Aroma 1 - Mawu a Mulluku

¹ Ovenyera wa miyaano Paulo, oorumeyella a Khrisitu Yesu, murummwa awiithaniwa ni ootthoolliwa ni Mulluku wi killalleye othengaaye waphaama.

² Othenga yoolla Mulluku aawulonjeza khalle oweella mwa anamallotellaaye wonanko mmo yalembelliiwa mu mawaaye aweella.

³ Othenga yoolla onallota dda mwanaye, Apwiihu Yesu Khrisitu. Olliye tti edduullu ya Davide moollikana ni omuthu.

⁴ Moollikana ni Munepa Waweella, Mulluku aamutthoolla olliye ni masiva uullupalli wi akhalle mwanaye, Yesu Khrisitu, Apwiihu voomuvenyihani wa ookhwa.

⁵ Oweella mwa olliye, nahaakhella echisomo yookhalla amurummwa wi ekaamba ya Khrisitu naahoollelle athu a mitundu ddittheddene wi yiiwellelle ni okhulupilila.

⁶ Amodda mwa athu yaalla tti nyuwaano munakhalla mu Roma ayo mwiithaniwe wi mukhalle aaye a Yesu Khrisitu.

⁷ Nave vano kinalembella wa nyuwaano attheene mu Roma, ayo Mulluku anaakondeeye nave aawiithana wi ekhalle athwaaye. Echisomo ni murendelle dda Mulluku Attiitthiihu ni Apwiya Yesu Khrisitu ddikhalle ni nyuwaano.

Nivekello noothokoza

⁸ Vawaamba, kinnamuthokoza Mullukwaaka oweella mwa Yesu Khrisitu ekaamba ya nyuwaano vawi ellapo yavatthi ettheene enniiwa dda echikhulupilwaanyu.

⁹ Mulluku, oyo kinamurumeyelleemi ni murimaaka muttheene voollalleyani othenga waphaama wa Mwanaye, sika mbonaaka wi kinnawuupuwellani erive enthawi kaavekellaka.

¹⁰ Kinnavekella wi Mulluku moopaalla mwaye akaakhullelle wi kiwe wa nyuwaano.

¹¹ Vawi kinnapaalla wunchichi wi kiwooneni wi nanyeenettho mukhallena emphaso dda Munepa Waweella, sika mwawi ddiidda echikhulupilwaanyu eneerollipa.

¹² Kinaakeemi tti yawi echikhulupilwaanyu eneerokillipiha murima, emoddamoddave yeeyo, echikhulupililwaaka eneerewuullipihanittho murima.

¹³ Asinnaka ni arokoraka, kinapaalla mudduwelle wi enthawi ddinchichi kaapaalla owa wa nyuwaano koma yookhallavo emoddeene yakilepheliha owa. Vawi kinapaalla kiweerihe athu variyari va nyuwaano wi ekhulupilile wonanko mmo keerelleemi wa athu amodda ayo ehiri Ayuda.

¹⁴ Vawi kinaphwanella ollalleya wa athu attheene, wa avaddullu ni avatthi, oohuddera ni oohihuddera.

¹⁵ Sika vano, kinnapaalla ollalleya othenga waphaama wa nyuwaanottho munakhalla mu Roma.

Masiva a othenga waphaama

¹⁶ Othenga waphaama khonakiwulliha muru. Vawi yoolla tti masiva a Mulluku oovullusa arive muthu arina echikhulupililo, vawaamba Ayuda navettho athu ayo ehiri Ayuda.

¹⁷ Vawi othengoolla onuupullulla wi echilungamo eneeriiwa ni Mulluku oweella mu echikhulupililove. Mawu a Mulluku eni, “Muthu oyo alungamihiwe ni Mulluku oweella mu echikhulupililo aneerokhalla ni okumi.”

Athu attheene tti oochimwa

¹⁸ Ovenyera oddullu Mulluku ohuupullulla osha murima waye va ddoonanara ni ddoochimwa ddittheddene dda athu. Ddoonanara ddiwannddo ddinneeriha wi yawoona ehooneye.

¹⁹ Ennadduwella erive ello yoodduwelleya ya Mulluku kaambiiwa Mullukooyo oowooniha yeeyo.

²⁰ Waambeella enthaweeyo Mulluku aphatuseeye ellapo yavatthi, makhallellwaaye oohooneya, ayo tti, masivaaye oohimalla ni omullukwaaye, oohooniwa. Yaalla enadduwanyeya oweella mwa ddeko ddoophatusiwa ni Mulluku. Sika athu yaalla khenna mawu oothawella!

²¹ Vawi naari edduwenlle dda Mulluku, khenamutitimiha moophwanellella naari omuthokoza. Nave maganizwiiwa tti oohikhalla ni mutteko nave mirima ddiwa ddookarangeya ddooddalla ni epiphi.

²² Alliwaayo enaddeesa tti athu eezeru koma tti ookarangeya.

²³ Enahiya omullapella Mulluku Ookumi woohimalla koma enallapella mafano a athu, epallame, enama apaalle ddawaapadda nnddo ddihinna okumi woohimalla.

²⁴ Sika Mulluku ohaahiya athu yaalla wi yeereke ddeko ddoonanara voothwarani minkhella dda mirima ddiwa wi yeerellaneke ddeko ddoowulliha muru.

²⁵ Yaatthattusa yawoona ya Mulluku okhalla yawoottha. Enallapella ni orumeyella ddoophatusiwa ni Mulluku munipuroni mwa Mulluku oophatusa oyo anaphwanella otitimihiwa va enthawi yoohimalla! Amen.

²⁶ Ekaamba yawi enneera ddenndda, Mulluku ohaahiya wi ethwareke minkhella ddiwa ddoowulliha muru. Naari atthiyaniiwa enakonana atthiyanave.

²⁷ Emoddamoddave yeeyo allopwana yaahiya waapaalla atthiyana nave yaanakhalla ni minkhella va allopwana akhwiiwa. Allopwanaayo yaaneerellana ddoowulliha muru nave yaallakiwa moophwanella ddaweera ddiwa ddoonanarannddo.

²⁸ Vawi athu yaayo ennakhoota omwaakhullella Mulluku, Mullukooyo ohaahiya wi eganizeke ddoonanara ddennddo. Sika eneera ddeko ddoohiphwanella weeriwa.

²⁹ Mirima ddiwa ddooddalla ni ddoonanara ddoohiyanahiyana wonanko, millilli ni echillu. Yooddalliwa ni nrima wiipha, owana, woottha wiitana ni miseche.

³⁰ Ennaallotella akhwiiwa ddoonanara, ennamwiita Mulluku, ollotellana epewe, ennakota ni wiitukhulla. Enaganizera ettilla ddinchichi ddaweerella ddoonanara, khenawiiwellella makhollwiiwa,

³¹ tti ookarangeya, oohiroromelleya nave khenaweerella athu amodda echifundo naari waakonda.

³² Naari edduwellaka wi malamulo a Mulluku enallota wi athu ookhalla mwawi ddiidda enaphwanella okhwa, enneerave ddenndda nave ennahakallalla athu amodda yaaweerakattho ddenndda.