷ Sika mwaakhullellaneke wonanko mmo Khrisitu awaakhullelleeyeni wi athu emutitimiheke Mulluku.

⁸ Vawi kinimuulleellani wi Khrisitu aari oorumeyella a Ayuda osimikizella wi Mulluku tti oororomelleya wi ddikwakhwane nnddo alonjezilleeye ni makhollwiiwa

⁹ navettho wi athu ayo ehiri Ayuda ewore omutitimiha Mulluku ekaamba ya echifundwaaye wonanko mmo mawu a Mulluku enallotiiwa wi, “Sika kineerewuutitimihani variyari va athu oohimullapella Mulluku. Kineerewiipa machipo ootitimiha nnddina nanyu.”

¹⁰ Mawu a Mulluku enallotattho wi, “Nyu athu oohimullapella Mulluku, hakallallani ni athu a Mulluku.”

¹¹ Ennallotattho wi, “Atitimiheni Apwiya, nyu mitundu ddittheddene dda athu. Nyu athu a mu ellapo ddittheddene, ariiheni wunchichi.”

¹² Namallotella Yesaya anallotattho wi, “Mmodda a edduullu dda Yese aneeroowa, aneeroowa wi aalamulelle athu a mitundu ddimodda nave alliwaayo enaatiyereke va olliyooyo.”

¹³ Mulluku oyo ananivaha otiyera uddalliheni ni oohakallalla ni murendelle kaambiiwa munnamukhulupilila. Sika otiyera wanyu oneerovirellella wunnuwa ni masiva a Munepa Waweella.

Ekaamba eyo Paulo aalembelleeye moollipa murima ddiidda

¹⁴ Akhwaakanyu, miyaano kinnasimikiza wi nyuwaano tti aphaama wunchichi, nyuwaano tti athu oodduwella wunchichi navettho munnawora ohuddihana.

¹⁵ Koma mu kalatoolla ddeko ddimodda kilembille moollipa murima wi kiwuupuseni ddennddo ekaamba ya mutteko kavahiweemi mwa echisomo ni Mulluku

¹⁶ wi kikhalle oorumeyella a Khrisitu Yesu wa athu ayo ehiri Ayuda. Kinarumeyella wonanko mullupa mukutho kaallalleyaka othenga waphaama wa Mulluku wi athu ayo ehiri Ayuda ekhalle wonanko mukutho wawaakhelliwa ni Mulluku yaweellihiwa ni Munepa Waweella.

¹⁷ Vano ekaamba ya eyaattanwaaka ni Khrisitu Yesu, kinnakotella muttekwaaka woomurumeyella Mulluku.

¹⁸ Kineerollota moohoova ddennddove Khrisitu eerilleeye oweella mwa miyaano wi kineeroweeriha athu ayo ehiri Ayuda omwiiwellella Mulluku. Kineereweera ddenndda voollotani ni voopharani muttekwaaka

¹⁹ ni masiva a ezizindikiro ni ddoottikhiniha navettho ni masiva a Munepa Waweella. Sika vano koollalleya othenga waphaama wa Khrisitu ovenyera o Yerusalemu ophiya o Iliriko.

²⁰ Yoopaallaaka tti ollalleya othenga waphaama m'mapuroni mmo athu ehiiwalliiwa nnddina na Khrisitu wi kihimake va matthipello yakeraatthihiwe ni muthu mmodda.

²¹ Mawu a Mulluku enallota wi, “Athu ayo yahiiwalle dda olliyooyo eneerewoona, nave ayo ehiiwalle dda olliyooyo eneerewiiwesesa.”

Paulo anaganiza dda oya o Roma

²² Sika ekaamba ya muttekwaaka, kookhalla kilephelaka owa owaninyunko.

²³ Koma vano kaambiiwa koomalliha ophara muttekwaaka mu mapuroni yaalla navettho wi miyakha ddinchichi ddoomalla kipaallaka owa owaninyunko,

²⁴ kinatiyera owoonani kaayaaka o Spaniya. Kinapaalla wi nyuwaano mukikavihere voolendonaaka o Spaniyanko kamalliha waarera moohakallalla ni nyuwaano enthawi yooyeva.

²⁵ Koma vano kinaya o Yerusalemu wi kawinnye nikavihero athu a Mulluku wenko.

²⁶ Vawi athu a mipingo dda o Masedoniya ni dda o Akaiya yaaganiza moohiwatiheriwa wi evelleelle nikavihero wa athu a Mulluku oohoowa o Yerusalemu.

²⁷ Yaganizalle ddenndda moohiwatiheriwa koma waari odindwiiwa wi yaakavihere athwaayo. Vawi Ayuda yaakawana madaliso a Munepiiwa ni athu ayo ehiri Ayuda, athu ayo ehiri Ayudaayo enaphwanella yaavaheke Ayudaayo ddeko ddoopaalleya ddiwa.

²⁸ Sika kamalliha muttekoolla ni ovelleella makobiri mattheene yatotelliwe, kineerotimulla oya o Spaniya koma kineerewiimella owaninyunko wi kiwooneni.

²⁹ Kinnadduwella wi kawa owaninyunko kineeroowa ni madaliso manchichi a Khrisitu.

³⁰ Asinnaka ni arokoraka, vano kinimuuvekani, oweella mwa Apwiihu Yesu Khrisitu navettho ni echikondi ya Munepa Waweella wi nipharane matta vookivekellani moollipiha wa Mulluku.

³¹ Muvekelle wi Mulluku akiteteze wa athu oohikhulupilila o Yudeya navettho wi orumeyella waka o Yerusalemunko okhalle wawaakhelliwa ni athu a Mulluku.

³² Sika Mulluku aakhullella kineeroowa owaninyunko wi kihakallalle ni wi kiithuuwe voowaarerani ni nyuwaano.

³³ Mulluku oyo ananivaha murendelle akhalle ni nyuwaano attheene. Amen.