Amosi 5 - Mawu a Mulluku

Omwinllella Israele

¹ Nyu a nibanja na Israele, ngiiwani mawu kinuulleelleemini dda nyuwaano moowinlla awi,

² “Namwalli Israele oomora, khavenyattho, ootathilliwa nave ootiwalliwa va ellapwaaye, khaavottho anaamuvenyihe.”

³ Apwiya Mulluku enallota wi, “Muzinda oyo wakelle okhotoni ni athu 1,000 onaahokollowe ni athu 100. Wakelle okhotoni ni athu 100 onaahokollowe ni athu khumi a nibanja na Israele.”

Apwiya enapaalla athu erukunuwe murima

⁴ Apwiya enallota ni a nibanja na Israele wi, “Kaashaasheni wi mukhalle ni okumi.

⁵ Koma muhikaashaashe o Betele, apaalle o Giligala apaalle o Beeresheba vawi Giligala aneerophariwa okaporo, Betele aneerewoonongiwa.”

⁶ Waashaasheni Apwiya wi mukhalle ni okumi. Mwaaheera ddiiddo eneerowoosa ni munllo athu a o Israele, oneerewaashellelliha a o Betele oohikhallavo oowuthiimiha.

⁷ Otulli wa ayo enakhoromaniha echilungamo, enanyaambusa ddoolungama.

⁸ Ngamooneni oyo aphatusalle etheneeri dda Muhomekiwiiphe ni Ompoto khamuyaawo atthattusalle epiphi okhalla owala ni otthaana okhalla mahiiyu, anawiithana maaddi a mu enyanja ni owiithella mu ellapo yavatthi, nnddina naye tti Apwiya.

⁹ Tti alliwattho enawoononga amasiva ni osherima wiwa, enakumulla mipanda ddiwa ddoollipa.

¹⁰ Nyu athu, munniitana ni oohumullulla ddoohilungama, munnananariwa ni oollota ddawoona va nthato namillatu,

¹¹ munnaanyingallella oohoowa ni owiiyera tirigwiiwa. Naarive mumakille enyumba ddamalluku oosema, khamukhallakamo. Naarive mullimalle emata ddampesa ddaphaama, khammuwirya vinywiiwa.

¹² Mi kinnadduwella waata wa machimwaanyu, wunnuwa wa ddoolakwa ddanyu. Nyu tti adani a athu oolungama, munnaakhella ddamukaphwani, munnavirikaniha millatu dda oohoowa.

¹³ Sika ekaambiiwa enthawi monga yeella, eezeru khanallotavo ello vawi tti enthawi yoonanara.

¹⁴ Muhiyevo murima vaweerani yaphaama ohiri yoonanara wi mukhalle ni okumi. Mweera ddiiddo, Apwiya Mulluku Amasiva Mattheene, eneerokhalla ni nyuwaano moollikana ni mmo mullotilleenyu.

¹⁵ Mwiitaneke ni yoonanara, mukondeke yaphaama, mukeraatthihe echilungamo m'mathatoni. Sika Apwiya Mulluku Amasiva Mattheene ttuuweerellani echifundo nyu oohalla mwiillaponi.

¹⁶ Sika ekaambiiwa Apwiya Mulluku Amasiva Mattheene enallotiiwa wi, “Muneerokhalla winlla m'mathatoni mutthemwene, m'misewuni mutthemwene ekuthove wi, ‘Kookhwa! Kookhwa!’ Naari athu shisha, oollima eneerowiithana wi yinlle, vamodda ni eeruso yawinlla vamalironi.

¹⁷ Mu emata ddittheddene ddampesa munaakhalle winlla vawi kineerovira variyari vawo.” Mi Apwiya koollota.

¹⁸ Otulli wa nyu munanikhallella munkhella nllapo na Apwiya! Ethiyo munaaphurena tini nllapo nenna? Ninaakhalle nllapo neepiphi ohiri noowala.

¹⁹ Onaakhalle wonanko muthu anathawa mukango nave akumana ni echimbalangondo apaalle wonanko muthu avollowille mpa ahameella esiri ni nnatta naye nave allumiwa enowa.

²⁰ Ethiyo khanihiyo nllapo na Apwiya neepiphi ohiri noowala, neepiphi yoottika ohiri noowalesesa?

²¹ Apwiya enallota wi, “Kinniitana nave kinnanyaambusa ehakallallo ddanyu, mitthukumano ddanyu ddamallapello nginahakallallana.

²² Naari muvelleelle mikutho ddanyu, ddooshellelliha navettho dda ddoocha mi ngiddaakhullella. Mikutho ddanyu dda eyaattano dda eng'ombe ddooneneva ngiddiweha naari vang'ono.

²³ Muhikithiyena owaruni machipwaanyu oonyakulla nginapaalla wiiwa miipello a azezaanyu.

²⁴ Koma echiweruzwaanyu yeete wonanko maaddi, echilungamwaanyu okhalle wonanko muhinje woohiwelleella.”

²⁵ “Nyu athu a o Israele, ethiyo mwaavelleella mikutho ni emphaso miyakha 40 mwaariinyu muchipululuni mulle?

²⁶ Nave muneeromutukhulla Sakuti, mwene a milluku ddanyu, Kaiwani, mullukwaanyu eetheneeri, mafano ayo mwiisemenlleenyu.

²⁷ Vano kineerewuurumihani wuukaporoni wuuteete ni muzinda wa Damasiko.” Mi Apwiya Mulluku Amasiva Mattheene koollota.