Amosi 4 - Mawu a Mulluku

Enaahumullulla atthiyana a o Samariya

¹ “Ngaapellani maaru, nyu atthiyana a o Samariya, nyu muniinenevella wonanko eng'ombe dda o Bashani, nyu munaanyingallella oohoowa, nyu munaakatamiha oopaneya nyu munaalamula amamuninyu wi eweena ddoowirya wi muwirye.

² Apwiya Mulluku ni weella wiwa, aallupella wi, mallapo enimawa mvo enaawumeddiiwani wonanko ehomba eneerewuukolani nyu attheene ni embeza.

³ Munaakhumihelliwe m'mittharini dda esiri, arive muthu vayeekha, ni otathillelliwa omwaangoni wa Harimoni Mi Apwiya koollota.”

Aisraele enalephela ohuddera

⁴ “Waani o Betele, onipuroni naweella wi muchimwe, mwaanjerere ddoolakwa ddanyu o Giligala. Muweekena mikutho ddanyu orive ohinase ddaneekhumi ddanyu erive mallapo mararu.

⁵ Velleellani wa Mulluku mikutho ddanyu ddoothokoza, mwiitukhullekena ddoovelleella ddanyu ddoopaalla vawi nndda sika munakondeenyu, nyu Aisraele. Mi Apwiya Mulluku koollota.”

⁶ “Tti miyaano kuurumihelleni ettalla m'mizindani ddanyu ddittheddene ni orama wa ddoocha m'mapuroni mwanyu mutthemwene koma khemwaahokollweelle wa miyaano. Mi Apwiya koollota.

⁷ Tti miyaanottho kammakille murimu vihanlle miyeri miraru wi muhate. Tti miyaano kamurupiha murimu m'muzinda mmodda ni oohimurupiha m'muzinda mmodda. Murimu aanarupa va emata emodda koma va emodda ahirupeeyevo yahumma.

⁸ Athu a mizinda miilli apaalle miraru yaanaya o muzinda mmodda wi yaashaashe maaddi koma kheyaakwakhwanella. Komave khemwaahokollweelle wa miyaano. Mi Apwiya koollota.”

⁹ “Kahummiha mmiddwaanyu ni ereta owaaka nkhuwawe, nazombe ahoononga emata ddanyu ddittheddene ni ddampesa, miteekho ddanyu ddanamukuyu ni dda olivi komave khemwaahokollweelle wa miyaano. Mi Apwiya koollota.”

¹⁰ “Kahuurumihellani millilli ddoophwanaphwana ni dda o Iguputo, kaawiipha asombwaanyu ni nsupada okhotoni, kahaavelleella akavalwaanyu wa adanaanyu, kaawunkhihani mitembo ovenyera o misasa ddanyu ddakhoto komave khamwaahokollweelle wa miyaano. Mi Apwiya koollota.”

¹¹ “Kaawoononga amodda a nyuwaano wonanko mmo koonongelleemi Sodomu ni Gomora. Amodda mwavulluwalle mwaari wonanko ekhuni ddoothumulliwa viikho komave khamwaahokollweelle wa miyaano. Mi Apwiya koollota.”

¹² “Nyu Aisraele, kineerewuullakani, sika nyu Aisraele, khozekellani okumana ni Mullukwaanyu.”

¹³ Ngamooneni oyo aphatusalle miyaango ni opanga ephevo, anamuwululella muthu dda m'muruni mwaye, anatthattusa otthaana okhalla mahiiyu, aneeta va mapuro aweellesesa a va ellapo yavatthi, nnddina naye tti Apwiya Mulluku Amasiva Mattheene.