Aroma 14 - Mawu a Mulluku

Muheeruzaneke

¹ Muthu oofooka mu echikhulupililo, mwaakhelleni nave muhimuvaanyihe maganizwaaye.

² Echikhulupililo ya athu amodda enaakhullella ocha erive ello koma muthu oofooka mu echikhulupililo khanacha enama.

³ Ayo enacha erive ello ehaavevulle ayo ehineera ddiiddo. Ayo enacha ddoomellave ehiweeruze ayo enacha erive ello vawi Mulluku oowaakhella athu attheene.

⁴ Ethiyo nyu ttaani wi mumweeruze mullupa mutteko a mwaneena? Tti apwinnya ayo enoona wi oolephela apaalle oopambana. Nave aneeropambana kaambiiwa Apwiya Mulluku sika enaamweerihe wi awore opambana.

⁵ Athu amodda enaganiza wi nllapo nimodda tti noopaalleya ohiyana ni mallapo mamodda. Athu amodda enaganiza wi mallapo mattheene tti oophwanaphwana. Voollotani dda mallaponndda arive muthu athwareke maganizwaaye.

⁶ Athu ayo enaganiza wi nllapo nimodda tti noopaalleya ohiyana ni mallapo mamodda eneera ddiiddo wi yaatitimihe Apwiya. Nave ayo enacha erive ello eneera ddiiddo wi yaatitimihe Apwiya vawi ennamuthokoza Mulluku ekaamba ya yoocheeyo. Ayo ehinacha ddeko ddimodda eneera ddiiddo wi yaatitimihe Apwiya nave ennamuthokoza Mulluku.

⁷ Khaavo anakhalla mukumi wi iirumeyelleke yeekhaaye nave khaavo anakhwa wi iirumeyelleke yeekhaaye.

⁸ Nakhalla akumi, ninakhalla akumi wi naarumeyelleke Apwiya nave nakhwa ninakhwa wi naarumeyelleke Apwiya. Sika nakhalla akumi apaalle nakhwa niri a Apwiya.

⁹ Vawi Khrisitu aakhwa avenyihiwa wi akhalle Apwiya a athu akumi ni a ookhwa.

¹⁰ Sika kaambiiwa tini munaweeruzeenyu asinninyu ni arokorinyu? Kaambiiwa tini munaavevulleenyu alliwaayo? Vawi attheene nineerewiimella vamiitthoni va Mulluku wi aneeruze.

¹¹ Mawu a Mulluku enallota wi, “Apwiya enallota wi, ndithu kinimallupella wi, Nirive nikuttha nineerokikokhorella, arive muthu aneerewaakhullella wi miyaano tti Mulluku.”

¹² Sika arive muthu aneeromutakhella Mulluku ddeko eerilleeye.

Muhaakukhumulle nave muhaachimwihe asinninyu ni arokorinyu

¹³ Vano nihiye weeruzana mmodda ni mukhwaaye. Koma moonesese wi muhaakukhumulle mwiilli nave muhaachimwihe asinninyu ni arokorinyu.

¹⁴ Ekaamba ya eyaattano ni Apwiya Yesu koodduwella nave koosimikiza wi kheyiivo ello yoonanara mwaweekhiiwa koma enakhalla yoonanara muthu ayiganizera wi tti yoonanara.

¹⁵ Mwaakukhumulla asinninyu ni arokorinyu ekaamba ya yoocha munacheenyu, ddinooniha wi khamunaakondattho alliwaayo. Yoocha munacheenyu ehimoononge muthu aakhwelliwe ni Khrisitu.

¹⁶ Sika muhiweerihe athu amodda ollota dda ddeko muneereenyu ddaphaama wi tti ddoonanara.

¹⁷ Vawi omwene wa Mulluku kohiyo wa dda yoocha ni yoowirya koma tti wa dda echilungamo, murendelle ni ohakallalla ddoovenyera wa Munepa Waweella

¹⁸ Vano arive muthu anamurumeyella Khrisitu mwawi ddiidda annaamuhakallalliha Mulluku nave annavahiwa olemu ni athu.

¹⁹ Sika ninaphwanella wi erive enthawi neeseeseke okhalla mwamurendelle ni okaviherana wi nikhalle ni echikhulupililo yoollipa.

²⁰ Muhoononge mutteko wa Mulluku ekaamba ya yoocha. Erive yoocha tti yaphaama koma tti olakwa ocha ello enaaweeriha asinnihu ni arokorihu ochimwa.

²¹ Tti waphaama ohicha enama, ohimuwirya vinyo apaalle weera erive ello yoowaachimwiha asinninyu ni arokorinyu.

²² Okhulupilila wanyu va ddeko ddenndda okhalle variyari va nyuwaano ni Mulluku. Oodalisiwa tti muthu oyo ahiniivaanyiha yeekhaaye weera ello anaganizeeye wi tti yaphaama.

²³ Koma oyo anakayikella ello anacheeye, Mulluku annamweeruza aachaka ello yeeyo kaambiiwa khenre ello yeeyo ni echikhulupililo. Nave erive ello ehineeriwa ni echikhulupililo, tti machimo.