Aroma 10 - Mawu a Mulluku

¹ Asinnaka ni arokoraka, kinnapaalla ni murimaaka muttheene nave kinnavekella wi athwaaka evullusiwe.

² Kinimuusimikizellani wi alliwaayo ennamullapella Mulluku mwawiivelleella koma kheniiwesesa.

³ Khenadduwella mmo Mulluku anaalungamihelleeye athu vamiitthoni vaye nave enathwara ettilla yayiwayayiwa; sika vano kheyaakhullelle ettilla ya Mulluku yowaalungamiha athu.

⁴ Vawi Khrisitu ookwakhwaniha malamulo wi arive muthu anakhulupilila alungamihiwe vamiitthoni va Mulluku.

Ovullusa tti wa athu attheene

⁵ Mose aalemba dda okhalla oolungamihiwa vamiitthoni va Mulluku oyeella mwa malamulo wi, “Oyo aniiwellella malamulo aneerokhalla ni okumi.”

⁶ Koma eyo enallotiiwa mu mawu a Mulluku dda okhalla oolungama vamiitthoni va Mulluku oweella mu echikhulupililo tti yawi, “Muhiikohe weekhiinyu wi, ttaani anaawelle oddullu?” (Ottaphullella wi amulleelle Khrisitu wi akitthe).

⁷ “Naari muhikohe wi, ‘Ttaani anaakitthelle va ellapo ya ookhwa?’ ” (Ottaphullella wi amuvenyihe Khrisitu wa ookhwa).

⁸ Mawu a Mulluku enallotiiwa eni, “Othenga wa Mulluku ori vakhuviru ni nyuwaano, vayanoni vanyu navettho m'murimani mwanyu.” Olla sika othenga wa echikhulupililo ninallalleyeehu.

⁹ Mwaakhullella ni vayananoni vanyu wi Yesu tti Apwiya nave mwaakhulupilila ni murimaanyu wi Mulluku aamuvenyiha wa ookhwa, muneerovullusiwa.

¹⁰ Vawi ninalungamihiwa vamiitthoni va Mulluku ekaamba ya echikhulupilwaahu nave ninavullusiwa ekaamba ya waakhullella wahu.

¹¹ Mawu a Mulluku eni, “Oyo anamuroromella olliyooyo khawa awullihiwa muru.”

¹² Nndda tti dda arive muthu kaambiiwa khuwaavo ohiyana variyari va Ayuda ni athu ayo ehiri Ayuda vawi attheene eri ni Apwiya amodda a athu attheene nave annaadalisa wunchichi attheene enamwiithana olliyooyo.

¹³ Vawi mawu a Mulluku eni, “Attheene ayo enaawiithane mu nnddina na Apwiya eneerovullusiwa.”

¹⁴ Koma enaawiithane mwawiidde alliwaayo ehinaakhulupilile? Nave enaakhulupilile mwawiidde ehiniiwe othenga? Nave eniiwe mwawiidde othengooyo ohinallalleyiwe?

¹⁵ Nave othengooyo onaallalleyiwe mwawiidde athu ehirumiwe? Mawu a Mulluku eni, “Tti woohakallalliha owa wa oollalleya othenga waphaama”

¹⁶ Koma khe attheene yaakhullelle othenga waphaama. Yesaya aallota wi, “Apwiya, ttaani aakhulupililalle othengaahu?”

¹⁷ Sika vano muthu anakhalla ni echikhulupililo ekaamba yawiiwa othenga nave othengooyo onaphiya oyeella mu omullalleya Khrisitu.

¹⁸ Nave kinakoha wi, “Tti ddawoona wi kheyaawiiwalle othenga?” Khe ddawoona, yahiiwa, wonanko mmo mawu a Mulluku enallotelliiwa wi, “Mawiiwa yaavuwa mu ellapo yavatthi ettheene nave ddoollota ddiwa ddaaphiya wookomella ellapo yavatthi.”

¹⁹ Kikohettho wi, “Ethiyo athu a o Israele kheyaawiiwesesille?” Mose aari awaamba ollota wi, “Kineeroweeriha ehache ni athu shisha, kineerewaashiha murima ni mutundu wookarangeya.”

²⁰ Nave Yesaya aallipa murima wunchichi voollotani wi, “Kaaphwanyiwa ni ayo yahikaashille nave kaaddoonihella meekha wa ayo yahikivekille.”

²¹ Koma dda athu Aisraele aallota wi, “Nllapo nittheene kaawaakhella ni mattaaka mattheene mutundu olla woohiiwellella ni woowukila.”