Akolose 4 - Mawu a Mulluku

¹ Apwiya nyu, mukhallekena phaama ni mweechilungamo akaporwaanyu. Vawi munnadduwella wi nyuwaano mookhallattho ni Apwiya oddullu.

Malangizo

² Vekellani moohihiyerera, muwehereke mwaavekellaka nave mumuthokozeke Mulluku.

³ Nave munivekellelleke hiyaanottho wi Mulluku anihullelle mullako wi nillalleye othenga wa yoovittheya ya Khrisitu. Vawi miyaano vano kiri mundende ekaamba ya yeeyo.

⁴ Vano vekellani wi kuupullulle othenga yoolla mwawiiweya moollikana ni mmo onapaalleyelliiwa.

⁵ Makhallellwaanyu va athu oohimukhulupilila Mulluku ekhalleke eezeru, muphariheke mutteko enthawaanyu vaweerani ddaphaama.

⁶ Mawaanyu ekhalleke aphaama wonanko mwiinyu wi mudduwelleke omwaakhulla arive muthu enthawi ddittheddene.

Ollaanya

⁷ Mwanamunnihu ookondiwa Tikiko, mullupa mutteko oororomelleya ni oorumeyella mukhwiihu m'muttekoni wa Apwiya, aneerewuulleellani epilli ya miyaano.

⁸ Ella sika ekaambiiwa kinamurumiheemi wa nyuwaano wi uulleelleni eyo nineereehu attheene ni wuullipihani murima.

⁹ Anaawe ni Onesimo, mwanamunnihu ookondiwoolle ni oororomelleya, a mullokwaanyu. Eneerewuulleellani erive ello eneereya wuno.

¹⁰ Aristariko, oyo ari mundende ni miyaano, anuuvahani mooni. Navettho Mariko mullamwaaye a Baranaba anallota wi mooni. Mohaakhella khalle malangizo oomwaakhellella Mariko aphiya wenko.

¹¹ Yoswa, oyottho anaromolliwa Yusuto, annuvahanittho mooni. Athu araru yaalla sika Ayudave ookhulupilila ayo enaphara mutteko ni miyaano wa omwene wa Mulluku nave enakillipiha murima miyaano.

¹² Epafra, mmodda a mullokwaanyu ni oorumeyella a Khrisitu Yesu anuuvahanittho mooni. Enthawi ddittheddene annallipihella wuuvekellani, omuveka Mulluku wi aweereni oohitikheya, oowaraalla mu echikhulupililo ni oosimikiza wiiwellella yoopaalla ya Mulluku.

¹³ Miyaano kinnawora ovelleella omboni dda ollipihella wa muttekwaaye wa nyuwaano ni wa athu a o Laodikeya ni Hierapoli.

¹⁴ Luka, mullupa muretaahu ookondiwa ni Dema enuuvahani mooniiwa.

¹⁵ Munivahere mooni asinnihu ni arokorihu a o Laodikeya ni murokorihu Nimfa vamodda ni mpingo oyo onatthukumana mpa mwaye.

¹⁶ Mwamalliha omweerenga kalata yoolla, moonesese wi eerengiwettho mumpingoni wa o Laodikeya. Emoddamoddave yeeyo nyuwaano mumweerengettho kalata oyo kaarumihelleemi asinnihu ni arokorihu o Laodikeya.

¹⁷ Nave mullote wa Arkipo wi, “Woonesese wi ovirellelle ophara mutteko wa waarumeyella Apwiya oyo wavahiwiiwa ophiyera omanlle.”

¹⁸ Miyaano Paulo kinalemba dda moonoolla meekhaami. Muhitiwalle wi miyaano kiri mundende. Echisomo ya Mulluku ekhalle ni nyuwaano.