Amosi 6 - Mawu a Mulluku

Apwiya enaahumullulla awiitukhulla

¹ Otulli wa nyu munakhalla o Ziyoni moohitikheya, munakhalla o Samariya moohikatamiheya. Otulli wa nyu oovuwa a mutundu woovuwa, Aisraele, nko athu attheene enaphiyiiwawo.

² Khaweni o muzinda wa Kaline wi moone, muyettho o Hamati, muzinda woovuwoolle vano mukitthelle o Gati wa Afilisti. Ethiyo nyu Aisraele, munnaakhwaranya athu a moomwene yaalla, apaalle ellapwiiwa tti yuullupalli okhwaranya yawinyu?

³ Khamunaakhullella ddawi nineerophiya nllapo noollaka koma ddaweera ddanyu ddinimaakuviha enthawi ya echiwawa.

⁴ Otulli wa nyu munakona vamabedini ooreerihiwa ni manyaka eethepo, munaddookolla va mipando ddanyu, mweeraka machellello a enama yaasaanaankhosa ni yaasaanaang'ombe ooneneva.

⁵ Munnapeka ni wiipa machipo voopharihani mutteko azeze munaganiza wi muri wonanko Davide.

⁶ Munnamuwirya vinyo munchichi, muniihella makhura aphaama wunchichi koma khamunamoriwa ethakaraka ni woonongeya wa ellapo ya Yosefe.

⁷ Sika ekaamba ya yeella munaakhalle awaamba ophariwa okaporo nave machellello ni ehakallallo ddineerewuumallellani.

⁸ Apwiya Mulluku aallupella mu nnddina niwa wi, “Koonanariwa ni ddawiitukhullana dda Aisraele, kinniitanana enyumba ddiwa dduullupalli. Kineerovelleella wa adaniiwa, muzindiiwa muullupalli ni ddittheddene ddiri mwemmo.”

⁹ Athu khumi yavulluwa ni wiipittha mu enyumba emodda, alliwattho eneerokhwa.

¹⁰ Mbalaaye a mmodda a ookhwaayo oophwanella weetiha dda maliro aneerophiya wi akhumihe mutembo mpammo. Vano aneeromukoha mmodda oyo ahanlle mpammo wi, “Ethiyo mwemmo ookhallamottho mmodda ari mukumi?” Olliye aneerewaakhulla wi, “Iyaayi khaamo.” Nave mbalaayooyo aneerollota wi, “Ngamaalleya! Nihaaheye oromolla nnddina na Apwiya.”

¹¹ Ddawoona, Apwiya yalamula enyumba dduullupalli ddineerokumuwa, dding'onong'ono ddineerotthattuwa matepe.

¹² Ethiyo akavalo ttuuthamaka vanllukuni? Ethiyo mmodda ttuullima vanyanjani ni eng'ombe? Koma echiweruzo mooyitthattusa nttipwi ni echilungamo mooyitthattusa yoowaawa.

¹³ Muniitukhulla wi mwaawugonjiha muzinda wa Lodebara, munallota wi, “Ethiyo khanaagonjihalle muzinda wa Karinaimu weekhiihu?”

¹⁴ Koma Apwiya Mulluku Amasiva Mattheene enallota wi, “Kineerorumiha mulloko wakhoto weelleto wi wuuhelleni ekhoto nyu Aisraele. Eneerewuuhoosani waambeella voovollowella o Hamati ophiya o muhinje wa Araba omwera.”