Amosi 2 - Mawu a Mulluku

Ollakiwa wa Amowabu

¹ Apwiya enallota wi, “Ekaamba ya ddoolakwa ddiraru dda athu a o Mowabu apaalle ddisese ngihiya waallaka, kheyawaavahille olemu makhuva a mwene a o Edomu yaawoosa ophiyera yaatthattuwa ntuura.

² Sika ekaambiiwa kinaarumiheemi munllo o Mowabu, munllooyo oneeroshellelliha mipanda ddoollipa dda o Keriyoti. Amowabu eneerokhwa mu onyakulla wa ekhoto akhoto ekhuwaka ni wiipa mapallapata.

³ Kineeromwiipha oolamulella variyari viwa, kineeroddiiphattho enduna ddaye vamodda ni olliye. Mi Apwiya koollota.”

Ollakiwa wa Yuda

⁴ Apwiya enallota wi, “Ekaamba ya ddoolakwa ddiraru dda athu a o Yuda apaalle ddisese ngihiya waallaka. Aavevulla ohuddiha waka, kheyaawiiwellelle malamulwaaka, milluku ddawoottha nnddo makhollwiiwa yaddillapelliiwa ddohaahollosa.

⁵ Sika kineerorumiha munllo o Yuda, munllooyo oneeroshellelliha mipanda ddoollipa dda Yerusalemu.”

Echiweruzo ya Apwiya va Aisraele

⁶ Apwiya enallota wi, “Ekaamba ya ddoolakwa ddiraru dda athu a o Israele apaalle ddisese ngihiya waallaka. Ennawaakakhaniha athu oolungama ni siliva, oohoowa ni esapato.

⁷ Ennaanyingallella athu oohoowa, khenaapwatha naari vang'ono oopaneya. Muthu ni attiitthinnya ennakona ni kaporo aamutthiyana mmoddamoddave yooyo, ennanyaambusa nnddina naka naweella.

⁸ Virive veko voollapellavo ennakonella ddoowara yaakhenlliiwa monga echikole ovenyera wa oohoowa. Mu enyumba ya Mullukwiiwa ennamuwirya vinyo emwaakhilliiwa ovenyera wa athu yakongonre makobiriiwa.

⁹ Komathi tti mi kawoonongille Aamori, Aisraele yoonaka yaphiyiiwa valle naari alliwaayo yaari oorekama wonanko mukunguza, naari yaari amasiva wonanko miteekho dda muthundu. Kahoononga ezipaso ddiwa m'miteekhoni ni misisi ddiwa vatthi.

¹⁰ Kahuukhumihani mu Iguputo, kahuuhoollellani mu echipululu miyakha 40, kahuuvahani ellapo ya Aamori wi ekhalle yoohallanaanyu.

¹¹ Kahaatthoolla amodda mwa aniinyu okhalla anamallotella, amodda mwa asombwaanyu okhalla Anaziri.* Nyu athu a o Israele, ethiyo kinimoottha?” Mi Apwiya koollota.

¹² Koma mwahaawiryiha vinyo Anaziri, mwahaalamula anamallotella wi ehillotelle dda othengaaka.

¹³ “Vano ngiiwani, kineerewuunyingallellani vatthi munipuroni mwanyummo, muneerewiipullella wonanko nigareta nooddalla ni katundu.

¹⁴ Oothamaka khawora othawa, amasiva khakhallattho ni masiva naari akhoto khewora wiivullusa.

¹⁵ Amiira khawa allipattho, oothamakesesa khavulluwa, oowella va akavalo khavullusa okumaaye.

¹⁶ Nllapo nenno naari oollipa murima variyari va amasiva aneerothawa ari epwillimwinddive. Mi Apwiya koollota.”