Aroma 13 - Mawu a Mulluku

Wiiwellella olamulello wa niboma

¹ Arive muthu iiwellelleke olamulello wa niboma kaambiiwa khuwaavo olamulello ohinavenyera wa Mulluku nave olamulello wa muttanoolla okeraatthihiwe ni Mulluku.

² Sika ayo ehinawiiwellella oolamulella kheniiwellella eyo yakeraatthihiwe ni Mulluku nave yaayo eneerollakiwa.

³ Vawi ayo eneera ddaphaama khenoopopihiwa ni oolamulella koma ayo eneera ddoonanara. Mwaapaallaka wi muhoopopihiweke ni oolamulella, mweereke ddaphaama nave eneerewuuvahani olemu

⁴ vawi yaayo tti oomurumeyella Mulluku ayo enaphara mutteko wuukaviherani nyuwaano. Koma mweera yoonanara munaphwanella woopopihiwa ekaamba yookhalla ni olamulello wawuullakani. Alliwa tti oomurumeyella Mulluku nave ennawiiha ollaka wa Mulluku wa ayo eneera ddoonanara

⁵ Sika ekaamba ya yeella munaphwanella wi muwiiwellelleke oolamulella ohiri ekaamba ya osha murima wa Mullukuve koma kaambiiwa munnapaalla ni murimaanyu muttheene wi mwiiwellelleke.

⁶ Ekaamba ya yeella munnakhomattho misonkho vawi oolamulella enamurumeyella Mulluku yaapharaka muttekwiiwa.

⁷ Muvelleelleke wa arive muthu eyo munaphwanelleenyu ovelleella, wonanko okhoma misonkho, ovaha olemu apaalle oriiha.

Dda okondana

⁸ Muhikhalle ni ekongoli ni arive muthu. Ekongoli munaphwanelleenyu okhallana tti yookondana mmodda ni mukhwaaye vawi oyo anamukonda mukhwaaye ookwakhwaniha malamulo.

⁹ Malamulo awi, “Ohiraruwe, ohiiphe, ohiiye, ohisilile” malamulo yaalla ni malamulo mamodda manchichi enahuruwelliwa mu lamulo nimodda nawi, “Waakondeke akhwaawo wonanko mmo oniikondelleewe weekha.”

¹⁰ Waawakondaka akhwaawo khoweerella yoonanara. Sika oyo anamukonda mukhwaaye ookwakhwaniha malamulo.

¹¹ Munaphwanella wi mweereke ddiidda kaambiiwa munnadduwella wi enthawi yookwakhwana yawi muvenye. Vawi vano oovullusa ohaatamella ohiyana ni enthawi eyo naambeelleehu okhulupilila.

¹² Mahiiyu ehanlle vang'ono omalla nave ohinase wohaatamella. Sika hankoni nihiye mitteko dda mwiipiphini nave niware ddoowanella ekhoto dda mu owala.

¹³ Sika makhallellwaahu ekhalle aphaama wonanko a athu ayo enakhalla mu owala. Vihikhalle machellello oonanara apaalle olezela, oraruwa apaalle echigololo, owana apaalle okhallellana ehache.

¹⁴ Koma muwaakhullelle Apwiya Yesu Khrisitu wi ekhalle yoowaraanyu yakhoto. Nave muhiiwellelleke omuthwaanyu voopaallani okwakhwaniha minkhella ddiwa.