Aroma 12 - Mawu a Mulluku

Okhalla akumi voomurumeyellani Mulluku

¹ Sika asinnaka ni arokoraka, kinimuuvekani ekaamba ya echifundo ya Mulluku wi mwiiheraatthi nyookhaanyu wi mukhalle mukutho wookumi, waweella ni wawaakhelliwa wa Mulluku. Ella sika ettilla yaphaama yoomullapellella.

² Muhittakihereke makhallello a athu a va ellapo yavattheella. Koma mwaakhullelle wi Mulluku uutthattuseni vawuuvahani murima wanaanweene. Vano muneerodduwella eyo Mulluku anapaalleeye, yaphaama wunchichi, yoomuhakallalliha ni yoophwanellella.

³ Ekaamba ya echisomo eyo Mulluku aakivahilleeye, kinallota wa arive muthu variyari vanyu wi muhiganizeke wi nyuwaano tti uullupalli ohiyana ni mmo mukhallelleenyu. Koma maganizwaanyu ekhalle awiiyeviha moollikana ni waata wa echikhulupililo eyo Mulluku uuvahilleeyeni.

⁴ Vawi mwiilli mmodda wookhalla ni eziwalo ddinchichi nave eziwalo ddittheddenenndda ddinapharihiwa mutteko moohiyanahiyana.

⁵ Emoddamoddave yeeyo, hiyaano naari naatille niri wonanko mwiilli mmodda mu eyaattano ya Khrisitu nave noollundellellana.

⁶ Nookhalla ni emphaso ddoohiyanahiyana moollikana ni echisomo eyo Mulluku anivahilleeye. Sika emphaswaahu yakhalla yoollotella mawu a Mulluku nillotelleke moollikana ni echikhulupililwaahu.

⁷ Emphaswaahu yakhalla yawaarumeyella akhwiihu, naarumeyelleke. Yakhalla ohuddiha, nihuddiheke.

⁸ Emphaswaahu yakhalla yawaallipiha amodda, naalipiheke. Oyo anaakavihera amodda, eereke ddiiddo mwawoollowa matta. Oyo ari ni olamulello, alamulelleke phaama. Oyo anaweerella amodda echifundo, eereke ddiiddo moohakallalla.

⁹ Echikondi ehikhalleke yawoottha. Mwiiteke yoonanara nave muhihiyeke yaphaama.

¹⁰ Mukondaneke mmodda ni mukhwaaye wonanko muthu ni musinne apaalle murokoriye nave mwaavaheke olemu athu amodda ohiyana ni muniivahelleenyu olemu nyookha.

¹¹ Mwaallipihellaka ophara mutteko wa waarumeyella Apwiya muhikhalle oolesi koma mwaarumeyelleke ni murimaanyu muttheene.

¹² Muhakallalleke ekaamba ya otiyera wanyu. Muvillelleke mwaahoosiwaka nave muvekelleke moohihiyerera.

¹³ Muvelleelleke ddeko ddanyu wa ookhulupilila akhwiinyu oohoowa nave muwaakhelleke alleto m'mawaninyu.

¹⁴ Mumuveke Mulluku wi aadalise ayo enuuhoosani. Muhimuveke wi aatembelele.

¹⁵ Amodda yaahakallallaka, muhakallallekena nimodda nave amodda yaawinllaka mwinllekena nimodda.

¹⁶ Mukhalleke mwawiiwanana mmodda ni mukhwaaye. Nave muhiitukhulleke koma mwaakhullelle weera ddeko ddawiiyeviha nave muhiganizeke wi muri eezeru.

¹⁷ Muthu mmodda aweerella yoonanara, ohimuhokolloselle yoonanara koma weeseeseke weera ddeko ddinooneya ni athu attheene wi tti ddaphaama.

¹⁸ Wakhalla wooworeya, mweeseeseke okhalla mwamurendelle ni athu attheene.

¹⁹ Ookondiwaaka, muhihokolloselleke yoonanara koma m'muhiyere Mulluku ahokolloselle moollikana ni osha murima waye. Vawi aallota mu mawaaye wi, “Ohokollosella ddoonanara tti waaka, miyaano sika kinallaka.”

²⁰ Mawu a Mulluku enallotattho wi, “Adanaawo yavolliwa ettalla, waavahe yoocha, yavolliwa nthona waavahe yoowirya vawi vaweerani yeeyo oneerowuukella mankhalla amunllo vamuru viwa.”

²¹ Muhigonjihiwe ni yoonanara koma mugonjihe yoonanara ni yaphaama.