Amosi 3 - Mawu a Mulluku

Ddoonanara dda Israele

¹ Nyu athu a o Israele, ngiiwani mawu a Apwiya awuuhumullullani ayo yuukhumihalleni mu Iguputo awi,

² “Mwa mitundu ddittheddene dda va ellapo yavatthi tti nyeeneve kinuudduwelleemini ni wuupwathani, sika kineerewuullakani wunchichi ekaamba ya machimwaanyu mattheene.”

Mutteko wa namallotella

³ “Ethiyo athu eelli ttuuweeta nimodda ehinapangane?

⁴ Ethiyo mukango ttuuthuruma muutthakoni ohinaphare enama, apaalle ttuuwinlla munikhunguni mwiwa ohinaphare ello?

⁵ Ethiyo epallame ttuukoliwa vamusamphani vihiri enyambo? Ethiyo musampha ttuukashuwa ohikolille ello?

⁶ Ethiyo nipallapata nakhoto ttuuwiipiwa m'muzindani koma athu oohoova? Ethiyo ddawoopiha ttuumorella m'muzindani ehiri Apwiya eddirumihallemo?

⁷ Ddawoona, Apwiya Mulluku kheneera ello ehinaawululelle owaarumeyelliiwa, anamallotella.

⁸ Ethiyo mukango wathuruma ttaani ahinoova? Ethiyo Apwiya Mulluku yallota, ttaani ahinaallotelle?”

Ollakiwa wa Asamariya

⁹ Ollalleye wa athu ookhalla o mipanda ddoollipa dda Ashidodi navettho wa ookhalla mu mipanda ddoollipa dda o Iguputo wi, “Mutthukumane omiyaangoni dda o Samariya, moone ddoovirikana dduullupalli ni ddoonyingallella ddineereya wenko.

¹⁰ Khenadduwella weera echilungamo, yoodduukellella eyuuma oweella mu waakha ni wiiya.” Mi Apwiya koollota.

¹¹ Sika ekaambiiwa Apwiya Mulluku enallotiiwa wi, “Adani eneerewaapheella ellapweeyo, eneerokumulla mipanda ddoollipa, eneerewaakha enyumba dduullupalli.”

¹² Apwiya enallota wi, “Mmo anavullusella mbusa, meto miilli apaalle naaru dda enkhosa, emoddamoddave yeeyo athu a o Israele ayo enakhalla o Samariya enaavullusiwe ehakallallakave ni eyuumiiwa.”

¹³ “Ngaapellani maaru, muwiipe mullatu a munibanjani na Yakobo.” Mi Apwiya Mulluku Amasiva Mattheene koollota.

¹⁴ “Nllapo kinaamullakeemi Israele ekaamba ya machimwaaye, kineerokumulla makuwa a Betele, manyakiiwa eneerokothowa ni omorella vatthi.

¹⁵ Kineerokumulla enyumba dda enthawi yooriirya ni dda enthawi yooviha. Enyumba ddoowallamella mutengo ddineerewoonongeya, enyumba dduullupalli ddineeropwalluwa.” Mi Apwiya koollota.