Akolose 3 - Mawu a Mulluku

¹ Moovenyihiwa mukhalla akumi ni Khrisitu, sika mukeraatthihe mirima ddanyu va ddeko ddooddullu, nko Khrisitu akeraatthilleeye va mpando wa omwene onnattanatta na Mulluku.

² Maganizwaanyu ekhalleke va ddeko ddooddullu, ohiri va ddeko dda vatthimva.

³ Vawi mookhwa nave okumaanyu woovittheya ni Khrisitu mwa Mulluku.

⁴ Okumaanyu tti omurumeyella Khrisitu nave ooneya, sika nanyeenettho muneerewooneya ni olliyooyo nave muneerokhalla ni ntitimiho naye.

Okumi wakhalle ni wanaanweene

⁵ Vano mwiiphe minkhella dda vatthimva nnddo ddiri m'mwiillini mwanyu, ddooraruwa, ddoonanara, minkhella ddoonanara, opaalla ddoonanara ni okhallella nrima (vawi nrima tti mafano).

⁶ Ekaamba ya ddeko ddenndda Mulluku aneerewaashella murima ayo ehinamwiiwellella.

⁷ Khalle nyuwaanottho makhallellwaanyu yaari a minkhella ddennddo, okumaanyu waariiwa mwa alliwaayo.

⁸ Nave vano munaphwanella wi mutathille ddeko ddenndda. Osha murima, onanariwa, ddawiitana. Muwano mwanyu muhikhumeke mawu oolalata apaalle a epewe.

⁹ Muhilleellaneke ddawoottha vawi moorulla makhallellwaanyu akhalle vamodda ni mitteko ddiwa

¹⁰ nave moowara makhallello anaanweene. Nyuwaano tti anaanweene, ayo Mulluku oophatusa, anavirellella wuupotokosani mwanaanweene mu maphwanaphwaniho a yeekhaaye wi mumudduwellesese olliyooyo.

¹¹ Ekaamba ya yeella, khuwaavo ohiyana variyari va Ayuda ni athu ayo ehiri Ayuda, oophaddiwa ni oohiphaddiwa, athu a ellapo ddimodda, athu oohihuddera, akaporo ni athu eyo ehiri akaporo nave Khrisitu sika ari oopaalleya, Khrisitu ari mwa attheene.

¹² Nyuwaano tti athu a Mulluku. Olliyooyo ahuukondani nave ahuutthoollani wi mukhalle aaye. Sika vano munaphwanella wi mukhalleke a murima waweera echifundo, ooreera murima, awiiyeviha, oomaalleya ni oovillella.

¹³ Muvillellaneke mmodda ni mukhwaaye nave mukhululukellane mmodda akhalla ni yookhupanya va mukhwaaye. Munaphwanella mukhululukellaneke mmodda ni mukhwaaye wonanko mmo Apwiya yuukhululukelliiwani nyuwaano.

¹⁴ Nave va makhallello yaalla, mupwesererevo echikondi, eyo enamakellella ddeko ddittheddene vamodda okhalla emodda yaphaama.

¹⁵ Murendelle oyo Khrisitu anavaheeye wuuhoollellekeni m'murimani mwanyu vawi Mulluku awiithanani wi mukhalle nimodda mu murendelle yoolla vawi muri mwiilli mmodda. Nave muthokozeke.

¹⁶ Othenga wa Khrisitu onaphwanella okhalle m'murimani mwanyu mwawaatesa. Muhuddihaneke ni olangizana mweezeru. Mwiipeke masalimo, machipo a Mulluku ni machipo a munepa. Ni murimaanyu muttheene muwiipelleke ni waatitimiha Apwiya.

¹⁷ Vano erive ello muneereenyu apaalle munalloteenyu enaphwanella yeeriwe mu nnddina na Apwiya Yesu, mwaamuthokozaka Mulluku Attiitthaanyu oweella mwa olliyooyo.

Mwiiwanano wa mu nibanja

¹⁸ Atthiyananyu, mwaavaheke olemu amamuninyu vawi yeeyo tti eyo munaphwanelleenyu wi mweereke wonanko ookhulupilila.

¹⁹ Allopwananyu, mwaakondeke awarinyu nave muhinanariwekena.

²⁰ Anamwaninyu, tti odindwaanyu owiiwellella makhollwaanyu enthawi ddittheddene vawi yeeyo sika enaahakallalliha Apwiya.

²¹ Makhollonyu, muhaashiheke murima aniinyu vawi khellipaka murima.

²² Akaporonyu muwiiwellelleke apwiinyu a vatthimva mu ddeko ddittheddene, ohiri yaawuuweherakanive kaambiiwa munapaalla mwaahakallallihe nave mweereke ni murimaanyu muttheene ekaamba ya owoova wanyu Apwiya.

²³ Erive ello muneereenyu, mweereke ni murima muttheene, wonanko munaphara mutteko wa Apwiya ohiri wa athu.

²⁴ Upuwellani wi Apwiya eneerewuuvahani madaliso ayo aasungenlleeye athwaaye. Vawi Khrisitu sika Apwiya munaarumeyelleenyu.

²⁵ Nave aweera ddoonanara eneerewaakhella yoonanara eneeriiwa kaambiiwa Mulluku annamweeruza arive muthu moohiweha ekhove.