Aroma 11 - Mawu a Mulluku

Mulluku ohaavaha echisomo Aisraele

¹ Vano kinakoha wi, “Ethiyo Mulluku ohaakhoota athwaaye?” Khe ddiiddo. Mi tti Muisraele, edduullu ya Abrahamu navettho mmodda a nlloko na Benjamini.

² Mulluku khaakhootille athwaaye ayo atthoonlleeye khalle. Ethiyo khamunadduwella mawu a Mulluku awi namallotella Eliya aamuveka Mulluku wi aallake Aisraele?

³ Allotille wi, “Apwiya, athu yaalla yaawiipha anamallotellaanyu ni okumulla makuwaanyu a mukutho. Kihanlle meekha nave enapaalla okiipha.”

⁴ Koma Mulluku aamulleella wi, “Kohiisungella meekha athu 7,000 ayo ehinamullapella Baala, mulluku awoottha.”

⁵ Sika emoddamoddave yeeyo, muttano Mulluku ohaavaha echisomo Aisraele amodda ayo iitthoollelleeye wi ekhalle oomuthwarellellaaye.

⁶ Otthoolla waye waari wa echisomo ohiri wa mitteko ddiwa. Vawi otthoolla wa Mulluku waariki wa mitteko dda athu, sika echisomwaaye yaakhalle yawoottha.

⁷ Vano kaambiiwa tini Aisraele yahiphwanyilliiwa nnddo yaashiiwa? Athu vang'ono ootthoolliwa sika yaphwaanyille koma amoddaayo yahummiha murima,

⁸ wonanko mmo mawu a Mulluku enallotelliiwa wi, “Mulluku ahaavaha murima woohiiwesesa ddeko nave ophiyera ollello ooweeriha okhalla oohiiwa ni oohoona.”

⁹ Nave Davide anallota wi, “Machellellwiiwa ekhalle musampha wowaaphara ni waakuha wi ellakiwe.

¹⁰ Miitthwiiwa ehooneke ni oweeriha wi ehooweke ekaamba ya ddoohoosa ddiwa.”

¹¹ Sika kinakoha wi, “Ethiyo Aisraele yaakwakwatuwa ni wiikuha wi ehiwe evenya?” Khe ddiiddo. Koma ekaamba ya machimo a Aisraele, athu ayo ehiri Aisraele yaawora ovullusiwa nave Aisraelaayo eneerewaakhallella ehache.

¹² Ochimwa wa Aisraele waawiiha madaliso wa athu a va ellapo yavatthi. Nave olephela wiwa waawiiha madaliso wa athu ayo ehiri Aisraele. Ethiyo vano madaliswaayo enaate mwawiidde Aisraelaayo yarukunuwa murima?

¹³ Vano kinallota wa nyuwaano athu ayo muhiri Aisraele. Kiriimi murummwa wa nyuwaano kinnakotella muttekwaaka.

¹⁴ Vaweerani ddenndda kinapaalla oweeriha Aisraele akhwaaka wi ekhalle ni ehache wi evullusiwe amodda a yaayo.

¹⁵ Vawi Aisraele yakhootiwiiwa ni Mulluku athu a va ellapo yavatthi yahaattanihiwa ni olliye. Onaakhalle wawiidde Aisraele yaakhullella! Onaakhalle wonanko ovenyihiwa wa ookhwa okhalla akumi.

¹⁶ Muthu ammeya buledi amuvelleella wa Mulluku wi eellihiwe, buledi muttheenooyo annakhalla aweella. Nave misisi dda muteekho ddakhalla ddaweella, enthambi ddiwa ddinakhallattho ddaweella.

¹⁷ Enthambi ddimodda dda muteekho wa olivi wawaalliwa ddahinttakeya nave enthambi ya muteekho wa olivi wa muhakani waamakellelliwavo. Nyu athu ayo ehiri Aisraele muri wonanko muteekho wa olivi wa muhakani nave munnakawanana ddaphaama dda muteekho wa olivi wawaalliwa, Aisraele.

¹⁸ Sika muhaavevulleke ayo yinttakeye wonanko enthambi. Mwaawiitukhullaka, muupuwelleke wi khamuhiyo nyuwaano munaphareella misisi koma misisi sika ddinuuphareellani nyuwaano.

¹⁹ Vano muneerollota wi, “Enthambinndde ddahinttakeya wi miyaano killundellelliwevo.”

²⁰ Tti ddawoona. Yahinttakeya ekaamba ya ohikhulupilila wiwa koma nyuwaano muri vaavo ekaamba ya okhulupilila wanyu. Sika muhiitukhulleke koma m'mooveke Mulluku.

²¹ Vawi Mulluku aawinttaka Aisraele ayo eri wonanko enthambi dda muteekho, ethiyo khaworattho owinttakani nyuwaano?

²² Wehesesani phaama echifundo ya Mulluku ni owallaaye. Annawoopella owalli ayo echimwalle koma annaweerellani echifundo nyuwaano mwavirellella okhulupilila echifundwaaye. Nave mwaaheera ddiiddo nyuwaano Mulluku aneerowinttakani.

²³ Nave Aisraele yahiya ohikhulupilila wiwa, eneerohokolloselliwa va muteekho yaariiwa khalle vawi Mulluku ookhalla ni masiva awaamakellellattho.

²⁴ Nyu athu ayo ehiri Aisraele muri wonanko enthambi ya muteekho wa olivi wa muhakani oyo wunttakiwe nave omakellelliwa va muteekho wa olivi wawaalliwa. Sika ddinaakhalle ddoohikatamiha Mulluku ollundellella enthambi ddawiinttakeya ddenndda o muteekhwiiwa wa olivi.

Echisomo ya Mulluku wa athu attheene

²⁵ Asinnaka ni arokoraka, vookhalla yookhuweya eyo kinapaalleemi wi mudduwelle vawi muneeseke wi nyuwaano tti eezeru. Aisraele amodda yahummiha murima. Nave enaakhalleve ddiiddo ophiyera echiwerengero ya athu ayo ehiri Aisraele oowa wa Mulluku ekwakhwanne.

²⁶ Sika vano Aisraele attheene eneerovulluwa moollikana ni mmo mawu a Mulluku enallotiiwa wi, “Oovullusa anaavenyere o Ziyoni nave aneerohuwa machimo a edduullu dda Yakobo.

²⁷ Kineerokeraatthiha echipangano ni alliwaayo kakhululukella machimwiiwa.”

²⁸ Kaambiiwa ennakhoota othenga waphaama, Aisraele yookhalla adani a Mulluku ekaamba ya nyuwaano athu ayo muhiri Aisraele. Koma ekaamba ya otthoolla wa Mulluku, yookhalla ookondiwaaye ekaamba ya makhollwiiwa.

²⁹ Vawi Mulluku khanasintha maganizwaaye aawiithanaka athu apaalle aawaavahaka emphaso.

³⁰ Nyu athu ayo ehiri Aisraele, khamwaamwiiwellelle Mulluku koma ooweerellani echifundo ekaamba yoohiiwellella wa Aisraele.

³¹ Emoddamoddave yeeyo, ekaamba ya echifundo mweerelliweenyu, Aisraele vano khenamwiiwellella Mulluku wi alliwattho vano yeerelliwe echifundo ya Mulluku.

³² Vawi Mulluku ooweeriha athu attheene okhalla wonanko a mundende a ohiiwellella wi awore oweerella echifundo attheene.

Mulluku atitimihiwe

³³ Eyuuma ya Mulluku tti yinchichi! Ezeru ddaye ni odduwella waye tti ddoowallamella! Khaavo anaawore wiiwesesa echiweruzwaaye! Khaavo anaawore wiiwesesa ettilla ddaye!

³⁴ Mawu a Mulluku enallota wi, “Ethiyo anadduwella maganizo a Apwiya ttaani? Ethiyo ttaani anaawore omulangiza?

³⁵ Ttaani aambillekevo omuvaha Mulluku ello wi amuhokolloselle?”

³⁶ Vawi ddeko ddittheddene ddaaphatusiwe ni olliyooyo nave oyeella mwa olliyooyo navettho ekaamba ya olliyooyo. Ntitimiho nikhalle wa olliyooyo wa enthawi yoohimalla! Amen.