Amosi 7 - Mawu a Mulluku

Amosi anamoona nazombe

¹ Nndda sika Apwiya Mulluku yakoonihelliiwa m'masomphenya. Apwiya yaamupanga nazombe va enthawi eyo mwene atullalleeye manasi nave ephuwellakattho.

² Koonilleemi wi nazombooyo oocha ddoomella ddittheddene dda mwiillaponimmo kaallota wi, “Nyu Apwiya Mulluku, pepaani khululukellani! Ethiyo athu a Yakobo enaallipihelle mwawiidde? Alliwa tti ooyeva wunchichi.”

³ Vano Apwiya yaamoriwa ethakaraka ellota wi, “Ddenndda khaddiwa ddeereya.”

Amosi anawoona munllo

⁴ Nndda sika Apwiya Mulluku yakoonihelliiwa m'masomphenya mamodda. Yaakhozekella waallaka athwiiwa ni munllo. Munllooyo wahummiha maaddi oowallamellesesa nave wahaamba woononga ellapo yavatthi.

⁵ Vano kaallota wi, “Nyu Apwiya Mulluku, pepaani kinimuuvekani, hiyani. Ethiyo athu a Yakobo enaallipihelle mwawiidde? Alliwa tti ooyeva wunchichi.”

⁶ Vaavo Apwiya yaamoriwa ethakaraka ellota wi, “Ddennddattho khaddiwa ddeereya.”

Amosi anawoona mukwe wawookollellana esiri

⁷ Nndda sika Apwiya yakoonihelliiwa m'masomphenya mamodda. Kaawoona alliwa yiimenlle va esiri yoomakamaka m'mattani mwiwa muri mukwe wookollelliwana esireeyo.

⁸ Apwiya yaakikoha wi, “We Amosi, ethiyo onooneeweeyo tti tini?” Nave kahaakhulla wi, “Mukwe wawookollellana esiri.” Vano Apwiya yaakilleella wi, “Mukwe yoolla kinawuhiya variyari va Aisraele, athwaaka nave ngaamorellattho ethakaraka.

⁹ Mapuro oollapellamo a Isaki eneerewoonongiwa, enyumba ddoollapellamo dda Israele ddineerotthattuwa ntepe, kineerowukila nibanja na mwene Yerobowamu ni nsupada.”

Amosi ni Amaziya

¹⁰ O Betele waakhalla mullupa mukutho mmodda nnddina naye Amaziya. Olliye aarumiha othenga wa Yerobowamu, mwene a o Israele wi, “Amosi animuukhozellani echiwembu variyari va athu a o Israele. Athu khewora okhoota ddittheddene nnddo anaalloteeye.

¹¹ “Amosi anallota wi, ‘Yerobowamu aneerokhwa ni nsupada Aisraele eneeropharelliwa wuukaporoni woorekamella ni owaniwa.’ ”

¹² Vano Amaziya aamulleella Amosi wi, “We namallotella, venyawo wuno! Othawelle o Yuda! Wallotelleke wenko nave athu a wenko eneerekewuuchiha.

¹³ Koma ohiye ollotellattho o Betele vawi tti nipuro noollapellawo mwene navettho tti nipuro noopaalleyesesa na mwiillaponimmu.”

¹⁴ Amosi aamwaakhulla Amaziya wi, “Mi ngihiyo namallotella naarittho mmodda a m'mulloko wa anamallotella. Mi tti mbusa a enkhosa navettho oollima namukuyu.

¹⁵ Apwiya yaarimakikusa ekihiiha muttekwaaka woochiha enkhosa ekilleella wi, ‘Khawe wallotelle wa athwaaka, Aisraele.’

¹⁶ “Sika vano ngiiwa mawu a Apwiya awi, ‘We onakilleella wi kihillotelle ddawaavaanyiha Aisraele ni nibanja na Isaki.’

¹⁷ “Vano Apwiya enallota wi, ‘Mwaariyo aneerotthattuwa ooraruwa m'muzindanimmu. Anaawo aallopwana ni aatthiyana eneerokhwa ni nsupada. Ellapwaawo eneeroyikawakawa, waakawella athu amodda, weyaano onaakhwelle mu ellapo yooripihiwa, Aisraele eneeropharelliwa wuukaporoni woorekamella ni owaniwa.’ ”