Amosi 8 - Mawu a Mulluku

Amosi anoona mutaanga wa ezipaso ddawiithwa

¹ Nndda sika Apwiya Mulluku yakoonihelliiwa m'masomphenya. Vaakhalla mutaanga wa ezipaso ddawiithwa.

² Apwiya yaakikoha wi, “We Amosi, ethiyo onooneeweeyo tti tini?” Nave kahaakhulla wi, “Mutaanga wa ezipaso ddawiithwa.” Vano Apwiya yaakilleella wi, Enthawi ya mamallihello a Aisraele, athwaaka yoophiya, nave ngaamorellattho ethakaraka.

³ Machipo a mu enyumba ya Apwiya eneerotthattuwa ekutho nllapo nenno. Mitembo dda athu ddineerewaata nave ddineerotathilliwa virive veko. Oneerokhalla ellapo tuu! Mi Apwiya Mulluku koollota.

Ollakiwa wa Aisraele

⁴ Amosi aallota wi, “Ngiiwani nndda, nyu munaanyingallella oopaneya, munapaalla owoononga oohoowa a mwiillaponimmu,

⁵ muniikoha nyookha wi, ‘Ethiyo Ehakallallo ya Wooneya wa Mweeri enaamalle niini wi nikullihe ddoohata, nllapo na Sabata ninaamalle niini wi nimukullihettho tirigu, wi niyevihe ddoolingella katundu, wi niwellihe mitengo, wi niwiiyere athu ni masikelo awoottha,

⁶ wi oohoowa naakulle ni makobiri asiliva, wi oopaneya naakulle ni esapato, wi nimukullihe tirigu ni mallulleene?’ ”

⁷ Apwiya Mulluku, ayo edduullu dda Yakobo enakotelliiwa aallupella wi, “Ddawoona ngiwa kitiwalla ddaweera ddiwa ddittheddene.

⁸ Ekaamba ya ddittheddenenndda, ellapo yavatthi eneerotikheya, arive muthu ookhallamo aneeromoriwa ethakaraka. Ellapo ettheene yavatthi eneerovidduwa wonanko Nailo, eneeronyaruwa ni owelleella wonanko muhinje wa o Iguputo.”

⁹ Apwiya Mulluku enallota wi, “Va nllapo nenno kineeroripiha nndduwa otthaana, kineeromoriha epiphi va ellapo yavatthi nndduwa niikimoopa.

¹⁰ Kineerotthattusa ehakallallo ddanyu okhalla winlla, machipwaanyu eehakallallo okhalla amaliro. Kineerewuuwarihani attheene eziguduli, miru ddanyu ddittheddene ddineerochemiwa mipala. Munaakhalle wonanko makhollo oomwinllella mwaniwa mmoddave, nllapo nenno nittheene ophiyera omalla wiwa, ninaakhalle noovoreya.”

¹¹ Apwiya Mulluku enallota wi, “Enthawi enimawa mvo kinaarumiheemi ettalla mwiillaponimmo. Khekhalla ettalla yoorama buledi apaalle nthona koma ettalla yoorama mawu a Apwiya.

¹² Athu eneerekeweeteeta nngu ni nngu, ovenyera o enyanja emodda oya o enyanja emoddattho, ovenyera ompoto oya wookhuma nndduwa waashaasha mawu a Apwiya koma ohaaphwanya.

¹³ Va nllapo nenno, naari anamwalli ooreera ni asombwe amasiva eneerongomowa ni nthona.

¹⁴ Attheene ayo enallupella mu nnddina na Ashima, mulluku a Samariya wi, ‘Kinimallupella mu nnddina na Dani, mullukwaaka,’ apaalle wi, ‘Kinimallupella mu nnddina na musewu woopatuleya wa o Beeresheba’ attheenaayo eneerewiikuha, oohivenyattho.”