Amosi 1 - Mawu a Mulluku

Apwiya eneerollaka mitundu ddimodda dda athu

¹ Alla tti mawu a Amosi, mmodda a abusa a enkhosa a o Tekowa, ayo yuupullulliwe oollota dda Israele mu enthawi ya Uziya mwene a o Yuda ni mu enthawi ya Yerobowamu mwene a o Israele, mwaana a Yowashi miyakha miilli ehineereye echivomerezi.

² Amosi aallota wi, “Apwiya enimathuruma ovenyera o mwaango wa Ziyoni, mawiiwa eniiweya wonanko ogugudeya wa murimu ovenyera o Yerusalemu. Munyepu onimanyaalla, manasi a vamwaangoni wa Karimele enimumma.”

Ollakiwa wa Asiriya

³ Apwiya enallota wi, “Ekaamba ya ddoolakwa ddiraru dda athu a o Damasiko apaalle ddisese, ngihiya omullaka. Yahaahoosa Agiliyadi wonanko omuuputha tirigu ni mikoko.

⁴ Vano kineerorumiha munllo o enyumba yoomwene Hazaele, munllooyo oneeroshellelliha mipanda ddoollipa dda mwene Benihadadi.

⁵ Kineerewinttaka mikoko ddoollipa ddoowallella millako dda Damasiko. Kineerewaavenyihamo athu ookhalla o ntapo na Aveni navettho oyo anaalamulelleke o Betedeni. Athu a o Siriya eneerophariwa okaporo eneerewaakusella o Kiri.” Mi Apwiya koollota.

Ollakiwa wa Afilisti

⁶ Apwiya enallota wi, “Ekaamba ya ddoolakwa ddiraru dda athu a o Gaza apaalle ddisese, ngihiya omullaka. Vawi yaawuphara okaporo mutundu muttheene wa athu eyaana o Edomu.

⁷ Sika kineerorumiha munllo o esiri dda Gaza, munllooyo oneeroshellelliha mipanda ddoollipa ddiwa.

⁸ Kineerewaavenyihamo ookhalla mu Ashidodi navettho oyo anaalamulelleke o Ashikeloni. Kineerewoononga muzinda wa Ekeroni ni nnatta naka nave Afilisti oohalla eneerewoonongeya.” Mi Apwiya Mulluku koollota.

Ollakiwa wa athu a o Tiro

⁹ Apwiya enallota wi, “Ekaamba ya ddoolakwa ddiraru dda Tiro apaalle ddisese, ngihiya omullaka, ngihiya omullaka. Yaawupharella wuukaporoni mutundu muttheene o Edomu, kheyaasungalle echipangano ya echibale yiiwananiiwa.

¹⁰ Sika kineerorumiha munllo va esiri dda Tiro, munllooyo oneeroshellelliha mipanda ddiwa ddoollipa.”

Ollakiwa wa Aedomu

¹¹ Apwiya enallota wi, “Ekaamba ya ddoolakwa ddiraru dda Edomu apaalle ddisese, ngihiya omullaka. Yaawiikariha Aisraele, abaliiwa, masupada eri m'mattani, kheyaawaamorelle ethakaraka naari vang'ono, owalliiwa waari woohikhalla ni malire nave yaawumakellella m'murimani.

¹² Sika kineerorumiha munllo o muzinda wa Temani, munllooyo oneeroshellelliha mipanda ddoollipa dda Bozira.”

Ollakiwa wa Aamoni

¹³ Apwiya enallota wi, “Ekaamba ya ddoolakwa ddiraru dda Amoni apaalle ddisese, ngihiya omullaka, yahaaphulla atthiyana eerukullu o Giliyadi wi yunnuwihe maliriiwa.

¹⁴ Sika kineerorumiha munllo va esiri dda wa Raba, munllooyo oneeroshellelliha mipanda ddiwa ddoollipa. Vineerokhalla okhuwa va nllapo na ekhotonno, ekhotweeyo enaakhalle wonanko namangalle.

¹⁵ Sika mweniiwa aneeropharelliwa wuukaporoni, olliye vamodda ni enduna ddaye.” Mi Apwiya koollota.