Akolose 1 - Mawu a Mulluku

¹ Ovenyera wa miyaano Paulo, murummwa a Khrisitu Yesu mu opaalla wa Mulluku navettho ovenyera wa Timoteo mwanamunnihu.

² Ninaalembella athu a Mulluku a o Kolose, asinnihu ni arokorihu oororomelleya mu eyaattano ni Khrisitu. Echisomo ni murendelle ddoovenyera wa Mulluku Attiitthiihu ddikhalle ni nyuwaano.

Nivekello na othokoza

³ Ninnamuthokoza Mulluku, Attiitthiiwa a Apwiihu Yesu Khrisitu enthawi ddittheddene naawuuvekellakani.

⁴ Vawi nohiiwa dda echikhulupilwaanyu mwa Khrisitu Yesu ni echikondaanyu wa athu a Mulluku attheene.

⁵ Nndda ddiri ddiidda kaambiiwa munatiyerella ddeko nnddo ddisungiwe oddullu. Vawi mwahiiwa dda nndda mvo yawoona, eyo tti othenga waphaama, wallalleyiwiiwa wa nyuwaano.

⁶ Othenga waphaamoolla onnawaana ezipaso nave onunnuwa mu ellapo yavatthi ettheene, wonanko mmo weerelliiwa variyari vanyu waambeella va nllapo mwaambilleenyu wiiwa dda echisomo ya Mulluku navettho mwaawudduwellesesa mwawoona.

⁷ Epafra, oorumeyella ookondiwa mukhwiihu, sika uulleelleni dda echisomo ya Mulluku. Olliye tti mullupa mutteko oororomelleya a Khrisitu voopharani mutteko munipuroni mwahu.

⁸ Oonilleella dda echikondi eyo Munepa Waweella uuvahilleeyeni.

⁹ Ekaamba ya yeella ninnuuvekellani enthawi ddittheddene, waambeella niiwalleehu dda nyuwaano. Ninamuveka Mulluku wi aweeriheni wi muddalle ni odduwella wa opaalla waye, oweella mwa ezeru ddittheddene ni wiiwesesa ottheene nnddo Munepa anavaheeye.

¹⁰ Mweeddiiddo muneerowora okhalla wonanko Apwiya enapaallelliiwa nave enthawi ddittheddene muneerekeweera ddoomuhakallalliha olliye. Makhallellwaanyu oneerewimma ezipaso ddaphaama ddoohiyanahiyana nave omudduwella wanyu Mulluku oneerewunnuwa.

^11-12 Mullipihiweke ni masiva mattheene oovenyera o masiva antitimiho naye wi muwore ovillella ni olleva erive ello. Mwaathokozeke Attiitthaanyu moohakallalla, ayo yaweerihalleni wi mukhallena eyo Mulluku aasungenlleeye athwaaye mu omwene woowala.

¹³ Aanaakiha ovenyera o masiva a epiphi nave anikusella mu omwene wa Mwanaye ookondiwa.

¹⁴ Vawi noottaphulliwa ekaamba ya olliye, machimwaahu aakhululukiwa.

Makhallello ni mutteko wa Khrisitu

¹⁵ Khrisitu tti yoophwanaphwanihella yawooneya ya Mulluku oohooneya. Olliye tti Mwaana aamullopwana awaamba, muullupalli a ddoophatusiwa ddittheddene.

¹⁶ Vawi oweella mwa olliye Mulluku aaphatusa erive ello oddullu ni va ellapo yavatthi, ddeko ddoohooneya ni ddawooneya, oolamulella attheene ni masiva mattheene ooddullu. Mulluku aaphatusa erive ello oweella mwa olliye ni wa yooyo.

¹⁷ Khrisitu aakhallawo ddeko ddittheddene ddihinakhallewo nave ddeko ddittheddene ddoomakellelliwa vamodda mu eyaattano ni olliyooyo.

¹⁸ Olliye tti muru wa mpingo oyo ori mwiillaaye. Olliye tti maambeellello a erive ello, awaamba a oovenya wa ookhwa wi akhalle muullupalli mu ddeko ddittheddene.

¹⁹ Vawi Mulluku aaganiza wi oonihe makhallellwaaye mattheene mwa Mwaanooyo.

²⁰ Oweella mwa Mwaanooyo, Mulluku aheeriha ddeko ddittheddene wi ddaattanihiwe ni olliye. Mulluku aawaana murendelle oweella mu nikhame na Mwanaye vamutandani wi ddeko ddittheddene ddaattanihiwe ni olliye, vatthimva ni oddullu wene.

²¹ Khalle nyuwaano mwaarekamellana ni Mulluku nave mwaari adanaaye ekaamba ya machimo mweenreenyu ni mwaaganizalleenyu.

²² Koma vano oyeella mwa okhwa wa mwanaye wonanko muthu, Mulluku aawaattanihani nyuwaano ni olliye wi mukhalle aweella, oohichimwa ni oohikhalla ni nipamba vamiitthoni vaye.

²³ Koma munaphwanella muvirellelle okhulupilila va matthipello oollipa awoona nave muhitikheyeke va otiyera wanyu mwaakhenlleenyu mwiiwalle othenga waphaama. Miyaano Paulo kaakhalla oorumeyella a othenga waphaama yoolla oyo ollalleyiwe wa arive muthu va ellapo yavatthi.

²⁴ Nave vano koohakallalla ni ddoohoosa ddaka ekaamba ya nyuwaano vawi kinnavirellella ohoosiwa wonanko Khrisitu ekaamba ya mwiillaaye, oyo ori mpingo.

²⁵ Nave koheeriwa oorumeyella a mpingo ni Mulluku oyo aakivahille mutteko yoolla wi kiphare variyari vanyu. Yoolla tti mutteko woollalleya othengaaye muttheene,

²⁶ yeeyo tti yookhuweya ahimulleelleeye arive muthu khalle koma vano ohuupullulla wa athwaaye.

²⁷ Yoolinga ya Mulluku tti yawi athwaaye edduwelle yookhuweyaaye yawaata ni yootitimiheya variyari va athu oohimullapella Mulluku. Nave yookhuweyeeyo tti yawi Khrisitu ari mwa nyuwaano nave wi olliye tti yootiyerellaanyu wi mwaakhelle ntitimiho na Mulluku.

²⁸ Sika ninnallalleya dda Khrisitu wa arive muthu. Ninnachenjeza ni ohuddiha ni ezeru ddittheddene wi niweena arive muthu vamiitthoni va Mulluku ari oowaraalla mu eyaattano ni Khrisitu.

²⁹ Wi ddenndda ddeereye, kinaphara mutteko moollipihella, voopharihani mutteko masiva uullupalli ayo enavelleelliiwa ni Khrisitu oyo anaphara mutteko mwa miyaano.