Amosi 9 - Mawu a Mulluku

Ollakiwa wa oollapella mafano

¹ Vano kaawoona Apwiya yiimenlle vakhwipi va nikuwa nave yaallota wi, “Morihani muru wa apoto a enyumba ya Apwiya wi matthipellwiiwa etikheye. Mwaamorihelle vamiruni va athu. Attheene ayo enaahalle kineerowiipha ni nsupada, khakhallavo naari mmodda anaathawe, khaphwanyeya naari mmodda anaavulluwe.”

² “Naari yakate vatthi ophiya o ellapo ya ookhwa, nnatta naka nineerewaakusawo wenko. Naari yawelle oddullu, kineerewaakitthihawo.

³ Naari yiipitthe vaddullu va mwaango wa Karimele, kineerowaashaasha nave kineerewaaphara. Naari yiipitthe vatthi va enyanja yoowallamella kineerolamula enowa wi yaallume.

⁴ Naari epharelliwe wuukaporoni ni adaniiwa, wenko kineerolamula wi yiiphiwe ni nsupada. Kineerewoonesesa wi athu yaalla kiweerelle ddoonanara ohiri ddaphaama.”

⁵ “Apwiya Mulluku Amasiva Mattheene yattannya ellapo, ennattotthowa, ddittheddene ddookhalla mwemmo ddininlla, ellapo ettheene ennanyaruwa wonanko muhinje wa Nailo ennawelleella wonanko muhinje wa o Iguputo,

⁶ ennamaka mapurwiiwa ookhallamo oddullu, ennahiyera murapo wonanko eddullu ya ellapo yavatthi, enniithana maaddi a o enyanja wi ewiithelle va ellapo yavatthi, nnddina niwa tti Apwiya.”

⁷ Apwiya enallota wi, “Nyu Aisraele, ethiyo khamuri wonanko Akushi wa miyaano?” “Ethiyo ngihiyo mi kaakhumihalle Aisraele o Iguputo? Ngihiyo mi kaakhumihalle Afilisti o Kafitori ni Asiriya o Kiri?

⁸ Mi Apwiya Mulluku, miitthwaaka eri va omwene woochimooyo nave kineerowoononga owuvenyiha va ellapo yavatthi koma ngitthollosa nibanja na Yakobo. Mi Apwiya koollota.”

⁹ “Vawi kineerolamula, kineerewaatikhella Aisraele nngu ni nngu variyari va mitundu ddittheddene dda athu wonanko mmo enaveethella etthello ovenyihamo ddoohikhalla ni mutteko ddittheddene.

¹⁰ Athwaaka attheene oochimwa eniiphiwe ni nsupada ayo enaalloteke wi, ‘Ollaka khoniphiyera apaalle khanikumanana.’ ”

Ovulluwa wa athu oohalla

¹¹ Apwiya enallota wi, “Enthawi yeeyo kineerohokollosella omwene wa Davide oyo wakumuwalle wonanko enyumba. Kineeropotokosattho esiri ddiwa ddookumuwa ni omakattho matepiiwa, kineerewuuhokollosellattho mwakhalle.

¹² Enthawi yeeyo Aisraele oohalla eneerogonjiha ddoohalla dda o Edomu vamodda ni mitundu ddittheddene nnddo ddinadduwanyeya ni nnddina naka. Mi Apwiya koollota nave kineereweera killotilleeminndda.”

¹³ Apwiya enallota wi, “Enthawi enimawa mvo oohata anaahateeye mwawaakuva awaalla ahinamallihe waalla, oovota mpesa aneerovota mwawaakuva oomidda ahinamallihe omidda mmiddo. M'miyaangoni muneerondonya vinyo ooddiva, aneerekemeetellella va asimiyaango attheene.”

¹⁴ “Kineerewaahokollosellattho athwaaka, Aisraele, o ellapwiiwa, eneeromakattho mizinda m'matepeni wi ekhallekemo, eneerollima emata ddampesa nave eneeromuwirya vinywiiwa, eneerollima emata nave eneerocha ezipaso ddiwa.

¹⁵ Kineerewaallattho mwiillaponi mwiwa khaavo anawaatulle mu ellapo eyo kinawaavaheemi.” Mi Apwiya Mullukwaanyu, koollota.